Proverbs 19

Psalm  «  Proverbs 18  ‹  Proverbs 19  ›  Proverbs 20  »  Ecclesiastes

Աւելի լաւ է իր պարկեշտութեան մէջ ընթացող թշուառը, Քան ծուռ շրթունք ունեցող անմիտը։

Նաեւ լաւ չէ անձի մը տգիտութիւնը, Ու ոտքերով փութացողը կը ¹սահի։

Մարդուն յիմարութիւնը անոր ճամբան կ’եղծանէ, Եւ իր սիրտը Տէրոջ դէմ կը բարկանայ։

Փարթամութիւնը շատ բարեկամներ կ’աւելցնէ, Իսկ չքաւորը իր բարեկամէն կը զատուի։

²Սուտ վկան անպարտ պիտի չմնայ, Ու սուտեր արտաբերողը պիտի չազատի։

Շատերը ³առատաձեռն մարդուն՝՝ ⁴շնորհքը կը խնդրեն՝՝, Եւ ամէն մարդ պարգեւ տուողին բարեկամ կ’ըլլայ։

Թշուառին բոլոր եղբայրները զինք կ’ատեն. Ո՜րչափ աւելի անոր բարեկամները իրմէ կը հեռանան։ Զանոնք կը հետապնդէ իր խօսքերով, բայց անոնք չեն գտնուիր։

⁵Խելք ստացողը իր անձը կը սիրէ. ⁶Իմաստութիւնը պահողը բարիք պիտի գտնէ։

Սուտ վկան անպարտ պիտի չմնայ, Ու սուտեր արտաբերողը պիտի կորսուի։

Անմիտին քնքշութիւն չի վայլեր. Ո՜րչափ աւելի ստրուկի մը՝ իշխանաւորներու վրայ տիրել։

Մարդուն ուշիմութիւնը իր բարկութիւնը կը յետաձգէ, Եւ անոր պարծանքն է յանցանքը անտեսելը։

Թագաւորին բարկութիւնը առիւծի կորիւնի ⁷մռնչիւնին պէս է, Իսկ անոր բարեհաճութիւնը՝ բոյսին վրայի ցօղին պէս։

Անմիտ որդին իր հօր աղէտն է, Ու կնոջ կռիւները շարունակական կաթկթոցին պէս են։

Տունն ու ստացուածքը հայրերէն մնացած ժառանգութիւն են, Բայց ուշիմ կինը Տէրոջմէն է։

Ծուլութիւնը թմբիրի մէջ կը ձգէ, Եւ թոյլ անձը պիտի անօթենայ։

Պատուիրանը պահողը իր անձը կը պահէ, Իսկ իր ճամբաները արհամարհողը պիտի մեռնի։

Չքաւորին ողորմողը՝ Տէրոջ փոխ կու տայ, Եւ ի՛նք անոր պիտի հատուցանէ։

Խրատէ՛ որդիդ՝ քանի յոյս կայ, Եւ ⁸կամակից մի՛ ըլլար անոր մահուան՝՝։

Սաստիկ ցասկոտ մարդը պատիժ կրելու է, Որովհետեւ եթէ զայն ազատես՝ վերսկսելու ես։

Լսէ՛ խրատը եւ ընդունէ՛ կրթութիւնը, Որպէսզի յետագային իմաստուն ըլլաս։

Մարդուն սիրտին մէջ շատ ծրագիրներ կան, Բայց Տէրոջ խորհուրդն է որ պիտի հաստատուուի։

⁹Մարդէն ակնկալուածը՝՝ իր կարեկցութիւնն է, Ու թշուառը ստախօսէն աւելի լաւ է։

Տէրոջ վախը կեանքի կ’առաջնորդէ. Զայն ունեցողը կուշտ կը ¹⁰հանգչի, ու ¹¹ձախորդութեան չի հանդիպիր՝՝։

Ծոյլը իր ձեռքը ամանին մէջ կը ¹²խոթէ, Բայց զայն իր բերանն անգամ չի ¹³տանիր։

Ծեծէ՛ ծաղրողը, որ միամիտը խորագէտ ըլլայ. Եթէ խելացին կշտամբես՝ գիտութիւնը պիտի հասկնայ։

Իր հայրը քայքայողն ու մայրը ¹⁴վռնտողը՝ Ամչցնող ու շիկնիլ տուող որդի մըն է։

Որդեա՛կս, հրաժարէ՛ մտիկ ընելէն այն խրատը՝ Որ քեզ իմաստութեան խօսքերէն կը մոլորեցնէ։

¹⁵Անօրէն վկան իրաւունքը կը ծաղրէ. Ամբարիշտներուն բերանը անօրէնութիւն կը կլլէ։

Ծաղրողներուն համար դատավճիռներ պատրաստուած են, Եւ անմիտներուն կռնակին համար՝ ծեծեր։