Malachi 2

Zechariah  «  Malachi 1  ‹  Malachi 2  ›  Malachi 3  »  Matthew

«Հիմա սա՛ պատուէրը ձեզի է, ո՛վ քահանաներ.—

Եթէ մտիկ չընէք, Եթէ ¹չմտածէք Իմ անունիս փառք տալ,— կը յայտարարէ զօրքերու Տէրը,— Ձեզի անէծք պիտի ղրկեմ, Ու ձեր օրհնութիւնները պիտի անիծեմ։ Այո՛, զանոնք արդէն անիծած եմ, Քանի որ դուք չէք մտածեր։

Ահա՛ ես ձեր զարմը պիտի սաստեմ. Ձեր երեսին վրայ թրիք պիտի ցանեմ, Ձեր տօներուն զոհերուն թրիքը, Որ ձեզ անոր հետ տանին։

Այն ատեն պիտի գիտնաք թէ ե՛ս ձեզի ղրկեցի այս պատուէրը, Որպէսզի իմ ուխտս Ղեւիի հետ գոյատեւէ,— կը յայտարարէ զօրքերու Տէրը։—

Իրեն հետ կնքած ուխտս կեանքի ու խաղաղութեան համար էր. Զանոնք իրեն տուի այն երկիւղին փոխարէն՝ Որով ինձմէ կը վախնար Եւ իմ ²անունէս կը զարհուրէր։

Ճշմարտութեան օրէնքը անոր բերանին մէջ էր, Ու անոր շրթունքին վրայ անիրաւութիւն չգտնուեցաւ. Ինծի հետ խաղաղութեամբ եւ ուղղամտութեամբ կ’ընթանար, Ու շատերը անօրէնութենէ ³հեռացուց։

Արդարեւ քահանային շրթունքը Աստուծոյ ճանաչումը պահելու է, Մարդիկ անոր բերանէն օրէնքը փնտռելու են, Քանի որ ան զօրքերու Տէրոջ պատգամաւորն է։

Բայց դուք ճամբայէն շեղեցաք. Շատերը օրէնքին պատճառով գայթակղեցուցիք, Ղեւիի ուխտը ապականեցիք.— կը յայտարարէ զօրքերու Տէրը։—

Ուստի ես ալ ձեզ ամբողջ ժողովուրդին առջեւ արհամարհեցի ու նուաստացուցի, Քանի որ դուք իմ ճամբաներս չպահեցիք, Եւ օրէնքին կիրարկումին մէջ աչառութիւն ըրիք»։

ԺՈՂՈՎՈՒՐԴԻՆ ԱՆՀԱՒԱՏԱՐՄՈՒԹԻՒՆԸ

Միթէ բոլորս մէկ հայր չունի՞նք, Միթէ մէկ Աստուած չստեղծե՞ց մեզ. Ինչո՞ւ իրարու հանդէպ անհաւատարիմ ենք՝ Մեր հայրերուն ուխտը դրժելով։

Յուդա անհաւատարիմ եղաւ, Իսրայէլի մէջ ու Երուսաղէմի մէջ գարշութիւն գործուեցաւ. Որովհետեւ Յուդա պղծեց Տէրոջ սիրած ⁴սրբարանը՝ Ամուսնանալով օտար աստուծոյ մը աղջիկին հետ։

Տէրը Յակոբի վրաններէն պիտի բնաջնջէ ասիկա ընող մարդը, ⁵Արթուն եղողն ու պատասխանողը՝՝, Եւ զօրքերու Տէրոջ ընծայ մատուցանողը։

⁶Դարձեալ՝ սա՛ կ’ընէք.— Տէրոջ զոհասեղանը արցունքներով, Լացով ու հեծեծանքով կը ծածկէք, ⁷Որովհետեւ ան ա՛լ ⁸ուշադրութիւն չի դարձներ ընծային, Որ զայն ձեր ձեռքէն բարեհաճութեամբ ընդունի։

Ուստի կ՛ըսէք. “Ինչո՞ւ”։ ” Քանի որ Տէրը վկայ է քու եւ երիտասարդութեանդ կնոջ միջեւ, Որուն անհաւատարիմ եղար, Թէպէտ ան ընկերակցուհիդ եւ ուխտիդ կինն էր։

Միթէ Աստուած մէկ մարմին չըրա՞ւ ա՛ն՝ որ Հոգիին մնացորդը ունէր. Եւ ինչո՞ւ մէկ.— որ ⁹փնտռէ Աստուծոյ զարմը։ Ուրեմն ուշադի՛ր եղէք ձեր հոգիին. Ո՛չ մէկը թող անհաւատարիմ ըլլայ իր երիտասարդութեան կնոջ։

Արդարեւ Տէրը՝ Իսրայէլի Աստուածը կը յայտարարէ թէ Ինք կ’ատէ կին արձակելը. «Ատիկա իր հանդերձով բռնութիւնը ծածկել է», կը յայտարարէ զօրքերու Տէրը։ Ուստի ուշադի՛ր եղէք ձեր հոգիին, եւ անհաւատարիմ մի՛ ըլլաք։

ԴԱՏԱՍՏԱՆԻՆ ՕՐԸ ՄՕՏԱԼՈՒՏ Է

Ձեր խօսքերով Տէրը ¹⁰ձանձրացուցիք, Բայց դուք կ’ըսէք. “Ի՞նչպէս ձանձրացուցինք”։ ” Երբ կ՛ըսէք. “Ամէն չարիք ընող՝ Տէրոջ աչքերուն բարի է, Եւ ինք անոնց կը հաճի”. Կամ. “Ո՞ւր է ¹¹արդարութեան Աստուածը”։