Psalm 10

Job  «  Psalm 9  ‹  Psalm 10  ›  Psalm 11  »  Proverbs

ԱՂՕԹՔ՝ ԱՐԴԱՐՈՒԹԵԱՆ ՀԱՄԱՐ

Ո՛վ Տէր, ինչո՞ւ հեռու կը կենաս. Տագնապի ժամանակները կը թաքնուիս։

¹Ամբարիշտին յոխորտանքին պատճառով դժբախտը կը տոչորի՝՝. Իրենց մտածած ²հնարքներուն մէջ իրե՛նք թող բռնուին։

Արդարեւ ամբարիշտը իր անձին փափաքով կը պարծենայ. Ագահը կ՛օրհնէ, Տէրը կ’անարգէ։

Ամբարիշտը իր դէմքին խրոխտութեան համար Աստուած չի փնտռեր. Իր բոլոր ³մտածումներուն մէջ բնա՛ւ Աստուած չկայ։

Անոր ճամբաները ամէն ժամանակ ⁴պինդ են. Քու դատավճիռներդ անոր դիմաց շատ բարձր են. Ան իր բոլոր հակառակորդներուն վրայ կը փչէ։

Իր սիրտին մէջ ըսաւ. «Պիտի չսասանիմ, Որովհետեւ սերունդէ սերունդ ձախորդութեան մէջ պիտի չըլլամ»։

Անոր բերանը անէծքով, խաբէութիւններով ու հարստահարութիւններով լեցուն է. Անիրաւութիւնը եւ ⁵անօրէնութիւնը անոր լեզուին տակ են։

Գիւղերուն մօտ դարան կը ⁶մտնէ, Ծածուկ տեղերու մէջ անմեղը կը սպաննէ. Անոր աչքերը ծածկաբար տկարները կը դիտեն։

Ծածուկ տեղեր դարան կը մտնէ, ինչպէս առիւծը՝ իր մացառուտին մէջ. Դարանակալ կ’ըլլայ՝ դժբախտը յափշտակելու համար. Դժբախտը կը յափշտակէ՝ իր ցանցին մէջ ⁷ձգելով զայն։

Կը ծուարի, կը կծկուի, Եւ տկարները անոր ⁸ճանկերուն տակ կ’իյնան։

Իր սիրտին մէջ կ’ըսէ. «Աստուած մոռցեր է. Իր երեսը ծածկեր է, որպէսզի ամենեւին չտեսնէ»։

Կանգնէ՛, ո՛վ Տէր. բարձրացո՛ւր ձեռքդ, ո՛վ Աստուած. Մի՛ մոռնար տառապեալները։

Ինչո՞ւ ամբարիշտը Աստուած կ’անարգէ, Իր սիրտին մէջ ըսելով. «Հաշիւ պիտի չպահանջես»։

Դուն տեսար, որովհետեւ տաժանքին ու վիշտին կը նայիս,՝ Քու ձեռքովդ փոխարէնը հատուցանելու համար։ Տկարը ինքզինք քեզի՛ կը յանձնէ. Որբին օգնականը դո՛ւն ես։

Կոտրէ՛ ամբարիշտին բազուկը. Փնտռէ՛ չարին ամբարշտութիւնը՝ մինչեւ որ ա՛լ չգտնես։

Տէրը ⁹դարէ դար՝՝ թագաւոր է. Հեթանոսները կորսուած են անոր երկրէն։

Ո՛վ Տէր, տառապեալներուն փափաքը լսեցիր. Անոնց սիրտերը պիտի հաստատես, եւ քու ականջդ ուշադիր պիտի ըլլայ՝

Որբին ու տնանկին դատը պաշտպանելու, Որպէսզի ¹⁰հողեղէն մարդը ա՛լ զանոնք չահաբեկէ։