Proverbs 28

Psalm  «  Proverbs 27  ‹  Proverbs 28  ›  Proverbs 29  »  Ecclesiastes

ԾԱՆՕԹՈՒԹԻՒՆ

Ամբարիշտը կը փախչի երբ ո՛չ մէկը զինք կը հալածէ, Իսկ արդարները առիւծի կորիւնի պէս վստահ կ’ըլլան։

Երբ երկրի մը մէջ ապստամբութիւն ըլլայ, ան բազմաթիւ իշխանաւորներ կ’ունենայ. Բայց հանդարտ վիճակ մը երկար կը տեւէ խելացի ու գիտուն մարդու մը միջոցով։

Չքաւորները հարստահարող թշուառ ¹մարդը՝ Հացի չգոյութիւն պատճառող ²հեղեղանման անձրեւի պէս է։

Օրէնքը լքողները ամբարիշտները կը գովեն, Իսկ Օրէնքը պահողները անոնց դէմ կը մաքառին։

Չար մարդիկ իրաւունքը չեն հասկնար, Բայց Տէրը փնտռողները ամէն ինչ կը հասկնան։

Աւելի լաւ է իր պարկեշտութեան մէջ ընթացող թշուառը, Քան ծուռ ճամբաներու մէջ քալող հարուստը։

Օրէնքը պահողը խելացի որդի է, Իսկ որկրամոլներուն բարեկամացողը իր հայրը կը խայտառակէ։

Իր ստացուածքը վաշխով եւ տոկոսով աւելցնողը՝ Զայն չքաւորին ողորմողին համար կը հաւաքէ։

Ան որ իր ականջը կը ³դարձնէ՝ Օրէնքը մտիկ չընելու համար, Անոր աղօթքն անգամ գարշելի է։

Ուղիղները չար ճամբայի մէջ մոլորեցնողը՝ ի՛նք պիտի իյնայ իր փոսին մէջ, Սակայն պարկեշտները բարիք պիտի ժառանգեն։

Հարուստ մարդը ⁴ինքզինք իմաստուն կը կարծէ՝՝, Բայց խելացի չքաւորը զայն կը ⁵քննէ։

Երբ արդարները հրճուին՝ մեծ պարծանք կ’ըլլայ, Իսկ երբ ամբարիշտները բարձրանան՝ մարդ կը պահուըտի։

Իր յանցանքները ծածկողը պիտի չյաջողի, Սակայն զանոնք խոստովանողն ու լքողը գթութիւն պիտի գտնէ։

Շարունակ վախցող մարդը երանելի է, Բայց իր սիրտը խստացնողը ձախորդութեան մէջ պիտի իյնայ։

Չքաւոր ժողովուրդը կառավարող ամբարիշտը՝ ⁶Մռնչող առիւծի եւ խոյացող արջի կը նմանի։

Հանճարի կարօտ առաջնորդը շատ կը հարստահարէ, Բայց ագահութիւնը ատողը իր օրերը կ’երկարէ։

⁷Արիւնապարտ մարդը մինչեւ գուբը կը փախչի. Ո՛չ մէկը ⁸անոր նեցուկ թող ըլլայ՝՝։

Պարկեշտութեամբ ընթացողը պիտի փրկուի, Իսկ ծուռ մարդը՝ որ երկու ճամբայէ կը քալէ, անոնցմէ մէկուն մէջ պիտի իյնայ։

Իր հողը մշակողը հացով պիտի կշտանայ, Բայց ⁹սնոտի բաներու հետամուտ եղողը՝՝ թշուառութեամբ պիտի լեցուի։

Հաւատարիմ մարդը առատօրէն կ’օրհնուի, Իսկ հարստանալու փութացողը ¹⁰անպատիժ պիտի չմնայ։

Աչառութիւն ընելը լաւ չէ, Որովհետեւ պատառ մը հացի համար ¹¹մարդ կրնայ յանցանք գործել։

Վատ աչք ունեցող մարդը կ’արտորայ փարթամ ըլլալ, Ու չի գիտեր թէ իր վրայ կարօտութիւն պիտի հասնի։

Մարդ կշտամբողը՝ վերջաւորութեան աւելի շնորհք կը գտնէ, Քան լեզուով շողոքորթողը։

Ա՛ն որ իր հայրը կամ մայրը կը ¹²կողոպտէ եւ կ’ըսէ. «Յանցանք չէ», Այդպիսին բնաջնջող մարդուն ընկերակիցն է։

Հպարտ ¹³սիրտ ունեցողը բանավէճ կը հրահրէ, Սակայն Տէրոջ վստահողը պիտի պարարտանայ։

Իր սիրտին վստահողը անմիտ է, Բայց իմաստութեամբ ընթացողը պիտի ազատի։

Թշուառին տուողը կարօտ չ’ըլլար, Իսկ զայն ¹⁴անտեսողը՝՝ շատ անէծք պիտի ստանայ։

Երբ ամբարիշտները բարձրանան՝ մարդիկ կը պահուըտին, Բայց երբ անոնք կորսուին՝ արդարները կը շատնան։