Job 34

Esther  «  Job 33  ‹  Job 34  ›  Job 35  »  Psalm

Եղիուս իր խօսքը շարունակելով՝ ըսաւ.

«Ո՛վ իմաստուններ, մտի՛կ ըրէք խօսքերս, Եւ դո՛ւք, ո՛վ գիտուններ, ունկնդրեցէ՛ք ինծի,

Քանի ականջը խօսքերը կը քննէ, Ինչպէս քիմքը կերակուրը կը համտեսէ։

Ընտրե՛նք մեզի իրաւունքը, Գիտնա՛նք մեր մէջ թէ ի՛նչն է լաւը։

Արդարեւ Յոբ ըսաւ. “Ես արդար եմ, Բայց Աստուած իմ իրաւունքս կը ¹զլանայ։

Միթէ իրաւունքիս դէ՞մ պիտի ստեմ. Իմ ²վէրքս մահաբեր է, թէեւ յանցանք չունիմ”։

Յոբի պէս ³մարդ ո՞վ կայ, Որ ⁴հայհոյութիւնը ջուրի պէս խմէ.

Ան անօրէնութիւն գործողներուն ընկերակցութեամբ կ’ուղեւորի, Եւ ամբարիշտ մարդոց հետ կը քալէ,

Որովհետեւ ըսաւ. “⁵Մարդուն անօգուտ է՝՝ Աստուծոյ հաճելի ըլլալ”։

Հետեւաբար մտի՛կ ըրէք ինծի, ո՛վ ⁶խելացի մարդիկ. Հեռո՛ւ Աստուծմէ՝ ամբարշտութիւնը, Եւ Ամենակարողէն՝ անիրաւութիւնը։

Որովհետեւ ան մարդուն արարքներուն համեմատ կը հատուցանէ, Իւրաքանչիւրին՝ իր ուղիին համեմատ գտնել կու տայ։

Անկասկած Աստուած ամբարշտութիւն չի գործեր, Ամենակարողը իրաւունքը չի ծռեր։

Ո՞վ երկիրը անոր յանձնեց, Ո՞վ ամբողջ երկրագունդին վրայ զայն նշանակեց։

Եթէ ⁷մտադրէր Իր հոգին եւ իր շունչը ⁸վերցնել,

Ամէն մարմին ⁹հաւասարապէս շունչը կու տար, Մարդն ալ հողին կը վերադառնար։

Եթէ հասկացողութիւն ունիս՝ սա՛ մտիկ ըրէ, Ունկնդրէ՛ խօսքերուս ձայնը.—

Միթէ իրաւունքը ատողը կրնա՞յ իշխել. Կամ թէ կրնա՞ս դատապարտել Արդարը, Հզօրը,

¹⁰Ան՝ որ թագաւորին կ’ըսէ. “¹¹Անօրէ՛ն”, Եւ ազնուականներուն. “Ամբարի՛շտ”.

Ան՝ որ իշխանաւորներուն աչառութիւն չ’ըներ, Ու հարուստը չքաւորէն չի ¹²զանազաներ, Որովհետեւ անոնք բոլորն ալ իր ձեռքերուն գործն են։

Մէկ վայրկեանի մէջ պիտի մեռնին. Կէս գիշերին՝ ժողովուրդը սասանելով պիտի ¹³անհետանայ. Հզօրները պիտի վերցուին՝ առանց մէկու մը ձեռքին դպչելուն։

Արդարեւ Աստուծոյ աչքերը մարդուն ճամբաներուն վրայ են, Անոր բոլոր քայլերը կը տեսնեն.

Ո՛չ խաւար կայ եւ ո՛չ մահուան շուք՝ Որ անօրէնութիւն գործողները հոն պահուըտին.

Պէտք չունի մարդը երկար ատեն ¹⁴քննելու՝ Որպէսզի ան Աստուծոյ առջեւ դատաստանի երթայ։

Առանց պրպտումի՝ հզօրները կը կոտրէ, Եւ անոնց տեղը ուրիշներ կը ¹⁵դնէ։

Արդարեւ անոնց գործերը գիտէ. Գիշերուան մէջ զանոնք տակնուվրայ կ’ընէ, ու կը ճզմուին։

Անոնց ամբարիշտ ըլլալուն համար՝ ¹⁶Բոլորին առջեւ՝՝ զանոնք կը զարնէ,

Որովհետեւ իրեն հետեւելէն հեռացան Եւ իր ճամբաներէն ո՛չ մէկուն ¹⁷ուշադրութիւն դարձուցին՝՝.

Այնպէս որ չքաւորին աղաղակը իրեն հասցուցին, Ու դժբախտներուն աղաղակը լսեց։

Եթէ ինք հանդարտ մնայ, Ո՞վ պիտի դատապարտէ. Եթէ երեսը ծածկէ, Ո՞վ զինք պիտի նշմարէ։ Այսպէս կը վարուի թէ՛ ազգի մը, թէ՛ մարդու մը հետ,

Որպէսզի կեղծաւոր մարդը չթագաւորէ, Ու ժողովուրդին որոգայթ չըլլայ։

Անշո՛ւշտ եթէ Աստուծոյ ¹⁸ըսես. “Պատիժ կրեցի, ա՛լ չարիք չեմ գործեր.

Ինծի ցուցո՛ւր ինչ որ չեմ տեսներ. Եթէ անիրաւութիւն գործեցի, ա՛լ չեմ գործեր”,

Արդեօք ¹⁹քու կարծիքիդ համաձայն՝՝ պիտի ²⁰պատժէ՞, որ կը մերժես անոր դատաստանը։ Արդարեւ դո՛ւն ընտրելու ես, ո՛չ թէ ես. Ուրեմն ինչ որ գիտես՝ ըսէ՛։

Խելացի մարդիկը ինծի հետ պիտի ըսեն. (Նաեւ իմաստուն ²¹մարդը՝ որ ինծի մտիկ կ’ընէ.)

“Յոբ գիտնալով չխօսեցաւ, Եւ անոր խօսքերը ուշիմութեամբ չեն”։

Կը փափաքիմ որ Յոբ ընդմիշտ փորձարկուի, Քանի անօրէն մարդոց ²²պէս պատասխանեց.

Արդարեւ իր մեղքին վրայ ²³ապստամբութիւն կ’աւելցնէ, Մեր մէջ ծափ կը զարնէ, Եւ Աստուծոյ դէմ իր խօսքերը կը շատցնէ»։