Micah 3

Jonah  «  Micah 2  ‹  Micah 3  ›  Micah 4  »  Nahum

ՄԻՔԻԱՅԻ ԱԶԴԱՐԱՐՈՒԹԻՒՆԸ ԻՍՐԱՅԷԼԻ ԻՇԽԱՆՆԵՐՈՒՆ

Ես ըսի. «Այժմ մտի՛կ ըրէք, ո՛վ Յակոբի գլխաւորները, Եւ դո՛ւք, Իսրայէլի տան մեծաւորները. Պարտաւոր չէ՞ք իրաւունքը ճանչնալ,

Դո՛ւք՝ որ բարիքը կ’ատէք ու չարիքը կը սիրէք, ¹Մարդոց վրայէն իրենց մորթը կը ²խլէք, եւ անոնց ոսկորներուն վրայէն՝ իրենց միսը.

Նաեւ իմ ժողովուրդիս միսը կ’ուտէք, Եւ անոնց վրայէն իրենց մորթը կը հանէք»։ Անոնց ոսկորները կը կոտրտեն, Զանոնք կը կտրատեն կաթսայի մէջ ու եփարանի մէջ եփուելիք միսի պէս։

Ուստի Տէրոջ պիտի աղաղակեն, Բայց անոնց պիտի չպատասխանէ. Այդ ատեն իր երեսը անոնցմէ պիտի ծածկէ, Որովհետեւ անոնք չարիք գործեցին իրենց արարքներով։

Տէրը սա՛ կը յայտարարէ այն մարգարէներուն մասին՝ Որոնք իմ ժողովուրդս կը մոլորեցնեն. «Երբ իրենց ակռաներով բան մը խածնեն՝ Խաղաղութիւն կը յայտարարեն, Սակայն ո՛վ որ իրենց բերանը բան չդնէ՝ Անոր դէմ պատերազմ կը ³պատրաստեն։

Հետեւաբար գիշեր պիտի ունենաք Առանց տեսիլքի, ⁴Խաւար պիտի ունենաք՝՝ Առանց դիւթութեան. Արեւը մայր պիտի մտնէ մարգարէներուն վրայ, Օրը պիտի խաւարի անոնց վրայ։

Տեսանողները պիտի ամչնան, Դիւթերը պիտի շիկնին. Բոլորն ալ իրենց պեխը պիտի ծածկեն, Որովհետեւ Աստուծմէ պատասխան մը պիտի չըլլայ»։

Բայց Տէրոջ Հոգիով՝ Ես լեցուած եմ կարողութեամբ, ⁵արդարութեամբ ու քաջութեամբ, Որպէսզի Յակոբի յայտնեմ իր յանցանքը, Եւ Իսրայէլի՝ իր մեղքը։

Այժմ սա՛ մտիկ ըրէք, Ո՛վ Յակոբի տան գլխաւորները Եւ Իսրայէլի տան մեծաւորները, Դուք որ կը գարշիք իրաւունքէն, Կը ծռէք ամէն ինչ որ ուղիղ է,

Արիւններով կը կառուցանէք Սիոնը, Եւ անիրաւութեամբ՝ Երուսաղէմը։

Անոր գլխաւորները կաշառքով կը դատեն, Անոր քահանաները ⁶վճարումով կը սորվեցնեն, Անոր մարգարէները դրամով կը դիւթեն, Ու Տէրոջ ⁷կ’ապաւինին՝ ըսելով. «Միթէ Տէրը մեր մէջ չէ՞. Մեր վրայ չարիք պիտի չգայ»։

Ուրեմն ձեր պատճառով Սիոն արտի պէս պիտի հերկուի, Երուսաղէմ աւերակի շեղջ պիտի ըլլայ, Եւ ⁸տաճարին լեռը՝ անտառի բարձունքներուն պէս։