Job 32

Esther  «  Job 31  ‹  Job 32  ›  Job 33  »  Psalm

ԵՂԻՈՒՍԻ ԽՕՍՔԸ (32. 1-37. 24)

Այն ատեն այս երեք մարդիկ Յոբի պատասխանելէն դադրեցան, քանի ան իր աչքերուն արդար կ’երեւնար։

Բայց ¹Արամի գերդաստանէն Բուզացի Բարաքիէլի որդիին՝ Եղիուսի բարկութիւնը բորբոքեցաւ։ Անոր բարկութիւնը Յոբի դէմ բորբոքեցաւ, որովհետեւ ինքզինք Աստուծմէ աւելի արդար կը սեպէր։

Նաեւ իր բարկութիւնը բորբոքեցաւ անոր երեք բարեկամներուն դէմ, որովհետեւ պատասխան գտած չէին, թէեւ Յոբը դատապարտեցին։

Եղիուս Յոբի խօսքերուն վերջանալուն սպասած էր, որովհետեւ անոնք իրմէ տարիքոտ էին։

Բայց երբ Եղիուս տեսաւ թէ այդ երեք մարդոց բերանը ա՛լ պատասխան չկար, իր բարկութիւնը բորբոքեցաւ։

Այն ատեն Բուզացի Բարաքիէլի որդին՝ Եղիուս պատասխանեց. «Ես ²տարիքով փոքր եմ, իսկ դուք՝ աւելի տարեց. Հետեւաբար սոսկացի, ու գիտցածս ձեզի պարզելու վախցայ։

Ըսի. “³Երկար կեանքը՝՝ թող խօսի, Ու տարիներուն շատութիւնը թող գիտցնէ իմաստութիւնը”։

Բայց մարդուն մէջ հոգի կայ, Եւ Ամենակարողին ներշնչումը անոնց խելք կու տայ։

Մեծերը միշտ իմաստուն չեն, Ո՛չ ալ ծերերը իրաւունքը կը հասկնան։

Ուստի կ’ըսեմ. “Մտի՛կ ըրէ ինծի, Որպէսզի ես ալ գիտցածս պարզեմ”։

Ահա՛ ես ձեր խօսքերուն սպասեցի, Ձեր փաստարկութիւնները ունկնդրեցի՝ Մինչեւ որ ⁴քննեցիք անոր խօսքերը։

Ձեզի լաւ ⁵ուշադրութիւն դարձուցի՝՝, Բայց ահա՛ ձեզմէ ո՛չ մէկը Յոբը ⁶համոզեց Եւ անոր խօսքերուն պատասխանեց։

Մի՛ ըսէք. “Իմաստութիւն գտանք. Աստուած է որ կրնայ յաղթել անոր, ո՛չ թէ մարդը”։

Ան իր խօսակցութիւնը ինծի ⁷չուղղեց, Ես ալ ձեր խօսքերով անոր պիտի չպատասխանեմ։

Անոնք զարհուրեցան, ա՛լ չպատասխանեցին. Անոնց խօսքերը ⁸դադրեցան։

Սպասեցի՝ մինչեւ որ ա՛լ բան մը չըսին, Մունջ կեցան, եւ ա՛լ ⁹չհակաճառեցին։

Ուստի ե՛ս ալ իմ կարգիս պիտի պատասխանեմ, Ե՛ս ալ իմ գիտցածս պիտի պարզեմ։

Արդարեւ խօսքերով լեցուն եմ, Իմ ¹⁰ներսս եղած հոգին ¹¹զիս կը ստիպէ՝՝։

Ահա՛ փորս չբացուած գինիի պէս է. Նոր տիկերու պէս՝ պիտի ճեղքուի։

Պիտի խօսիմ՝ որպէսզի հանգստանամ, Շրթունքս պիտի բանամ ու պատասխանեմ։

Ուրեմն ո՛չ մէկուն աչառութիւն պիտի ընեմ, Ո՛չ մէկը պիտի ¹²շողոքորթեմ,

Քանի չեմ գիտեր շողոքորթել. Իմ Արարիչս շուտով զիս պիտի վերցնէր»։