Jeremiah 46

Isaiah  «  Jeremiah 45  ‹  Jeremiah 46  ›  Jeremiah 47  »  Lamentations

ԵԳԻՊՏՈՍ ԿԸ ՊԱՐՏՈՒԻ ՆԱԲՈՒԳՈԴՈՆՈՍՈՐԷՆ

Տէրոջ խօսքը, որ Երեմիա մարգարէին ¹ուղղուեցաւ՝ ազգերուն մասին.

Եգիպտոսի համար, Եգիպտացիներու թագաւորին՝ Փարաւոն Նեքաւովի զօրագունդին մասին, որ Քարքամիս էր՝ Եփրատ գետին քով, երբ Բաբելոնի Նաբուգոդոնոսոր թագաւորը զայն ²պարտութեան մատնեց՝՝ Յուդայի թագաւորին՝ Յովսիայի որդիին Յովակիմի չորրորդ տարին.—

«Վահա՛ն եւ ասպա՛ր պատրաստեցէք Ու պատերազմի՛ մօտեցէք.

Ձիե՛րը լծեցէք, եւ դո՛ւք, ո՛վ ձիաւորներ, հեծէ՛ք. Սաղաւարտներո՛վ կայնեցէք, Նիզակնե՛րը փայլեցուցէք ու զրահնե՛րը հագէք։

Բայց ի՞նչ կը տեսնեմ. անոնք զարհուրած են, ու կը նահանջեն. Անոնց զօրաւորներն անգամ կը ջախջախուին, Եւ ³խուճապահար կը փախչին՝ առանց ⁴ետեւ դառնալու՝՝. Ամէն կողմէ արհաւիրք կայ,— կը պատգամէ Տէրը։—

Թեթեւաշարժը թող չփախչի, Ո՛չ ալ զօրաւորը խոյս տայ. Անոնք գայթելով պիտի իյնան Հիւսիսային կողմը, Եփրատ գետին ափին։

Ո՞վ է ասիկա՝ որ ⁵գետի պէս կը բարձրանայ, Որուն ջուրերը գետերու պէս ⁶կը փրփրին՝՝.

Եգիպտո՛ս գետի պէս կը բարձրանայ, Եւ անոր ջուրերը գետերու պէս կը փրփրին։ Ան կ’ըսէ. “Ես պիտի բարձրանամ, երկիրը պիտի ծածկեմ, Քաղաքն ու անոր բնակիչները պիտի բնաջնջեմ”։

Ո՛վ ձիեր, բարձրացէ՛ք. ո՛վ կառքեր, մոլեգնեցէ՛ք. Թող դուրս ելլեն զօրաւորները.— Վահան բռնող Եթովպիացիները եւ ⁷Փութացիները, Աղեղ բռնող ու լարող Ղուդացիները։

Արդարեւ այսօր զօրքերու Տէրոջ՝ Եհովայի վրէժխնդրութեան օրն է, Որ իր հակառակորդներէն վրէժ առնէ. Սուրը պիտի սպառէ եւ կշտանայ, Անոնց արիւնով պիտի գինովնայ. Որովհետեւ զօրքերու Տէրը՝ Եհովան զոհ ունի, Հիւսիսի երկրին մէջ, Եփրատ գետին եզերքը։

Գաղաա՛դ բարձրացիր ու բալասա՛ն առ, Ո՛վ Եգիպտոսի կոյս աղջիկ. Դեղերը ընդունայն կը շատցնես, Քեզի բժշկութիւն չկայ։

Ազգերը քու անարգանքդ լսեցին, Եւ աղաղակդ ⁸երկրագունդը լեցուց. Քանի որ զօրաւորը զօրաւորին վրայ գայթեցաւ, Երկուքը միասին ինկան»։

ՆԱԲՈՒԳՈԴՈՆՈՍՈՐԻ ԳԱԼՈՒՍՏԸ

Ահա՛ւասիկ այն խօսքը, որ Տէրը Երեմիա մարգարէին ուղղեց՝ Բաբելոնի Նաբուգոդոնոսոր թագաւորին գալուստին մասին, Եգիպտոսի երկիրը զարնելու համար.—

«Յայտարարեցէ՛ք Եգիպտոսի մէջ, ⁹ծանուցանեցէ՛ք Մագդողի մէջ, Ծանուցանեցէ՛ք Մեմփիսի ու Տափնասի մէջ, Եւ ըսէ՛ք. “Կայնէ՛ ու պատրաստուէ՛, Որովհետեւ քու շուրջդ սուրը պիտի սպառէ”։

Ինչո՞ւ քու զօրաւորներդ ¹⁰անհետացան. Անոնք չկրցան դիմանալ, որովհետեւ Տէ՛րը զանոնք ¹¹վար ձգեց՝՝։

Գայթողները շատցուց. անոնք իրարու վրայ կ’իյնան Եւ կ’ըսեն. “Կանգնէ՛, կեղեքողին սուրին պատճառով Վերադառնա՛նք մեր ժողովուրդին ու մեր ¹²ծննդավայրը”։

Հոն կը գոչէին. “Եգիպտոսի Փարաւոն թագաւորը միայն ժխոր մըն է. Ան իր սահմանուած ատենը անցուց”»։

«Ես կ’ապրիմ,— կը պատգամէ այն Թագաւորը՝ Որուն անունը ¹³Զօրքերու Տէր՝՝ է.— Ինչպէս Թաբոր լեռներուն մէջ է, Ինչպէս Կարմեղոս մինչեւ ծովը կը հասնի, Այնպէս ան պիտի գայ։

Ո՛վ Եգիպտոս բնակող աղջիկ, Քեզի համար տարագրութեան գոյքե՛ր պատրաստէ. Որովհետեւ Մեմփիս ամայի պիտի ըլլայ, Տոչորուած, առանց բնակիչի»։

«Եգիպտոս յոյժ գեղեցիկ երինջ մըն է, Բայց կոտորածը կու գայ, հիւսիսէն կու գայ։

Իր մէջ վարձկան զինուորները գիրցուած զուարակներու պէս են. Սակայն անո՛նք ալ կռնակ դարձուցին, միասին փախան, չդիմացան. Արդարեւ անոնց վրայ հասաւ իրենց ձախորդութեան օրը, Եւ իրենց ¹⁴պատիժի ժամանակը»։

«Անոր ձայնը օձի ձայնին պէս ¹⁵կը լսուի՝՝, Քանի որ զօրագունդով մը կը քալեն, Եւ իրեն դէմ տապարներով կու գան՝ Փայտահատներու պէս։

Իր անտառը պիտի կտրեն,— կը պատգամէ Տէրը,— Թէպէտ ան ¹⁶անթափանցելի է. Որովհետեւ անոնք մարախներէն շատ են, Անթիւ են։

Եգիպտոսի աղջիկը ամօթահար պիտի ըլլայ. Հիւսիսի ժողովուրդին ձեռքը պիտի մատնուի»։

Զօրքերու Տէրը՝ Իսրայէլի Աստուածը կը յայտարարէ. «Ահա՛ ես ¹⁷Նովի Ամոնը՝՝ եւ Փարաւոնը, Եգիպտոսը, իր աստուածներն ու թագաւորները, Այսինքն Փարաւոնը եւ անոր վստահողները պիտի ¹⁸պատժեմ.

Զանոնք պիտի մատնեմ իրենց կեանքը փնտռողներուն ձեռքը, Բաբելոնի Նաբուգոդոնոսոր թագաւորին ձեռքը Եւ անոր ծառաներուն ձեռքը. Անկէ ետք պիտի բնակուի՝ վաղեմի օրերուն պէս», կը պատգամէ Տէրը։

ԱՍՏՈՒԱԾ ԻՐ ԺՈՂՈՎՈՒՐԴԸ ՊԻՏԻ ԱԶԱՏԷ

«Բայց դուն մի՛ վախնար, ո՛վ իմ ծառաս Յակոբ, Եւ մի՛ զարհուրիր, ո՛վ Իսրայէլ. Որովհետեւ ահա՛ ես քեզ հեռուէն պիտի ազատեմ, Ու քու զարմդ՝ իր գերութեան երկրէն։ Յակոբ պիտի վերադառնայ, հանդարտ եւ անխռով պիտի ըլլայ, Ու ո՛չ մէկը զինք պիտի դողացնէ»։

«Դուն մի՛ վախնար, ո՛վ իմ ծառաս Յակոբ,— կը պատգամէ Տէրը,— Որովհետեւ ես քեզի հետ եմ։ Պիտի ¹⁹բնաջնջեմ այն բոլոր ազգերը՝ Որոնց մէջ քեզ աքսորեցի. Իսկ քեզ պիտի չբնաջնջեմ, Հապա քեզ ²⁰չափաւորութեամբ պիտի ²¹պատժեմ. Քեզ բոլորովին անմեղ պիտի չսեպեմ»։