Lamentations 1

Jeremiah  «  Jeremiah 52  ‹  Lamentations 1  ›  Lamentations 2  »  Ezekiel

ԵՐՈՒՍԱՂԷՄԻ ՑԱՒԵՐԸ

Ի՜նչպէս միայնակ կը բնակի բազմամարդ քաղաքը. Ազգերուն մէջ մեծ եղողը՝ այրիի պէս եղաւ, Գաւառներուն մէջ իշխանուհի եղողը՝ հարկատու եղաւ։

Գիշերը անդադար կու լայ, եւ իր արցունքները այտերուն վրայ են։ Անոր բոլոր հոմանիներէն զինք մխիթարող չկայ. Անոր բոլոր բարեկամները իրեն անհաւատարիմ եղան, իր թշնամիները եղան։

Յուդա տառապանքի ու ¹տաժանելի ստրկութեան համար տարագրուեցաւ. Հեթանոսներուն մէջ կը բնակի, հանգստութիւն չի գտներ։ Անոր բոլոր հալածիչները իր տագնապներուն մէջ անոր վրայ հասան։

Սիոնի ճամբաները սուգ կը պահեն, քանի որ ո՛չ մէկը կու գայ հանդիսաւոր տօներուն. Անոր բոլոր դռները ամայացած են, անոր քահանաները կը հառաչեն. Անոր կոյսերը կը տրտմին, եւ ինք դառնացած է։

Անոր հակառակորդները գլխաւոր եղան, անոր թշնամիները անդորր են, Որովհետեւ ²Տէրը զինք տրտմեցուց իր բազմաթիւ յանցանքներուն համար. Անոր երախաները թշնամիին առջեւէն գերի գացին։

Սիոնի աղջիկէն իր ամբողջ վայելչութիւնը ³գնաց. Անոր իշխանաւորները արօտ չգտնող եղջերուներու պէս եղան, Որոնք հալածողին առջեւէն առանց ոյժի կ’երթան։

Երուսաղէմ իր տառապանքի ու թշուառութեան օրերուն մէջ յիշեց Վաղեմի օրերուն իր ունեցած բոլոր ցանկալի բաները, Երբ իր ժողովուրդը թշնամիին ձեռքը ինկաւ, եւ ո՛չ մէկը իրեն օգնեց։ Հակառակորդները զայն տեսան ու անոր կործանումին վրայ ծիծաղեցան։

Երուսաղէմ ծանրապէս մեղանչեց, հետեւաբար ⁴կեղտոտութիւն եղաւ. Բոլոր զայն պատուողները զինք արհամարհեցին, որովհետեւ իր մերկութիւնը տեսան. Ինք ալ հառաչեց ու ⁵կռնակ դարձուց՝՝։

Անոր անմաքրութիւնը իր փէշերուն վրայ էր. ան իր ⁶վախճանին մասին չէր մտածեր՝՝։ Իր ⁷անկումը զարմանալի՝՝ եղաւ. մխիթարիչ չունեցաւ։ «Ո՛վ Տէր, նայէ՛ իմ տառապանքիս, քանի որ թշնամին ⁸հպարտացաւ»։

Հակառակորդը ձեռքը երկարեց անոր բոլոր ցանկալի բաներուն, Քանի տեսաւ թէ հեթանոսները իր սրբարանին մէջ մտան, Որոնց համար դուն հրամայեր էիր որ քու համախմբումիդ մէջ չմտնեն։

Անոր ամբողջ ժողովուրդը հաց փնտռելէն հառաչեց. Իրենց անձը վերանորոգելու համար՝ իրենց ցանկալի բաները կերակուրի փոխարէն տուին։ «Տե՛ս, ո՛վ Տէր, ու նկատէ՛ թէ անարգ եղայ»։

«Միթէ հոգ չէ՞ք ըներ, ո՛վ բոլոր ճամբայէն անցնողներ. Նայեցէ՛ք ու տեսէ՛ք թէ արդեօք այն կոտտանքին պէս կոտտանք կա՞յ՝ որ ⁹իմ վրաս հասաւ՝՝, Որովհետեւ Տէրը զիս տրտմեցուց իր բորբոքած բարկութեան օրը։

Բարձրէն իմ ոսկորներուս կրակ ղրկեց, եւ ան տիրապետեց անոնց. Ոտքերուս առջեւ ցանց տարածելով ¹⁰ինծի ընկրկիլ տուաւ՝՝. Զիս ամայացուց, ամբողջ օրը ուժաթափ թողուց։

Իմ յանցանքներուս լուծը անոր ձեռքով կապուեցաւ. Անոնք ¹¹միացան ու վիզիս վրայ ելան։ Իմ ոյժս ¹²կոտրեց. Տէրը զիս այնպիսի ձեռքերու մատնեց, որ անոնցմէ չեմ կրնար ¹³ազատիլ։

Տէրը իմ մէջս եղող բոլոր հզօրներս տապալեց. Իմ երիտասարդներս ջախջախելու համար ինծի դէմ համայնք մը կանչեց. Տէրը Յուդայի կոյս աղջիկը հնձանի մէջ կոխեց։

Ասոնց համար կու լամ. ¹⁴աչքերս արցունք կը հոսեցնեն՝՝. Արդարեւ ինձմէ հեռացաւ մխիթարիչը՝ որ իմ անձս պիտի վերանորոգէր. Իմ որդիներս ¹⁵նուաղեցան, որովհետեւ թշնամին զօրաւոր եղաւ»։

Սիոն իր ձեռքերը տարածեց, բայց ո՛չ մէկը զինք կը մխիթարէ. Տէրը հրամայեց ¹⁶որ Յակոբի՝՝ հակառակորդները զինք շրջապատեն. Երուսաղէմ անոնց մէջ կեղտոտութիւն եղաւ։

Տէրը արդար է, քանի որ անոր ¹⁷հրամանին դէմ ընդվզեցայ։ Ուրեմն մտիկ ըրէ՛ք, ո՛վ բոլոր ժողովուրդներ, եւ տեսէ՛ք իմ կոտտանքս. Իմ կոյսերս ու երիտասարդներս գերութեան գացին,

Իմ հոմանիներս կանչեցի, սակայն անոնք զիս խաբեցին. Իմ քահանաներս եւ երէցներս քաղաքին մէջ իրենց շունչը տուին, Մինչ իրենց համար կերակուր կը փնտռէին՝ իրենց անձը վերանորոգելու համար։

Ո՛վ Տէր, նայէ՛, քանի որ տագնապեցայ. ընդերքս խռովեցաւ. Սիրտս տակնուվրայ եղաւ ներսս, որովհետեւ ¹⁸չափազանց ընդվզեցայ. Դուրսը՝ սուրը զիս զաւակներէ զրկեց, իսկ ներսը մահ կայ։

Իմ հառաչանքս լսեցին, բայց ո՛չ մէկը զիս կը մխիթարէ. Իմ ձախորդութիւնս լսելով՝ բոլոր թշնամիներս բերկրեցան որ ասիկա իրագործեցիր։ ¹⁹Որոշած օրդ պիտի բերես, եւ անոնք ինծի պէս պիտի ըլլան։

Անոնց ամբողջ չարութիւնը քու առջեւդ թող հասնի, Ու վարուէ՛ անոնց հետ այնպէս՝ ինչպէս վարուեցար ինծի հետ՝ իմ բոլոր յանցանքներուս համար. Արդարեւ իմ հառաչանքներս շատ են, եւ սիրտս ուժաթափ է»։