Proverbs 31

Psalm  «  Proverbs 30  ‹  Proverbs 31  ›  Ecclesiastes 1  »  Ecclesiastes

ՊԱՏԳԱՄ ԹԱԳԱՒՈՐԻ ՄԸ

Լեմուէլ թագաւորին խօսքերը, Այսինքն՝ պատգամը, որ անոր մայրը իրեն ¹հաղորդեց.—

Ի՞նչ ըսեմ, որդեա՛կս, Ի՞նչ ըսեմ, ո՛վ իմ ²որովայնիս որդին, Ի՞նչ ըսեմ, ո՛վ իմ ուխտերուս որդին։

Քու ոյժդ կիներուն մի՛ տար, Ո՛չ ալ քու ճամբաներդ՝ թագաւորներ տապալողներուն։

Թագաւորներուն չի վայլեր, ո՛վ Լեմուէլ, Թագաւորներուն չի վայլեր գինի խմել, Իշխանապետներուն չի վայլեր օղի խմել.

Որպէսզի խմելով օրէնքը չմոռնան, Եւ ո՛չ մէկ ³տառապեալի դատը ⁴ծռեն։

Օղին կորսուողներո՛ւն տուէք, Ու գինին՝ դառնահոգիներո՛ւն.

Թող խմէ եւ իր թշուառութիւնը մոռնայ, Ու իր տաժանքը ա՛լ չյիշէ։

Բա՛ց քու բերանդ համրին համար, Բոլոր ⁵անօգնականներուն դատին համար։

Բա՛ց քու բերանդ, արդարութեա՛մբ դատէ, Ու դժբախտին եւ աղքատին դա՛տը պաշտպանէ։

ԱՌԱՔԻՆԻ ԿԻՆԸ

Առաքինի կինը ո՞վ կրնայ գտնել. Անոր գինը մարգարիտներէն շատ աւելի է։

Անոր ամուսինին սիրտը անոր վրայ վստահութիւն ունի, Եւ աւարի կարօտ չ’ըլլար։

Ան իր կեանքին բոլոր օրերուն մէջ Անոր բարիք կ’ընէ, եւ ո՛չ թէ չարիք։

Բուրդ ու քթան կը փնտռէ, Եւ հաճոյքով իր ձեռքերով կը գործէ։

Ան վաճառականի նաւերուն կը նմանի. Իր ⁶հացը հեռուէն կը բերէ։

Գիշերը կը կանգնի ու տան մարդոց՝ ⁷կերակուր կու տայ, Եւ իր սպասուհիներուն՝ ⁸հրաման։

Արտի մը վրայ կը խորհի ու զայն ⁹կը գնէ՝՝. Իր ձեռքերուն պտուղէն այգի կը տնկէ։

Իր մէջքը զօրութեամբ կը գօտեւորէ, Ու բազուկները ¹⁰կ’ամրապնդէ։

Իր վաճառականութեան լաւ ըլլալը կը հասկնայ. Անոր ճրագը գիշերը չի մարիր։

Ձեռքերը իլիկին վրայ կը դնէ, Եւ ափով րոքը կը բռնէ։

Ափը դժբախտին կը բանայ, Ու ձեռքերը աղքատներուն կ’երկարէ։

Իր տան մարդոց համար ձիւնէն չի վախնար, Որովհետեւ ամբողջ ընտանիքը ¹¹կրկին հանդերձ՝՝ հագած է։

Իրեն ծածկոցներ կը շինէ. Իր հանդերձը բարակ քթան եւ ¹²ծիրանի է։

Անոր ամուսինը ճանչցուած է ¹³դռներուն մէջ՝ Երբ երկրին երէցներուն հետ կը նստի։

Ինք շապիկ կը շինէ ու կը ծախէ Եւ ¹⁴վաճառականներուն գօտիներ կը յանձնէ։

Զօրութիւն ու փառաւորութիւն կը հագնի, Եւ յետագայ օրերը պիտի ուրախանայ։

Իր բերանը իմաստութեամբ կը բանայ Ու լեզուին վրայ ¹⁵քաղցրութեան ¹⁶ուսուցում կայ։

Իր տան ընթացքը կը քննէ, Եւ ծուլութեան հացը չ’ուտեր։

Անոր որդիները կը կանգնին ու զայն երանելի կը կոչեն։ Անոր ամուսինն ալ զայն կը գովէ՝ ըսելով.

«Շատ աղջիկներ առաքինի եղան, Բայց դուն բոլորն ալ կը գերազանցես»։

¹⁷Վայելչութիւնը կը խաբէ, ու գեղեցկութիւնը ունայն է. Սակայն Տէրոջմէն վախցող կինը պիտի գովուի։

Տուէ՛ք անոր իր ձեռքերուն պտուղէն, Եւ անոր արարքները դռներուն մէջ պիտի գովեն զայն։