Psalm 7

Job  «  Psalm 6  ‹  Psalm 7  ›  Psalm 8  »  Proverbs

ԱՂՕԹՔ՝ ԱՐԴԱՐՈՒԹԵԱՆ ՀԱՄԱՐ Դաւիթի մեղեդին, որ երգեց Տէրոջ՝ Բենիամինեան Քուշի խօսքերուն համար։

Ո՛վ Տէր, իմ Աստուա՛ծս, քեզի՛ կ’ապաւինիմ. Փրկէ՛ զիս իմ բոլոր հալածիչներէս, եւ ազատէ՛ զիս.

Որպէսզի իմ անձս ¹չբզքտեն առիւծի մը պէս, Որ կը յօշոտէ, եւ ո՛չ մէկ ազատող կ’ըլլայ։

Ո՛վ Տէր, իմ Աստուա՛ծս, եթէ սա՛ բանը ըրի.— Եթէ ձեռքերուս մէջ անիրաւութիւն կայ,

Եթէ չարիք հատուցանեցի ²բարեկամիս, Ու ³կողոպտեցի ան՝ որ ⁴առանց պատճառի՝՝ իմ հակառակորդս էր,

Թշնամին թող հալածէ իմ անձս եւ հասնի անոր, Գետինին վրայ կոխկռտէ կեանքս, Ու փառքս հողին մէջ բնակեցնէ։ (Սելա։)

Կանգնէ՛, ո՛վ Տէր, քու բարկութեամբդ. Բարձրացի՛ր հակառակորդներուս ցասումին դէմ։ Արթնցի՛ր ինծի համար. դո՛ւն ⁵սահմանեցիր դատաստանը։

⁶Ժողովուրդներուն համայնքը քեզ պիտի շրջապատէ. Բարձրացի՛ր անոնց վրայ։

Տէրը պիտի դատէ ժողովուրդները. Ո՛վ Տէր, դատէ՛ զիս Արդարութեանս եւ մէջս եղած պարկեշտութեանս համեմատ։

Ամբարիշտներուն չարութիւնը թող վերջանայ, Իսկ դուն հաստատէ՛ արդարը. Արդարեւ դուն, ո՛վ արդար Աստուած, կը քննես սիրտերն ու ⁷խիղճերը։

Իմ պաշտպանութիւնս Աստուծմէ է, Որ կը փրկէ սիրտով ուղիղները.

Աստուած արդար դատաւոր է. Աստուած ամբարիշտին ամէն օր բարկացած է.

Եթէ ան դարձի չգայ, իր սուրը պիտի սրէ. Աղեղը լարած եւ հաստատած է։

Մահուան գործիքները պատրաստած է անոր դէմ, Իր ⁸հրավառ նետերը շինած է։

Ահա՛ ամբարիշտը անօրէնութեան երկունքի ցաւ կը քաշէ. Անիրաւութիւն յղացաւ եւ ստութիւն ծնաւ։

Հոր փորեց ու խորունկցուց, Բայց իր պատրաստած փոսին մէջ ի՛նք պիտի իյնայ.

Անոր անիրաւութիւնը իր գլուխը պիտի վերադառնայ. Անոր բռնութիւնը իր գագաթին վրայ պիտի իջնէ։

Շնորհակալ պիտի ըլլամ Տէրոջմէն՝ իր արդարութեան համար, Սաղմոս պիտի երգեմ Ամենաբարձր Տէրոջ անունին։