Micah 2

Jonah  «  Micah 1  ‹  Micah 2  ›  Micah 3  »  Nahum

ԱՂՔԱՏԸ ՏԱՌԱՊԵՑՆՈՂՆԵՐՈՒՆ ՃԱԿԱՏԱԳԻՐԸ

Վա՜յ անոնց, որ անօրէնութիւն կը մտածեն, Իրենց անկողինին վրայ չարիք կը պատրաստեն, Եւ առտուան լոյսին ատենը զայն կը գործադրեն, Քանի որ իրենց ձեռքերուն մէջ զօրութիւն կայ։

Անոնք արտերու կը ցանկան ու զանոնք կը յափշտակեն, Նաեւ տուներու, եւ զանոնք կը բռնագրաւեն. ¹Մարդն ու իր տունը, Մարդը եւ իր ժառանգութիւնը կը հարստահարեն։

Հետեւաբար Տէրը սա՛ կը յայտարարէ. «Ահա՛ ես այս գերդաստանին դէմ չարիք մը կը մտածեմ, Որմէ պիտի չկարենաք ձեր վիզը հեռացնել, Ո՛չ ալ գոռոզութեամբ պիտի քալէք, Որովհետեւ ժամանակը չար է։

Այդ օրը ²ձեզ նշաւակ պիտի ընեն՝՝, Ողբալից եղերերգութեամբ պիտի սգան եւ ըսեն. “Բոլորովին բնաջնջուեցանք. Իմ ժողովուրդիս բաժինը փոխեց, Զայն ի՜նչպէս ինձմէ հեռացուց. Մեր արտերը վերադարձնելու փոխարէն՝ բաժնեց”։

Հետեւաբար Տէրոջ համախմբումին մէջ Ո՛չ մէկը պիտի ունենաս՝ որ վիճակի մը վրայ լար քաշէ։

Մարգարէացողներուն կ’ըսեն. “Մի՛ մարգարէանաք”. Եթէ անոնց չմարգարէանան, նախատինքը ³պիտի չհեռանայ՝՝։

Ո՛վ Յակոբի տուն ⁴կոչուող, միթէ Տէրոջ Հոգին ⁵տկարացա՞ւ. Ասո՞նք են անոր արարքները. Միթէ իմ խօսքերս բարիք չե՞ն ըներ ուղղամտութեամբ ընթացողին։

Իմ ժողովուրդս ⁶առաջուընէ ոտքի ելաւ իբր թշնամի. Երբ պատերազմէն վերադարձողները ապահովութեամբ անցնին, Հանդերձներուն ⁷վրայէն պատմուճանը կը կողոպտէք։

Իմ ժողովուրդիս կիները իրենց վայելած տուներէն կը վռնտէք. Անոնց երախաներէն իմ փառաւորութիւնս կ’առնէք յաւիտենապէս։

Կանգնեցէ՛ք ու գացէ՛ք, Քանի որ ասիկա հանգստավայր չէ. Պիղծ ըլլալուն պատճառով՝ Մեծ ⁸կործանումով պիտի բնաջնջուի։

Եթէ հովի ու կեղծիքի մէջէն ընթացող մարդ մը Ստէ՝ ըսելով. “Գինիի եւ օղիի համար քեզի պիտի մարգարէանամ”, Անիկա՛ պիտի ըլլայ այս ժողովուրդին մարգարէն։

Ո՜վ Յակոբ, ձեզ բոլորդ անշուշտ պիտի հաւաքեմ. Իսրայէլի մնացորդը պիտի հաւաքեմ, Բոսրայի ոչխարներուն պէս ⁹պիտի մէկտեղեմ՝՝, Իրենց արօտավայրին մէջ եղող հօտերուն պէս. Մարդոց բազմութեան համար դղրդիւն պիտի ըլլայ։

Խրամատ բացողը անոնց առջեւէն բարձրացաւ. Անոնք խրամատ բացին, դռնէն անցան եւ անկէ դուրս ելան։ Անոնց թագաւորը անոնց առջեւ անցած է, Ու Տէրը անոնց գլուխն է»։