Job 29

Esther  «  Job 28  ‹  Job 29  ›  Job 30  »  Psalm

ՅՈԲԻ ՎԵՐՋԻՆ ՓԱՍՏԱՐԿՈՒԹԻՒՆԸ

Յոբ շարունակելով իր առակը՝ ըսաւ.

«Երանի՜ թէ վաղեմի ամիսներուն պէս, Աստուծոյ զիս պահպանած օրերուն պէս ըլլայի,

Երբ անոր ճրագը իմ գլուխիս վրայ կը շողար Ու ես խաւարի մէջ անոր լոյսով կը քալէի.

Ինչպէս ¹երիտասարդութեանս օրերը, Երբ Աստուծոյ մտերմութիւնը իմ վրանիս մէջ էր.

Երբ Ամենակարողը տակաւին ինծի հետ էր, Եւ տղաներս իմ շուրջս էին.

Երբ ²ոտքերս կոգիով կը լուայի, Ու վէմը ինծի համար իւղի առուներ կը ³հոսեցնէր.

Երբ դուրս կ’ելլէի՝ դէպի քաղաքին դուռը, Եւ աթոռս հրապարակին մէջ կը ⁴դնէի,

Երիտասարդները զիս տեսնելով կը պահուըտէին, Տարեցներն ալ ոտքի կ’ելլէին ու կը կայնէին.

Իշխանաւորները խօսելէն կը դադրէին, Եւ իրենց ձեռքը իրենց բերանին վրայ կը դնէին.

Առաջնորդները իրենց ձայնը կը ⁵կտրէին, Անոնց լեզուն իրենց քիմքին կը փակչէր։

Ինծի մտիկ ընող ականջը երանելի կը կոչէր զիս, Ու զիս տեսնող աչքը կը վկայէր ինծի համար.

Որովհետեւ ես աղաղակող դժբախտը, Որբը եւ օգնութիւն չունեցողը կ’ազատէի։

Կորսուողին օրհնութիւնը վրաս կու գար, Ու այրիին սիրտը կը ցնծացնէի։

Արդարութիւն կը հագնէի, եւ ան ⁶իմ հանդերձս էր՝՝. Իրաւունքը պարեգօտի ու խոյրի պէս էր ինծի։

Կոյրին աչքերն էի, Իսկ կաղին՝ ոտքերը.

Աղքատին հայրն էի, ⁷Անծանօթին իրաւունքը կը ⁸պաշտպանէի.

Անիրաւին ժանիքը կը կոտրտէի, Եւ անոր ակռաներէն որսը կը խլէի

Ուստի կ’ըսէի. “Բոյնիս մէջ շունչս պիտի տամ, Օրերս աւազի պէս պիտի շատցնեմ։

Արմատս դէպի ջուրերը պիտի ⁹տարածուի, Ցօղը ոստերուս վրայ պիտի գիշերէ.

Փառքս իմ մէջս պիտի վերանորոգուի, Եւ աղեղս ձեռքիս մէջ պիտի վերահաստատուի”։

Մարդիկ ինծի մտիկ կ’ընէին ու կը սպասէին, Կը լռէին՝ իմ խորհուրդս ստանալու համար.

Իմ խօսելէս ետք՝ անոնք չէին հակաճառեր։ Խօսքս անոնց վրայ կը կաթէր.

Անձրեւի սպասելու պէս՝ ինծի կը սպասէին, Եւ վերջին անձրեւին փափաքելու պէս՝ իրենց բերանը կը բանային։

Եթէ անոնց ժպտէի՝ չէին հաւատար, Ու երեսիս լոյսը չէին ¹⁰արհամարհեր։

Անոնց ճամբան ընտրելով՝ իբր գլխաւոր կը նստէի, Իր գունդին մէջ եղող թագաւորի մը պէս կը բնակէի, Սգաւորները մխիթարողի պէս»։