Jeremiah 44

Isaiah  «  Jeremiah 43  ‹  Jeremiah 44  ›  Jeremiah 45  »  Lamentations

ԱՍՏՈՒԾՈՅ ՊԱՏԳԱՄԸ ԵԳԻՊՏՈՍԻ ԻՍՐԱՅԵԼԱՑԻՆԵՐՈՒՆ

Ահա՛ւասիկ Եգիպտոսի երկրին մէջ բնակող բոլոր Հրեաներուն համար, այսինքն Մագդող, Տափնաս, Մեմփիս, ու Պաթուրէսի երկրին մէջ բնակողներուն համար Երեմիայի ¹ուղղուած խօսքը Տէրոջմէն՝ որ ըսաւ.

«Զօրքերու Տէրը՝ Իսրայէլի Աստուածը սա՛ կը յայտարարէ. “Դուք տեսաք այն բոլոր ձախորդութիւնները՝ որ Երուսաղէմի վրայ ու բոլոր Յուդայի քաղաքներուն վրայ բերի. ահա՛ անոնք այսօր աւերակ են, եւ անոնց մէջ բնակող չկայ,

զիս գրգռելու համար իրենց գործած չարիքներուն պատճառով, որովհետեւ գացին խունկ ծխեցին եւ ուրիշ աստուածներ պաշտեցին, որ ո՛չ իրենք ճանչցեր էին, ո՛չ դուք, ո՛չ ալ ձեր հայրերը։

Ես ձեզի ղրկեցի իմ բոլոր ծառաներս՝ մարգարէները — կանուխ ելլելով ղրկեցի — եւ ըսի. "Այդ գարշելի բանը մի՛ ընէք, որ ես կ’ատեմ"։

Բայց մտիկ չըրին ու իրենց ականջը չդարձուցին՝ որ իրենց չարութենէն դարձի գան եւ ուրիշ աստուածներու խունկ չծխեն։

Ուստի իմ ցասումս ու բարկութիւնս թափուեցան, եւ Յուդայի քաղաքներուն մէջ ու Երուսաղէմի փողոցներուն մէջ ²բորբոքեցան. ուստի անոնք աւերակ եւ ամայի եղան, ինչպէս այսօր կ’երեւնայ”։

Ուրեմն հիմա Տէրը՝ զօրքերու Աստուածը սա՛ կը յայտարարէ. “Ինչո՞ւ դուք ձեր անձին դէմ այս մեծ չարիքը կը գործէք, որ Յուդայի մէջէն այր մարդն ու կինը, երախան եւ ծծկերը բնաջնջել կու տաք, այնպէս որ ձեզի ո՛չ մէկ ճողոպրած մնայ։

Ձեր ձեռքերուն գործերով զիս կը գրգռէք՝ ուրիշ աստուածներու խունկ ծխելով Եգիպտոսի մէջ, ուր դուք եկաք հոն պանդխտանալու համար. ուստի պիտի բնաջնջուիք ու երկրի բոլոր ազգերուն մէջ անէծք եւ նախատինք ըլլաք։

Միթէ մոռցա՞ք ձեր հայրերուն չարութիւնները, Յուդայի թագաւորներուն չարութիւններն ու անոնց կիներուն չարութիւնները, նաեւ ձեր չարութիւնները եւ ձեր կիներուն չարութիւնները, որ գործուեցան Յուդայի երկրին մէջ ու Երուսաղէմի փողոցներուն մէջ։

Անոնք մինչեւ այսօր ³չխոնարհեցան եւ չվախցան, ու ձեր առջեւ եւ ձեր հայրերուն առջեւ դրած օրէնքիս ու կանոններուս համաձայն չընթացան”։

Հետեւաբար զօրքերու Տէրը՝ Իսրայէլի Աստուածը սա՛ կը յայտարարէ. “Ահա՛ ես իմ երեսս ձեզի դէմ ⁴կ’ուղղեմ՝ չարիքի եւ ամբողջ Յուդան կոտորելու համար։

Պիտի առնեմ Յուդայի ճողոպրածները, որոնք իրենց երեսը ուղղեցին Եգիպտոսի երկիրը երթալու՝ հոն պանդխտանալու համար, ու բոլորը պիտի սպառին եւ իյնան Եգիպտոսի երկրին մէջ. սուրով, սովով պիտի սպառին. պզտիկէն մինչեւ մեծը սուրով ու սովով պիտի մեռնին, եւ նողկանքի, ապշութեան, անէծքի ու նախատինքի ենթակայ պիտի ըլլան։

Եգիպտոսի երկրին մէջ բնակողները պիտի ⁵պատժեմ, ինչպէս Երուսաղէմը սուրով, սովով ու ժանտախտով պատժեցի։

Յուդայի ճողոպրածներէն, այսինքն Եգիպտոս պանդխտանալու գացողներէն ո՛չ մէկը պիտի վերապրի կամ ազատի՝ որ Յուդայի երկիրը վերադառնայ, ուր անոնք ⁶կը տենչան՝՝ վերադառնալ՝ հոն բնակելու համար. արդարեւ պիտի չվերադառնան՝ բացի քանի մը ազատածներէ”»։

Այն բոլոր մարդիկը՝ որ գիտէին թէ իրենց կիները ուրիշ աստուածներու խունկ կը ծխէին, նաեւ հոն կայնող բոլոր կիները՝ մեծ համախմբումով, ու Եգիպտոսի երկրին մէջ՝ Պաթուրէս բնակող ամբողջ ժողովուրդը Երեմիայի պատասխանեցին.

«Տէրոջ անունով մեզի ըսած խօսքիդ մասին՝ մենք քեզի մտիկ պիտի չընենք։

Հապա անշուշտ պիտի գործադրենք մե՛ր բերանէն ելած ամէն խօսք, երկինքի թագուհիին խունկ ծխելով եւ անոր թափելիք նուէրներ ⁷ընծայելով, ինչպէս ըրինք մենք ու մեր հայրերը, մեր թագաւորները եւ մեր իշխանաւորները՝ Յուդայի քաղաքներուն մէջ ու Երուսաղէմի փողոցներուն մէջ. որովհետեւ այդ ատեն հացով կը կշտանայինք, բարօրութիւն ունէինք եւ չարիք չէինք տեսներ։

Սակայն այն ատենէն ի վեր՝ երբ դադրեցուցինք երկինքի թագուհիին խունկ ծխելն ու անոր թափելիք նուէրներ ընծայելը, ամէն բանի կարօտ եղանք, եւ սուրով ու սովով սպառեցանք։

Երբ երկինքի թագուհիին խունկ կը ծխէինք եւ անոր թափելիք նուէրներ կ’ընծայէինք, միթէ առանց մեր ամուսիններուն արտօնութեա՞ն զայն պաշտելու համար բլիթներ կը շինէինք ու անոր թափելիք նուէրներ կ’ընծայէինք»։

Այն ատեն Երեմիա ամբողջ ժողովուրդին — ⁸այր մարդոց՝՝, կիներուն եւ իրեն այսպէս պատասխանող ժողովուրդին — ըսաւ.

«Միթէ այն խունկը՝ որ Յուդայի քաղաքներուն մէջ ու Երուսաղէմի փողոցներուն մէջ կը ծխէիք,— դուք ու ձեր հայրերը, ձեր թագաւորները, ձեր իշխանաւորներն ու երկրին ժողովուրդը,— Տէրը զայն չյիշե՞ց եւ անոր մասին ⁹չմտածե՞ց։

Տէրը ձեր չար արարքներուն ու ձեր գործած գարշութիւններուն պատճառով ա՛լ չկրցաւ հանդուրժել. ուստի ձեր երկիրը աւերակ, ամայի, անիծեալ եւ անբնակ եղաւ, ինչպէս այսօր կ’երեւնայ։

Քանի դուք խունկ ծխեցիք ու Տէրոջ դէմ մեղանչեցիք՝ Տէրոջ ձայնը մտիկ չընելով եւ անոր օրէնքին, կանոններուն ու վկայութիւններուն համաձայն չընթանալով, այս չարիքը ձեզի պատահեցաւ, ինչպէս այսօր կ’երեւնայ»։

Երեմիա ամբողջ ժողովուրդին եւ բոլոր կիներուն ըսաւ. «Մտի՛կ ըրէք Տէրոջ խօսքը, ո՛վ ամբողջ Յուդա, որ Եգիպտոսի երկրին մէջ էք։

Զօրքերու Տէրը՝ Իսրայէլի Աստուածը սա՛ կը յայտարարէ. “Դուք ու ձեր կիները ձեր բերանով խօսեցաք, ձեր ձեռքերով ¹⁰գործադրեցիք եւ ըսիք. "Մեր ըրած ուխտը անշո՛ւշտ պիտի կատարենք, այսինքն երկինքի թագուհիին խունկ պիտի ծխենք, ու անոր թափելիք նուէրներ պիտի ընծայենք"։ Այո՛, դուք ձեր ուխտերը պիտի հաստատէք. այո՛, ձեր ուխտերը պիտի կատարէք։

Հետեւաբար մտի՛կ ըրէք Տէրոջ խօսքը, ո՛վ ամբողջ Յուդա, որ Եգիպտոսի երկրին մէջ կը բնակիք. "Ահա՛ ես իմ մեծ անունովս երդում ըրի,— կը յայտարարէ Տէրը,— որ անգա՛մ մըն ալ իմ անունս չկանչուի Եգիպտոսի ամբողջ երկրին մէջ Յուդայի մարդու մը բերանէն՝ ըսելով. «Տէրը՝ Եհովան կ’ապրի»։

Ահա՛ ես անոնց վրայ կը հսկեմ չարիքի համար, ո՛չ թէ բարիքի համար. Եգիպտոսի երկրին մէջ եղող Յուդայի բոլոր մարդիկը սուրով ու սովով պիտի սպառին՝ մինչեւ որ հատնին։

Սակաւաթիւ մարդիկ՝ սուրէն ազատելով՝ Եգիպտոսի երկրէն պիտի վերադառնան Յուդայի երկիրը, ու Եգիպտոսի երկիրը պանդխտանալու գացող Յուդայի բոլոր ճողոպրածները պիտի գիտնան թէ որո՛ւն խօսքը պիտի իրագործուի, ի՞մս թէ իրենցը։

Եւ սա՛ ձեզի նշան պիտի ըլլայ,— կը պատգամէ Տէրը,— թէ այս տեղը ձեզ պիտի ¹¹պատժեմ, որպէսզի գիտնաք թէ իմ խօսքս ձեր վրայ անշուշտ պիտի իրագործուի չարիքի համար"”։

Տէրը սա՛ կը յայտարարէ.— “Ահա՛ ես Եգիպտոսի Փարաւոն Վափառ թագաւորը իր թշնամիներուն ձեռքը եւ իր կեանքը փնտռողներուն ձեռքը պիտի մատնեմ. ինչպէս Յուդայի Սեդեկիա թագաւորը իր թշնամիին ու իր կեանքը փնտռող Բաբելոնի Նաբուգոդոնոսոր թագաւորին ձեռքը մատնեցի”»։