John 7

Luke  «  John 6  ‹  John 7  ›  John 8  »  Acts

ՅԻՍՈՒՍ ԵՒ ԻՐ ԵՂԲԱՅՐՆԵՐԸ

Ասկէ ետք Յիսուս կը շրջէր Գալիլեայի մէջ, քանի որ չէր ուզեր շրջիլ Հրէաստանի մէջ, որովհետեւ Հրեաները կը ջանային սպաննել զինք։

Հրեաներուն Տաղաւարներու տօնը մօտ էր.

ուստի իր եղբայրները ըսին իրեն. «Մեկնէ՛ ասկէ ու գնա՛ Հրէաստան, որպէսզի աշակերտնե՛րդ ալ տեսնեն քու գործերդ՝ որ կ’ընես։

Որովհետեւ ո՛չ մէկը գաղտնի կ’ընէ որեւէ բան, երբ կը ջանայ բացորոշապէս ճանչցնել ինքզինք. եթէ կ’ընես այդ բաները, դուն քեզ բացայայտէ՛ աշխարհի»։

Քանի որ իր եղբայրներն ալ չէին հաւատար իրեն։

Յիսուս ըսաւ անոնց. «Իմ ժամանակս դեռ հասած չէ, բայց ձեր ժամանակը պատրաստ է ամէն ատեն։

Աշխարհը չի կրնար ատել ձեզ, բայց կ’ատէ զիս, որովհետեւ ես կը վկայեմ անոր մասին թէ իր գործերը չար են։

Դո՛ւք բարձրացէք այս տօնին. ես (դեռ) չեմ բարձրանար այս տօնին, որովհետեւ ժամանակս դեռ լրացած չէ»։

Ասիկա ըսելով անոնց՝ ինք մնաց Գալիլեա։

Բայց երբ իր եղբայրները բարձրացան, ի՛նքն ալ բարձրացաւ տօնին. ո՛չ թէ բացայայտօրէն, հապա՝ գաղտնի։

ՅԻՍՈՒՍ՝ ՏԱՂԱՒԱՐՆԵՐՈՒ ՏՕՆԻՆ

Իսկ Հրեաները կը փնտռէին զինք տօնին ատենը, ու կ’ըսէին. «Ո՞ւր է ան»։

Բազմութեան մէջ շատ տրտունջ կար անոր մասին։ Ոմանք կ’ըսէին. «Բարի մարդ է»։ Ուրիշներ կ’ըսէին. «Ո՛չ, այլ ընդհակառակը՝ բազմութի՛ւնը կը մոլորեցնէ»։

Սակայն ո՛չ մէկը բացորոշապէս կը խօսէր անոր մասին՝ Հրեաներու վախէն։

Իսկ երբ տօնը կէս եղաւ՝ Յիսուս բարձրացաւ տաճարը, եւ կը սորվեցնէր։

Հրեաները կը զարմանային ու կ’ըսէին. «Ի՞նչպէս ասիկա գիտէ ¹Գիրքերը, քանի բնա՛ւ սորված չէ զանոնք»։

Յիսուս պատասխանեց անոնց. «Իմ ուսուցումս՝ ի՛մս չէ, հապա զիս ղրկողի՛նն է։

Եթէ մէկը ուզէ գործադրել անոր կամքը, պիտի գիտնայ թէ այս ուսուցումը Աստուծմէ՛ է, թէ ես ինձմէ կը խօսիմ։

Ա՛ն որ կը խօսի ինքնիրմէ՝ կը փնտռէ ի՛ր իսկ փառքը, բայց ա՛ն որ կը փնտռէ զինք ղրկողին փառքը՝ անիկա՛ ճշմարտախօս է, եւ անոր քով անիրաւութիւն չկայ։

Մովսէս չտուա՞ւ ձեզի Օրէնքը. բայց ձեզմէ ո՛չ մէկը կը գործադրէ Օրէնքը։

Ինչո՞ւ կը ջանաք սպաննել զիս»։ Բազմութիւնը պատասխանեց. «Դե՛ւ կայ քու ներսդ. ո՞վ կը ջանայ սպաննել քեզ»։

Յիսուս պատասխանեց անոնց. «Գործ մը ըրի, եւ բոլորդ ալ կը զարմանաք։

Մովսէս տուաւ ձեզի թլփատութիւնը, (որ ո՛չ թէ Մովսէսէ էր՝ հապա նախնիքներէն,) ու մարդ կը թլփատէք Շաբաթ օրը։

Եթէ մարդ կը թլփատուի Շաբաթ օրը՝ որպէսզի Մովսէսի Օրէնքը չլուծուի, կը դառնանա՞ք ինծի դէմ՝ որ ամբողջ մարդ մը բժշկեցի Շաբաթ օրը։

Մի՛ դատէք երեւոյթին համեմատ, հապա դատեցէք արդարութեա՛մբ»։

Ի՞ՆՔՆ Է ՄԵՍԻԱՆ

Ուստի Երուսաղեմացիներէն ոմանք կ’ըսէին. «Ասիկա չէ՞ ան՝ որ կը ջանան սպաննել։

Ահա՛ համարձակօրէն կը խօսի, ու ոչինչ կ’ըսեն անոր. միթէ պետերը գիտցա՞ն թէ ճշմա՛րտապէս ա՛յս է Քրիստոսը։

Սակայն մենք գիտե՛նք թէ ասիկա ուրկէ՛ է. բայց երբ Քրիստոս գայ, ո՛չ մէկը պիտի գիտնայ անոր ուրկէ՛ ըլլալը»։

Իսկ Յիսուս՝ սորվեցնելու ատեն՝ տաճարին մէջ աղաղակեց. «Զի՛ս ալ կը ճանչնաք, եւ ուրկէ՛ ըլլալս ալ գիտէք։ Ես ինձմէ եկած չեմ, հապա ա՛ն որ ղրկեց զիս՝ ճշմարիտ է։ Դուք չէք ճանչնար զայն.

բայց ես կը ճանչնամ զայն, որովհետեւ ես անկէ եմ, եւ ա՛ն ղրկեց զիս»։

Ուստի կը ջանային ձերբակալել զինք. բայց ո՛չ մէկը ձեռք բարձրացուց իր վրայ, որովհետեւ իր ժամը դեռ հասած չէր։

Բազմութենէն շատեր հաւատացին իրեն, ու կ’ըսէին. «Երբ Քրիստոս գայ, միթէ աւելի՞ նշաններ պիտի ընէ՝ քան անոնք որ ասիկա ըրաւ»։

ՍՊԱՍԱՒՈՐՆԵՐ ՂՐԿՈՒԵՑԱՆ՝ ՅԻՍՈՒՍԸ ՁԵՐԲԱԿԱԼԵԼՈՒ

Փարիսեցիները լսեցին բազմութեան այս տրտունջը անոր մասին. եւ Փարիսեցիներն ու քահանայապետները սպասաւորներ ղրկեցին՝ որպէսզի ձերբակալեն զայն։

Իսկ Յիսուս ²ըսաւ. «Քիչ մը ժամանակ ալ ձեզի հետ եմ, ապա կ’երթամ անոր՝ որ ղրկեց զիս։

Դուք պիտի փնտռէք զիս՝ բայց պիտի չգտնէք, եւ չէք կրնար գալ իմ եղած տեղս»։

Ուրեմն Հրեաները ըսին իրարու. «Ո՞ւր պիտի երթայ, որ մենք պիտի չգտնենք զինք. միթէ ³հեթանոսներուն մէջ ցրուածներո՞ւն պիտի երթայ, եւ հեթանոսներո՞ւն պիտի սորվեցնէ։

Ի՞նչ է այն խօսքը՝ որ ըսաւ. “Դուք պիտի փնտռէք զիս բայց պիտի չգտնէք, եւ չէք կրնար գալ իմ եղած տեղս”»։

ԿԵՆԱՐԱՐ ՋՈՒՐԻ ԳԵՏԵՐ

Տօնին վերջին մեծ օրը՝ Յիսուս կայնած էր ու կ’աղաղակէր. «Եթէ մէկը ծարաւ է, թող գայ ինծի եւ խմէ։

Ա՛ն որ հաւատայ ինծի, կենարար ջուրի գետեր պիտի բխին անոր փորէն, ինչպէս Գիրքը կ’ըսէ»։

Ասիկա ըսաւ Հոգիին մասին՝ որ իրեն հաւատացողները պիտի ընդունէին. որովհետեւ Սուրբ Հոգին տրուած չէր տակաւին, քանի որ Յիսուս փառաւորուած չէր տակաւին։

ԲԱԺԱՆՈՒՄ ԺՈՂՈՎՈՒՐԴԻՆ ՄԷՋ

Բազմութենէն շատեր՝ երբ լսեցին այս խօսքը՝ կ’ըսէին. «Ճշմա՛րտապէս ա՛յս է մարգարէն»։

Ուրիշներ կ’ըսէին. «Ա՛յս է Քրիստոսը»։ Ուրիշներ ալ կ’ըսէին. «Միթէ Քրիստոս Գալիլեայէ՞ն պիտի գայ։

Միթէ Գիրքը չ’ը՞սեր թէ Քրիստոս պիտի գայ Դաւիթի զարմէն ու Դաւիթի եղած գիւղէն՝ Բեթլեհէմէն»։

Ուստի պառակտում եղաւ բազմութեան մէջ՝ անոր պատճառով։

Անոնցմէ ոմանք ուզեցին ձերբակալել զայն, բայց ո՛չ մէկը ձեռք բարձրացուց անոր վրայ։

ՀՐԵԱՅ ՀԵՂԻՆԱԿՈՒԹԻՒՆՆԵՐՈՒ ԱՆՀԱՒԱՏՈՒԹԻՒՆԸ

Ուստի սպասաւորները եկան քահանայապետներուն եւ Փարիսեցիներուն քով, որոնք ըսին անոնց. «Ինչո՞ւ հոս չբերիք զայն»։

Սպասաւորները պատասխանեցին. «Ո՛չ մէկը երբե՛ք խօսած է այս մարդուն պէս»։

Ուստի Փարիսեցիները պատասխանեցին անոնց. «Միթէ դո՞ւք ալ մոլորեցաք։

Պետերէն կամ Փարիսեցիներէն մէ՛կը հաւատա՞ց անոր.

բայց այս բազմութիւնը՝ որ չի գիտեր Օրէնքը՝ անիծեալ է»։

Նիկոդեմոս ըսաւ անոնց, (որ նախապէս՝ գիշերուան մէջ գացեր էր իրեն, եւ անոնցմէ մէկն էր.)

«Միթէ մեր Օրէնքը կը դատէ՞ մարդ մը, եթէ նախապէս չլսէ զայն, եւ չգիտնայ թէ ի՛նչ կ’ընէ»։

Պատասխանեցին անոր. «Միթէ դո՞ւն ալ Գալիլեայէն ես. զննէ՛ ու նայէ՛, որ Գալիլեայէն մարգարէ չ’ելլեր»։

Ապա իւրաքանչիւրը գնաց իր տունը։