Proverbs 4
Psalm « Proverbs 3 ‹ Proverbs 4 › Proverbs 5 » Ecclesiastes
ԻՄԱՍՏՈՒԹԵԱՆ ՕԳՈՒՏՆԵՐԸ
1Որդինե՛ր, լսեցէ՛ք ձեր հօր խրատը, Եւ ուշադի՛ր եղէք՝ որպէսզի խելացութիւնը գիտնաք.
2Որովհետեւ ձեզի լաւ կրթութիւն կու տամ, Իմ 1ուսուցումս մի՛ լքէք։
3Արդարեւ ես իմ հօրս որդին էի, Փափուկ եւ մէկ հատիկ՝ իմ մօրս առջեւ։
4Անիկա ինծի կը սորվեցնէր ու կ’ըսէր. «Քու սիրտդ իմ խօսքերս թող պահէ, Իմ պատուիրաններս պահէ եւ ապրի։
5Իմաստութի՛ւն ստացիր, խելացութի՛ւն ստացիր. Մի՛ մոռնար, ու մի՛ շեղիր բերանիս խօսքերէն։
6Մի՛ լքեր զայն, եւ ան քեզ պիտի պահէ. Սիրէ՛ զայն, եւ ան քեզ պիտի պաշտպանէ։
7Գլխաւոր բանը իմաստութիւնն է. իմաստութի՛ւն ստացիր, Ու բոլոր 2վաստկածներուդ հետ խելացութի՛ւն ստացիր։
8Զայն մեծարէ՛, եւ ան քեզ պիտի բարձրացնէ. Եթէ զայն գրկես, քեզ պիտի պատուէ։
9Ան քու գլուխիդ շնորհքի ծաղկեպսակ պիտի դնէ. Քեզի շքեղ թագ պիտի յանձնէ»։
10Մտի՛կ ըրէ, որդեա՛կս, եւ ընդունէ՛ խօսքերս, Ու կեանքիդ տարիները պիտի շատնան։
11Քեզի քալել սորվեցուցի իմաստութեան ճամբային մէջ, Քեզ 3առաջնորդեցի ուղղամտութեան արահետներուն մէջ,
12Որպէսզի քալելու ատենդ ոտքիդ քայլերը 4չկաշկանդուին, Եւ վազելու ատենդ չգայթիս։
13Ամո՛ւր բռնէ խրատը, ու բնաւ մի՛ թողուր. Պահէ՛ զայն, որովհետեւ ա՛ն է քու կեանքդ։
14Ամբարիշտներուն ճամբայէն մի՛ երթար, Ու չարերուն ուղիին մէջ մի՛ քալեր.
15Անկէ խուսափէ՛, անոր քովէն մի՛ անցնիր. Անկէ շեղէ՛ եւ 5հեռացի՛ր.
16Որովհետեւ անոնք մինչեւ որ չարիք չընեն՝ չեն քնանար, Ու եթէ մէկը 6չտապալեն՝ իրենց քունը կը փախչի։
17Արդարեւ անոնք ամբարշտութեան հացը կ’ուտեն, Եւ բռնութեան գինին կը խմեն.
18Բայց արդարներուն ուղին պայծառացող լոյսին պէս է, Որ հետզհետէ կը 7շողայ՝ մինչեւ որ 8կատարեալ օր ըլլայ։
19Ամբարիշտներուն ճամբան մթութեան պէս է, Ու չեն գիտեր թէ ի՛նչպէս պիտի գայթին։
20Որդեա՛կս, ուշադի՛ր եղիր իմ հրահանգներուս, Դարձո՛ւր ականջներդ իմ խօսքերուս։
21Անոնք քու աչքերուդ առջեւէն թող չհեռանան, Պահէ՛ զանոնք սիրտիդ մէջ.
22Որովհետեւ անոնք կեանք են զիրենք գտնողներուն, Եւ առողջութիւն՝ անոնց ամբողջ մարմինին։
23Պահէ՛ սիրտդ ամբողջ զգուշութեամբ, Քանի որ կեանքի 9աղբիւրները անկէ են։
24Մեկուսացո՛ւր քեզմէ ծուռ բերանը, Հեռացո՛ւր քեզմէ խարդախ շրթունքը։
25Քու աչքերդ դիմացը թող նային, Ու կոպերդ ուղղէ՛ դէպի առջեւդ։
26Ոտքերուդ արահետները 10քննէ՛, Եւ բոլոր ճամբաներդ թող հաստատուին։
27Աջ կամ ձախ կողմ մի՛ շեղիր, Ոտքդ չարութենէն հեռացո՛ւր։