Job 28

Esther  «  Job 27  ‹  Job 28  ›  Job 29  »  Psalm

ԻՄԱՍՏՈՒԹԵԱՆ ԳՈՎԵՍՏԸ

«Անշուշտ արծաթը իր երակը ունի, Ու ոսկին՝ իր զտուելու տեղը.

Երկաթը հողէն կը ստացուի, Պղինձը՝ ¹հանածոն հալեցնելով՝՝։

Մարդը խաւարին վերջակէտ կը դնէ, Եւ ամէն ինչ ²կատարելապէս կը հետազօտէ. Մութին մէջ պահուած քարերն ալ՝ որոնք մահուան շուքին մէջ են։

³Փոս կը բանայ՝՝ իր բնակած տեղէն հեռու, Հոն՝ ուր ⁴ոտք չէ կոխուած՝՝. ⁵Կը ցածնան՝՝, մարդոցմէ հեռու կը շարժին։

Երկրէն հաց կ’արտադրուի, Իսկ անոր ներքեւը տակնուվրայ կ’ըլլայ՝ իբր թէ կրակով։

Անոր ⁶հանքերը շափիւղաներու տեղ են, Ու հոն ոսկիի փոշի կայ։

Գիշատիչ թռչունը անոր շաւիղը չի գիտեր, Եւ անգղին աչքը զայն նշմարած չէ։

⁷Վայրենի գազանները՝՝ հոն ոտք կոխած չեն, ⁸Մռնչող առիւծը՝՝ անկէ անցած չէ։

Մարդը իր ձեռքը կ’երկարէ ապառաժներուն, Ու լեռները հիմէն տակնուվրայ կ’ընէ։

Վէմերը ճեղքելով՝ գետեր կ’անցընէ անոնց մէջէն. Անոր աչքը ամէն պատուական բան կը տեսնէ։

Գետերը ⁹կ’արգիլէ՝ որ չհոսին՝՝, Եւ թաքուն պահուածը ¹⁰երեւան կը հանէ։

Բայց իմաստութիւնը ո՞ւր կը գտնուի, Ու խելքին տեղը ո՞ւր է։

Մարդը անոր յարգը չի գիտեր, Եւ ան չի գտնուիր ապրողներու երկրին մէջ։

Անդունդը կ’ըսէ. “Ան իմ մէջս չէ”, Ծովն ալ կ’ըսէ. “Իմ քովս չէ”։

Զուտ ոսկիի փոխարէն չի տրուիր. Արծաթ չի կշռուիր անոր գինին համար։

Ո՛չ Ոփիրի մաքուր ոսկիով կը փոխարինուի, Ո՛չ ալ պատուական եղնգնաքարով եւ շափիւղայով։

Ոսկին ու վանակնը չեն կրնար անոր հետ բաղդատուիլ. Զուտ ոսկիէ իրերով չի փոխանակուիր.

Բուստը եւ բիւրեղը անոր քով չեն յիշատակուիր։ Արդարեւ իմաստութեան ¹¹գինը մարգարիտներու գինէն աւելի բարձր է.

Եթովպիայի տպազիոնը անոր հետ չի բաղդատուիր, Ու մաքուր ոսկիով չի փոխարինուիր։

Ուրեմն իմաստութիւնը ուրկէ՞ կու գայ, Եւ խելքին տեղը ո՞ւր է.

Քանի բոլոր ապրողներուն աչքերէն թաքնուած է, Ու երկինքի թռչուններէն՝ պահուած։

¹²Վիհը եւ մահը կ’ըսեն. “Մենք անոր համբաւը մեր ականջներով լսեր ենք”։

Անոր ճամբան Աստուա՛ծ կը ¹³ճանչնայ, Անոր տեղը ի՛նք գիտէ,

Քանի մինչեւ երկրի ծայրերը կը դիտէ, Երկինքին տակ եղած ամէն ինչ կը տեսնէ։

Երբ հովին կշիռը ¹⁴կը սահմանէր՝՝, Ու ջուրերը չափով կը կշռէր,

Երբ անձրեւին կանոն ¹⁵կ’որոշէր, Եւ ¹⁶որոտումներու փայլակին՝ ճամբայ,

Այն ատեն տեսաւ ¹⁷զայն ու ¹⁸յայտնեց, Հաստատեց զայն, նաեւ ¹⁹քննեց զայն,

Եւ մարդուն ըսաւ. “Ահա՛ Տէրոջ վախն է իմաստութիւնը, Ու չարութենէ հեռանալն է խելացութիւնը”»։