Job 40

Esther  «  Job 39  ‹  Job 40  ›  Job 41  »  Psalm

Տէրը Յոբի խօսելով՝ ըսաւ.

«Ամենակարողին հետ վիճողը զի՞նք պիտի ¹խրատէ. ²Աստուծոյ հետ վիճաբանողը՝՝ թող պատասխանէ»։

Այն ատեն Յոբ Տէրոջ պատասխանելով՝ ըսաւ.

«Ահա՛ ես ³նուաստ եմ. քեզի ի՞նչ պատասխանեմ. Ձեռքս բերանիս վրայ կը դնեմ։

Մէկ անգամ խօսեցայ, ա՛լ պիտի չպատասխանեմ. Երկու անգամ ալ, բայց պիտի չշարունակեմ»։

Այն ատեն Տէրը մրրիկին մէջէն պատասխանելով Յոբի՝ ըսաւ.

«Հիմա մէ՛ջքդ կապէ՝ զօրաւոր մարդու պէս. Քեզի հարցնեմ, եւ բացատրէ՛ ինծի։

Իմ դատավճի՞ռս պիտի բեկանես. Զի՞ս պիտի դատապարտես՝ քեզ արդարացնելու համար։

Բազուկ ունի՞ս Աստուծոյ պէս. Ձայնովդ կրնա՞ս անոր պէս որոտալ։

Հիմա զարդարուէ՛ մեծափառութեամբ ու բարձրութեամբ, Հագի՛ր պատիւ եւ փառաւորութիւն։

Տարածէ՛ բարկութեանդ ցասումը, Նայէ՛ ամէն ամբարտաւանի ու նուաստացո՛ւր զայն.

Նայէ՛ ամէն ամբարտաւանի եւ ընկճէ՛ զայն, Ամբարիշտները կոխկռտէ՛ իրենց տեղը։

Թաղէ՛ զանոնք միասին հողին մէջ, Փաթթէ՛ անոնց երեսը պահուած տեղի մը մէջ։

Այն ատեն ես ալ քեզի կը խոստովանիմ Թէ աջ ձեռքդ կրնայ քեզ ազատել։

⁴Դիտէ՛ ⁵գետաձին, որ քեզի հետ ⁶ստեղծեցի. Ան արջառի պէս խոտ կ’ուտէ։

⁷Տե՛ս. անոր ոյժը իր մէջքին մէջ է, Եւ կորովը՝ փորին ⁸մկաններուն մէջ։

Մայրիի պէս ամուր պոչը կը ծռէ. Ազդրերը ջիղերով հիւսուած են։

Ոսկորները ⁹պղինձէ խողովակներ՝՝ են, Անդամները՝ երկաթէ ձողերու պէս։

Ան Աստուծոյ ¹⁰գործերուն ¹¹սկիզբն է. Զայն ¹²ստեղծողը ¹³իր սուրը կրնայ անոր մօտեցնել՝՝։

Արդարեւ լեռները անոր կեր կը բերեն, Հոն՝ ուր բոլոր դաշտի գազանները կը զբօսնին։

Ան ստուերոտ ծառերուն տակ կը պառկի, Եղէգներուն ու ճահիճներուն ծածկոյթին մէջ։

Ստուերոտ ծառերը իրենց շուքով կը ծածկեն զայն, Վտակներուն ուռիները զինք կը շրջապատեն։

¹⁴Եթէ գետը խուժէ, ան իրար չ’անցնիր. Թէեւ Յորդանան մը անոր երախին մէջ խոյանայ, ան ապահով է։

Միթէ ան աչքերէն կը բռնուի՞. ¹⁵Ո՞վ կրնայ անոր քիթը ծակել որոգայթի մէջ՝՝»։