Jonah 4
Obadiah « Jonah 3 ‹ Jonah 4 › Micah 1 » Micah
ՅՈՎՆԱՆԻ ԲԱՐԿՈՒԹԻՒՆԸ ԵՒ ԱՍՏՈՒԾՈՅ ԳՈՒԹԸ
1Յովնան չափազանց դժգոհեցաւ ու բորբոքեցաւ։
2Ուստի Տէրոջ աղօթելով ըսաւ. «Ո՜հ, Տէ՛ր, միթէ ասիկա չէ՞ր ինչ որ կ’ըսէի, երբ դեռ իմ երկիրս էի. ասոր համար 1նախապէս Թարսիս փախայ։ Արդարեւ գիտէի թէ դուն ողորմած, գթած, համբերատար եւ շատ կարեկից Աստուած ես, ու չարիքէն կը հրաժարիս։
3Հետեւաբար հիմա, ո՛վ Տէր, կ’աղերսե՛մ, իմ կեանքս ա՛ռ ինձմէ, քանի որ ինծի համար աւելի լաւ է մեռնիլ՝ քան ապրիլ»։
4Տէրը պատասխանեց. «Միթէ լա՞ւ է այդպէս բորբոքիլդ»։
5Յովնան քաղաքէն դուրս ելաւ, ու քաղաքին արեւելեան կողմը մնաց. հոն իրեն տաղաւար մը շինեց եւ անոր հովանիին տակ նստաւ, մինչեւ որ տեսնէ թէ ի՛նչ պիտի պատահի քաղաքին։
6Տէր Աստուած 2տզենիի մը 3հրահանգեց որ Յովնանի վրայ բարձրանայ եւ անոր գլուխին վրայ հովանի ըլլայ, որպէսզի զայն իր վատ վիճակէն ազատէ։ Յովնան տզենիին համար մեծապէս ուրախացաւ։
7Հետեւեալ օրը՝ արշալոյսին՝ Աստուած ճճիի մը հրահանգեց որ տզենին 4կրծէ. ան ալ չորցաւ։
8Երբ արեւը կը ծագէր, Աստուած խորշակաբեր արեւելեան հովի մը հրահանգեց, եւ արեւը Յովնանի գլուխին զարկաւ. ան ալ խամրեցաւ, ինքնիրեն 5փափաքեցաւ մեռնիլ, եւ ըսաւ. «Ինծի համար աւելի լաւ է մեռնիլ՝ քան ապրիլ»։
9Աստուած Յովնանի ըսաւ. «Միթէ լա՞ւ է այդպէս բորբոքիլդ՝ տզենիին համար»։ Ան ալ պատասխանեց. «Լաւ է մեռնելու աստիճան բորբոքիլս»։
10Այն ատեն Տէրը ըսաւ. «Դուն տզենիին վրայ խղճացիր, որուն համար չաշխատեցար ու զայն չաճեցուցիր. ան մէ՛կ գիշերուան մէջ 6բուսաւ, եւ մէ՛կ գիշերուան մէջ փճացաւ։
11Հապա ես պիտի չխղճա՞մ Նինուէի՝ այդ մեծ քաղաքին վրայ, որուն մէջ հարիւր քսան հազարէն աւելի մարդիկ կան՝ որոնք չեն կրնար իրենց աջ ձեռքը 7զատորոշել ձախ ձեռքէն, նաեւ շատ անասուններ»։