Proverbs 25

Psalm  «  Proverbs 24  ‹  Proverbs 25  ›  Proverbs 26  »  Ecclesiastes

Հետեւեալներն ալ Սողոմոնի առակներն են, որոնք Յուդայի Եզեկիա թագաւորին մարդիկը արտագրեցին.—

Աստուծոյ փառքը՝ բաները ծածկելն է, Իսկ թագաւորներուն փառքը՝ բաները հետազօտելն է։

Երկինքի բարձրութիւնն ու երկրի խորութիւնը, Նաեւ թագաւորներուն սիրտը անհետազօտելի են։

Հանէ՛ ¹խարամը արծաթէն, Եւ անկէ անօթ մը պիտի ելլէ ձուլագործին համար։

Հանէ՛ ամբարիշտը թագաւորին առջեւէն, Եւ անոր գահը արդարութեամբ պիտի հաստատուի։

Թագաւորին առջեւ մի՛ ²պարծենար, Ու մեծերուն տեղը մի՛ կենար.

Արդարեւ աւելի լաւ է որ քեզի ըսուի. «Հո՛ս բարձրացիր», Քան թէ նուաստանաս աչքերուդ տեսած ազնուականին առջեւ։

³Դատի համար շտապելով դուրս մի՛ ելլեր, Որպէսզի ընկերդ քեզ չխայտառակէ՝ Երբ վերջաւորութեան չգիտնաս ի՛նչ ընել։

Ընկերիդ հետ վարէ՛ քու դատդ, Բայց ուրիշին գաղտնիքը մի՛ յայտներ,

Որպէսզի լսողը քեզ չանպատուէ, Ու չարախօսութիւնդ ⁴անջնջելի մնայ՝՝։

Յարմարութեամբ ըսուած խօսքը՝ Արծաթով զարդարուած ոսկիէ խնձորներու կը նմանի։

Իմաստունին կշտամբանքը՝ մտիկ ընող ականջին Ոսկիէ օղ է, ու մաքուր ոսկիէ մանեակ։

Ինչպէս է ձիւնին զովութիւնը՝ հունձքի ժամանակ, Նոյնպէս է հաւատարիմ դեսպանը՝ զինք ղրկողներուն. Իր տիրոջ անձը կը վերանորոգէ։

⁵Սուտ ⁶առատաձեռնութեան վրայ պարծեցողը՝ ⁷Անանձրեւ ամպերու եւ հովի պէս է։

Համբերատարութեամբ մեծաւորը կը սիրաշահուի, Եւ անոյշ լեզուն ⁸անդամները կը կոտրէ։

Եթէ մեղր գտնես՝ կե՛ր քեզ բաւարարելու չափ, Որպէսզի ⁹չյագենաս ու զայն չփսխես։

¹⁰Յաճախ մի՛ երթար՝՝ ընկերիդ տունը, Որ քեզմէ ¹¹չձանձրանայ ու քեզ չատէ։

Իր ընկերին դէմ ¹²սուտ վկայութիւն ¹³տուողը՝ Լախտի, սուրի եւ սրուած նետի պէս է։

Տագնապի օրը անհաւատարիմ մարդու վստահիլը՝ Կոտրած ակռայի ու երերուն ոտքի ապաւինելու պէս է։

Տրտում ¹⁴մարդուն առջեւ երգեր երգողը՝ Ցուրտ օրը հագուստ հանել տուողին, Կամ բորակի վրայ քացախ թափողին կը նմանի։

Եթէ ¹⁵ոսոխդ անօթի է՝ անոր հա՛ց կերցուր, Ու եթէ ծարաւ է՝ անոր ջո՛ւր խմցուր.

Արդարեւ այսպէս ընելով՝ անոր գլուխին վրայ կրակի կայծեր պիտի դիզես, Եւ Տէրը քեզի պիտի հատուցանէ։

Հիւսիսային հովը տեղատարափներ ¹⁶կը ծնանի՝՝, Ու խոժոռ դէմքը՝ ¹⁷չարախօս լեզու։

Աւելի լաւ է տանիքի մը անկիւնը բնակիլ, Քան թէ տուն մը ¹⁸բաժնեկցիլ կռուասէր կնոջ մը հետ։

Ինչպէս է պաղ ջուրը՝ պապակած անձին, Այնպէս է հեռաւոր երկրէ եկած բարի լուրը։

Ամբարիշտ մարդուն առջեւ ¹⁹ինկող արդարը՝ Աղտոտած աղբերակի եւ ապականած աղբիւրի կը նմանի։

Շատ մեղր ուտելը լաւ չէ. Նաեւ մարդուն իր փառքը ²⁰հետապնդելը՝ փառք չէ։

Իր ոգին ²¹չզսպող մարդը՝ ²²Քանդուած եւ անպարիսպ քաղաքի պէս է։