Malachi 3

Zechariah  «  Malachi 2  ‹  Malachi 3  ›  Malachi 4  »  Matthew

«Ահա՛ ես իմ պատգամաւորս կը ղրկեմ, Եւ իմ առջեւս ճամբայ պիտի պատրաստէ։ Ձեր փնտռած Տէրը, այսինքն Ուխտին հրեշտակը՝ որուն կը բաղձաք, Յանկարծ իր տաճարը պիտի գայ. Ահա՛ կու գայ», կը յայտարարէ զօրքերու Տէրը։

Ո՞վ պիտի կարենայ ¹տոկալ անոր գալուստին օրը, Ո՞վ պիտի գոյատեւէ երբ ան երեւնայ. Որովհետեւ զտողին կրակին պէս պիտի ըլլայ, Ու ²թափիչներուն օճառին պէս։

Ան պիտի բազմի իբր արծաթ զտող եւ մաքրող, Եւ Ղեւիի որդիները պիտի մաքրէ. Զանոնք ոսկիի ու արծաթի պէս պիտի զտէ, Եւ անոնք արդարութեամբ Տէրոջ ընծայ պիտի մատուցանեն.

Այն ատեն Յուդայի ու Երուսաղէմի ընծան Տէրոջ հաճելի պիտի ըլլայ՝ ³Հին օրերուն պէս ու վաղեմի տարիներուն պէս։

«Դատաստանի համար ձեզի պիտի մօտենամ, Եւ շտապելով վկայ պիտի ըլլամ կախարդներուն ու շնացողներուն, ⁴Սուտ երդում ընողներուն, Վարձկանին վարձքը չվճարողներուն, Այրին ու որբը հարստահարողներուն, Գաղթականին իրաւունքը ծռողներուն, Ինձմէ չվախցողներուն դէմ», կը յայտարարէ զօրքերու Տէրը։

ՏԱՍԱՆՈՐԴԻՆ ՎՃԱՐՈՒՄԸ

«Արդարեւ ես ⁵Եհովան եմ, չեմ փոխուիր, Իսկ դուք չէք ⁶դադրիր Յակոբի որդիներ ըլլալէ։

Ձեր հայրերուն օրերէն ի վեր Իմ կանոններէս շեղեցաք ու զանոնք չպահեցիք։ Վերադարձէ՛ք ինծի, ես ալ ձեզի պիտի վերադառնամ,— կը յայտարարէ զօրքերու Տէրը։— Սակայն դուք կ’ըսէք. “Ի՞նչպէս վերադառնանք”։

” Միթէ մարդ Աստուած կը կողոպտէ՞. Սակայն դուք զիս կողոպտեցիք, Ու կ’ըսէք. “Քեզմէ ի՞նչ կողոպտեցինք”. ” Տասանորդներ եւ բարձրացնելիք ընծաներ։

Դուք անէծքով ⁷պատժուած էք, Որովհետեւ կողոպտեցիք զիս՝ ամբողջ ազգով։

Գանձատո՛ւնը բերէք բոլոր տասանորդները, Որպէսզի իմ տանս մէջ ⁸կերակուր ըլլայ։ Ուրեմն փորձարկեցէ՛ք զիս ասով,— կը յայտարարէ զօրքերու Տէրը,— Թէ արդեօք ձեզի պիտի չբանա՞մ երկինքի ⁹սահանադռները Ու ձեր վրայ օրհնութիւն թափեմ, Այնքան շատ՝ որ բաւական տեղ չըլլայ։

Լափող միջատը պիտի սաստեմ ձեր սիրոյն համար, Որ ձեր գետինին պտուղը չփճացնէ Ու ձեր դաշտին մէջ որթատունկը ¹⁰անպտուղ չըլլայ,— կը յայտարարէ զօրքերու Տէրը։—

Բոլոր ազգերը երանելի պիտի կոչեն ձեզ, Քանի որ դուք բաղձալի երկիր պիտի ըլլաք», կը յայտարարէ զօրքերու Տէրը։

ԱՍՏՈՒԱԾ ՆԵՐՈՒՄ ԿԸ ԽՈՍՏԱՆԱՅ

«Ձեր խօսքերը ինծի դէմ խիստ եղան,— կը յայտարարէ Տէրը.— Բայց դուք կ’ըսէք. “Քեզի դէմ ի՞նչ խօսեցանք”։

Դուք ըսիք. “Ընդունայն է Աստուած պաշտելը. Ի՞նչ շահ կայ անոր հրահանգը պահելէն Ու զօրքերու Տէրոջ առջեւ սուգով ընթանալէն։

Հիմա մենք հպարտները երանելի կը կոչենք. Ամբարշտութիւն գործողներն անգամ ¹¹բարգաւաճ են, Նոյնիսկ Աստուած կը փորձեն եւ կ’ազատին”»։

Այն ատեն Տէրոջմէ վախցողները Իրարու հետ խօսեցան, Տէրն ալ ուշադիր եղաւ ու լսեց, Եւ իր առջեւ յիշատակի գիրք գրուեցաւ՝ Տէրոջմէ վախցողներուն համար, Անոր անունին մասին մտածողներուն համար։

«Անոնք իմս պիտի ըլլան,— կը յայտարարէ զօրքերու Տէրը,— Այն օրը երբ սեփական ժողովուրդս հաւաքեմ. Անոնց պիտի խնայեմ, Ինչպէս մարդ մը կը խնայէ իր որդիին՝ Որ իրեն կը ծառայէ։

Այն ատեն դարձեալ պիտի ¹²նկատէք տարբերութիւնը Արդարին եւ ամբարիշտին, ¹³Աստուծոյ ծառայողին՝՝ Եւ անոր չծառայողին»։