Proverbs 2
Psalm « Proverbs 1 ‹ Proverbs 2 › Proverbs 3 » Ecclesiastes
ԻՄԱՍՏՈՒԹԵԱՆ ՎԱՐՁԱՏՐՈՒԹԻՒՆԸ
1Որդեա՛կս, եթէ իմ խօսքերս ընդունիս Եւ պատուիրաններս քովդ պահես,
2Որպէսզի ականջդ իմաստութեան ուշադիր ըլլայ Ու սիրտդ հանճարին բանաս,
3Եթէ դուն խելացութիւնը քեզի կանչես Եւ ձայնդ հանճարին 1ուղղես,
4Եթէ զայն արծաթի պէս փնտռես Ու պահուած գանձերու պէս խնդրես,
5Այն ատեն Տէրոջ վախը պիտի հասկնաս Եւ Աստուծոյ գիտութիւնը պիտի գտնես։.
6Արդարեւ իմաստութիւնը Տէ՛րը կու տայ, Գիտութիւնն ու հանճարը անո՛ր բերանէն են։
7Ան ուղիղներուն 2խոհականութիւն կը վերապահէ. Ինք է պարկեշտութեամբ ընթացողներուն վահանը,
8Որպէսզի իրաւունքի ուղիները պաշտպանէ Եւ իր բարեպաշտներուն ճամբան պահէ։
9Այն ատեն արդարութիւնը, իրաւունքը եւ ուղղամտութիւնը, Ամէն լաւ արահետ պիտի հասկնաս։
10Երբ իմաստութիւնը քու սիրտիդ մէջ մտնէ Եւ գիտութիւնը քու անձիդ հաճելի ըլլայ,
11Մտախոհութիւնը քեզ պիտի պահէ Ու հանճարը քեզ պիտի պաշտպանէ.
12Որպէսզի քեզ ազատէ չար մարդուն ճամբայէն, Նենգութիւններ խօսող մարդէն,
13Անոնցմէ՝ որոնք ուղղամտութեան ուղիները լքեր են, Որպէսզի խաւար ճամբաներու մէջ քալեն.
14Անոնք չարիք ընելով կ’ուրախանան, Ու չարին նենգութիւններով կը խայտան.
15Անոնց ուղիները ծուռ են, Եւ իրենց արահետը խարդախ է։
16Որպէսզի քեզ ազատէ օտար կնոջմէն, Շողոքորթութիւն խօսող օտարազգիէն,
17Որ իր երիտասարդութեան մտերիմը կը լքէ Ու իր Աստուծոյն ուխտը կը մոռնայ.
18Արդարեւ անոր տունը մահուան կը 3տանի, Եւ անոր արահետները՝ ուրուականներուն.
19Անոր գացողներէն ո՛չ մէկը կը վերադառնայ, Ո՛չ ալ կեանքի ուղիներուն կը հասնի։
20Որպէսզի բարի մարդոց ճամբան երթաս, Եւ արդարներուն ուղիները պահես.
21Արդարեւ ուղիղնե՛րը երկրի վրայ պիտի բնակին, Ու պարկեշտնե՛րը անոր մէջ պիտի մնան,
22Բայց ամբարիշտները երկրէն պիտի բնաջնջուին, Եւ անհաւատարիմները անկէ պիտի խլուին։