Micah 4

Jonah  «  Micah 3  ‹  Micah 4  ›  Micah 5  »  Nahum

ՏԷՐՈՋ ՏԻԵԶԵՐԱԿԱՆ ԹԱԳԱՒՈՐՈՒԹԵԱՆ ԽԱՂԱՂՈՒԹԻՒՆԸ

Բայց վերջին օրերը Տէրոջ տան լեռը՝ Լեռներուն գագաթը պիտի հաստատուի, Բլուրներէն վեր պիտի բարձրանայ, Ու ժողովուրդները ¹հոն պիտի խուժեն՝՝։

Շատ ազգեր պիտի երթան եւ ըսեն. «Եկէ՛ք, ելլե՛նք Եհովայի լեռը, Յակոբի Աստուծոյն տունը, Որպէսզի մեզի սորվեցնէ իր ճամբաները Եւ քալենք անոր ուղիներուն մէջ»։ Արդարեւ օրէնքը Սիոնէն պիտի ելլէ, Ու Տէրոջ խօսքը՝ Երուսաղէմէն.

Անիկա շատ ժողովուրդներու մէջ պիտի դատէ, Հզօր ազգերը՝ մինչեւ հեռաւոր տեղերը՝ պիտի յանդիմանէ։ Ու անոնք իրենց սուրերէն խոփեր պիտի դարբնեն, Եւ իրենց նիզակներէն՝ յօտոցներ։ Ազգ ազգի վրայ սուր պիտի չվերցնէ, Եւ ա՛լ պատերազմիլ պիտի չսորվին.

Հապա իւրաքանչիւրը պիտի նստի իր որթատունկին տակ Ու իր թզենիին տակ, Եւ ո՛չ մէկը զինք պիտի դողացնէ. Որովհետեւ զօրքերու Տէրոջ բերանը խօսեցաւ։

Արդարեւ բոլոր ժողովուրդներէն Իւրաքանչիւրը իր աստուծոյն անունով կ’ընթանայ, Բայց մենք ²դարէ դար՝՝ Տէրոջ՝ մեր Աստուծոյն անունով պիտի ընթանանք։

ԻՍՐԱՅԷԼ ՊԻՏԻ ՎԵՐԱԴԱՌՆԱՅ ԱՔՍՈՐԷՆ

«Այդ օրը,— կը պատգամէ Տէրը,— կաղը պիտի հաւաքեմ, Աքսորուածը պիտի հաւաքեմ, Նաեւ ան՝ ³որ տրտմեցուցի՝՝։

Կաղը՝ մնացորդ պիտի ընեմ, Հեռուն վռնտուածը՝ հզօր ազգ։ Տէրը Սիոն լերան վրայ պիտի թագաւորէ անոնց վրայ, Հիմա եւ յաւիտեան»։

Իսկ դո՛ւն, ո՛վ հօտի աշտարակ, Սիոնի աղջիկին բլուրը, Քեզի պիտի գայ, Քեզի պիտի հասնի նախկին տէրութիւնը, Ու Երուսաղէմի աղջիկին՝ թագաւորութիւնը։

Հիմա ինչո՞ւ կը գոչես, Միթէ քու մէջդ թագաւոր չկա՞յ. Կամ քու խորհրդականդ կորսուեցա՞ւ, Որ քեզ ծննդաբերող կնոջ պէս երկունքի ցաւը համակեց։

Երկունքի ցա՛ւ քաշէ ու ծննդաբերող կնոջ պէս ⁴հառաչէ՛, ո՛վ Սիոնի աղջիկ, Քանի որ հիմա քաղաքէն պիտի ելլես Եւ դաշտի մէջ պիտի բնակիս, Ու մինչեւ Բաբելոն պիտի երթաս Եւ հոն պիտի ազատիս. Հոն Տէրը քեզ պիտի փրկէ քու թշնամիներուդ ձեռքէն։

Հիմա քեզի դէմ շատ ազգեր հաւաքուեցան, որոնք կ’ըսեն. «Ան թող պղծուի, Ու մեր աչքերը Սիոնը թող տեսնեն»։

Բայց անոնք Տէրոջ մտածումները չեն գիտեր, Եւ անոր ծրագիրը չեն հասկնար, Քանի որ ի՛նք զանոնք կը հաւաքէ՝ ինչպէս որաները կալին մէջ կը հաւաքուին։

Կանգնէ՛ ու ծեծէ՛ կալը, ո՛վ Սիոնի աղջիկ, Որովհետեւ քու եղջիւրդ ⁵երկաթի պիտի վերածեմ՝՝, Քու կճղակներդ պղինձի պիտի վերածեմ, Ու շատ ժողովուրդներ պիտի ճզմես։ Անոնց վաստակը Եհովայի պիտի նուիրեմ, Եւ անոնց գոյքերը՝ ամբողջ երկրի Տէրոջ։