Proverbs 29

Psalm  «  Proverbs 28  ‹  Proverbs 29  ›  Proverbs 30  »  Ecclesiastes

Երբ յաճախ ¹կշտամբուած՝՝ մարդը իր պարանոցը խստացնէ, Յանկարծ պիտի ջախջախուի, եւ անոր դարման պիտի չըլլայ։

Եթէ արդարները բազմանան՝ ժողովուրդը կ’ուրախանայ, Բայց երբ ամբարիշտը կառավարէ՝ ժողովուրդը կը հառաչէ։

Իմաստութիւն սիրող մարդը իր հայրը կ’ուրախացնէ, Իսկ պոռնիկներուն բարեկամացողը իր ստացուածքը կը մսխէ։

Իրաւունք կիրարկելով՝ թագաւորը կը կայունացնէ իր երկիրը, Բայց ²կաշառք ստացողը զայն կը տապալէ։

Իր ընկերը շողոքորթող ³մարդը՝ Անոր քայլերուն առջեւ ցանց կը փռէ։

Չար մարդուն յանցանքին մէջ որոգայթ կայ, Իսկ արդարը ցնծութեան եւ ուրախութեան մէջ պիտի ըլլայ։

Արդարը չքաւորներուն դատին գիտակից է, Բայց ամբարիշտը ⁴տեղեակ չ’ըլլար՝՝։

Ծաղրող մարդիկ քաղաքը կը բռնկեցնեն, Իսկ իմաստունները բարկութիւնը կը կասեցնեն։

Երբ իմաստուն մարդը դատը կը պաշտպանէ յիմար մարդուն դէմ, Վրդովի թէ ծիծաղի՝ հանգիստ պիտի չըլլայ։

Արիւնահեղ մարդիկ արդարը կ’ատեն, Բայց ուղիղները անոր ⁵որպիսութիւնը կը հարցնեն՝՝։

Անմիտը իր ⁶միտքը բոլորովին ⁷կը յայտնէ՝՝, Իսկ իմաստունը զայն յետագային կը պահէ։

Սուտ խօսքերու ուշադիր եղող կառավարիչին Բոլոր սպասարկուները ամբարիշտ կ’ըլլան։

Թշուառն ու հարստահարիչը իրարու հանդիպեցան. Տէ՛րն է երկուքին աչքերը լուսաւորողը։

Չքաւորները ճշմարտութեամբ դատող թագաւորին գահը՝ Յաւիտեան հաստատ պիտի ըլլայ։

Գաւազանն ու յանդիմանութիւնը իմաստութիւն կու տան, Բայց իր կամքին ձգուած ⁸մանուկը իր մայրը կ’ամչցնէ։

Երբ ամբարիշտները բազմանան՝ յանցանքը կը շատնայ, Սակայն արդարները անոնց անկումը պիտի տեսնեն։

⁹Խրատէ՛ քու որդիդ, որպէսզի քեզ հանգստացնէ, Եւ քու անձդ զուարճացնէ։

Առանց տեսիլքի՝ ժողովուրդը կը ¹⁰խոտորի, Բայց Օրէնքը պահողը երանելի կ’ըլլայ։

Հասկցող բայց ¹¹չհնազանդող ծառան՝ Խօսքերով չի ¹²խրատուիր։

Իր խօսքերուն մէջ փութացող մարդ մը տեսա՞ր. Աւելի յոյս կայ անմիտէն՝ քան իրմէ։

Եթէ մէկը իր ծառան ¹³մանկութենէն շփացնէ, Վերջաւորութեան ան զաւակ կ’ըլլայ։

Բարկացոտ մարդը բանավէճ կը հրահրէ, Եւ ¹⁴ցասկոտ մարդը՝՝ շատ յանցանքներ կը գործէ։

Մարդուն յոխորտանքը զինք կը նուաստացնէ, Բայց հեզահոգի մարդը փառք կը վաստկի։

Գողին բաժնեկից եղողը իր անձը կ’ատէ. Ան երդումը կը լսէ, բայց զայն չի յայտներ։

Մարդոց ¹⁵վախը որոգայթի մէջ կը ¹⁶ձգէ, Սակայն Տէրոջ վստահողը պաշտպանուած կ’ըլլայ։

Շատերը կառավարիչին ¹⁷շնորհքը կը խնդրեն, Բայց Տէրոջմէ՛ն է մարդուն իրաւունքը։

Անիրաւ մարդը արդարներուն գարշելի է, Իսկ ¹⁸ուղղամտութեամբ ընթացողը՝՝ ամբարիշտին գարշելի է։