Jonah 1

Obadiah  «  Obadiah 1  ‹  Jonah 1  ›  Jonah 2  »  Micah

ՅՈՎՆԱՆԻ ԱՆՀՆԱԶԱՆԴՈՒԹԻՒՆԸ

Տէրոջ խօսքը Ամաթիի որդիին՝ Յովնանի ¹ուղղուեցաւ՝ ըսելով.

«Կանգնէ՛, գնա՛ Նինուէ մեծ քաղաքը, եւ գոչէ՛ անոր դէմ, քանի որ անոնց չարութիւնը իմ առջեւս բարձրացաւ»։

Բայց Յովնան կանգնեցաւ որ Տէրոջ ներկայութենէն Թարսիս փախչի։ Յոպպէ իջաւ, ու նաւ մը գտաւ՝ որ Թարսիս կ’երթար. անոր վարձքը վճարեց եւ անոր մէջ մտաւ, որպէսզի անոնց հետ Թարսիս երթայ՝ Տէրոջ ներկայութենէն հեռու։

Սակայն Տէրը ծովուն մէջ մեծ հով մը ²ղրկեց. ծովուն մէջ այնպիսի մեծ մրրիկ մը եղաւ, որ նաւը ³փշրուելու վտանգին մէջ էր՝՝։

Նաւաստիները վախցան, եւ իւրաքանչիւրը իր աստուծոյն աղաղակեց. ապա նաւուն մէջի առարկաները ծովը նետեցին, որպէսզի զայն անոնցմէ թեթեւցնեն. իսկ Յովնան նաւուն ⁴խորշը իջնելով պառկած էր, ու խորունկ կը քնանար։

Ուստի նաւապետը անոր մօտեցաւ եւ անոր ըսաւ. «Քեզի ի՞նչ եղաւ, ո՛վ խորունկ քնացող. կանգնէ՛, գոչէ՛ քու Աստուծոյդ. թերեւս Աստուած մեր վրայ մտածէ, ու չկորսուինք»։

Յետոյ իրարու ըսին. «Եկէ՛ք, վիճա՛կ ձգենք, որպէսզի գիտնանք թէ այս չարիքը որո՞ւն պատճառով մեր վրայ հասաւ»։ Երբ վիճակ ձգեցին, վիճակը Յովնանի ելաւ։

Ուստի անոնք իրեն ըսին. «Հիմա իմացո՛ւր մեզի՝ թէ այս չարիքը որո՞ւն պատճառով մեր վրայ հասաւ։ Քու գործդ ի՞նչ է, եւ ուրկէ՞ կու գաս. քու երկիրդ ո՞րն է, ու դուն ո՞ր ժողովուրդէն ես»։

Ինք ալ անոնց պատասխանեց. «Ես Եբրայեցի եմ, եւ ծովն ու ցամաքը ⁵ստեղծող երկինքի Աստուածը՝ Եհովան կը ⁶պաշտեմ»։

Այդ մարդիկը չափազանց վախցան, եւ իրեն ըսին. «Այդ բանը ինչո՞ւ ըրիր»։ Արդարեւ այդ մարդիկը գիտցան թէ Տէրոջ ներկայութենէն կը փախչէր, որովհետեւ անոնց պատմեր էր։

Ուստի անոր ըսին. «Քեզի ի՞նչ ընենք, որ ծովը մեզի համար հանդարտի», քանի ծովը ⁷հետզհետէ ⁸կ’ալեկոծէր։

Ինք ալ անոնց պատասխանեց. «Զիս վերցուցէ՛ք ու ծո՛վը նետեցէք, եւ ծովը ձեզի համար պիտի հանդարտի, քանի որ ես գիտեմ թէ այս մեծ մրրիկը իմ պատճառովս ձեր վրայ հասաւ»։

Սակայն այդ մարդիկը ջանացին ⁹թիավարելով նաւը ցամաքը վերադարձնել. բայց չկրցան, որովհետեւ ծովը հետզհետէ կ’ալեկոծէր իրենց դէմ։

Ուստի Եհովայի գոչեցին եւ ըսին. «Ո՜հ, Եհովա՛, կ’աղերսե՛նք, այս մարդուն կեանքին համար մեզ մի՛ կորսնցներ, ու մեր վրայ անմեղ արիւն մի՛ դներ. արդարեւ դո՛ւն, ո՛վ Եհովա, իրագործեցիր ինչ որ փափաքեցար»։

Յետոյ Յովնանը վերցուցին եւ ծովը նետեցին, ծովն ալ իր ¹⁰մոլեգնութենէն հանդարտեցաւ՝՝։

Այդ մարդիկը Եհովայէն չափազանց վախցան. ուստի Եհովայի զոհ մատուցանեցին եւ ուխտեր ըրին։

Տէրը մեծ ձուկի մը ¹¹հրահանգեց, որ Յովնանը կլլէ. Յովնան երեք օր ու երեք գիշեր ձուկին ¹²փորը մնաց։