Psalm 17

Job  «  Psalm 16  ‹  Psalm 17  ›  Psalm 18  »  Proverbs

ԱՆՄԵՂԻ ՄԸ ԱՂՕԹՔԸ Դաւիթի աղօթքը։

Ո՛վ Տէր, լսէ՛ արդար դատս, Ուշադի՛ր եղիր ¹պաղատանքիս, Ունկնդրէ՛ աղօթքս, Որ խաբեբայ շրթունքով չէ։

Իմ դատավճիռս քու ներկայութեանդ թող ²արձակուի. Քու աչքերդ ուղղամտութիւնը թող տեսնեն։

Իմ սիրտս քննեցիր, գիշերը աչքէ անցուցիր, Զիս բովի մէջ զտեցիր ու ոչինչ գտար։ Որոշեցի որ բերանս պատուիրաններդ չանտեսէ.

Մարդոց գործերուն նայելով՝ Քու շրթունքիդ խօսքերով զգուշացայ աւազակին ուղիներէն։

Պահէ՛ քայլերս քու արահետներուդ մէջ, Որպէսզի ոտքերս չսահին։

Ես քեզի գոչեցի, որովհետեւ ինծի պիտի պատասխանես, ո՛վ Աստուած։ Դարձո՛ւր ինծի քու ականջդ, լսէ՛ իմ խօսքս։

Ցո՛յց տուր քու սքանչելի կարեկցութիւնդ, Դո՛ւն՝ որ քեզի ապաւինողները աջ ձեռքովդ կը փրկես ³Հակառակորդներէն։

Պահպանէ՛ զիս աչքի բիբի պէս, Ծածկէ՛ զիս թեւերուդ հովանիին տակ՝

Զիս աւերող ամբարիշտներուն երեսէն։ Իմ անձիս թշնամիները զիս պաշարեցին.

Իրենց ճարպով ⁴ծածկուեցան, Իրենց բերանով ամբարտաւանութեամբ խօսեցան։

Հիմա մեր քայլերը շրջապատելով Իրենց աչքերը մեր վրայ սեւեռեցին՝ մեզ ⁵զգետնելու համար,

Առիւծի պէս՝ որ կը տենչայ բզքտել, Կորիւնի պէս՝ որ ծածուկ տեղերը ⁶դարանակալ կ’ըլլայ՝՝։

Կանգնէ՛, ո՛վ Տէր. ընդառաջէ՛ անոր, ⁷Նուաստացո՛ւր զայն, Քու սուրովդ ազատէ՛ իմ անձս ամբարիշտներէն։

Ո՛վ Տէր, քու ձեռքովդ փրկէ՛ զիս ⁸մարդոցմէն, Աշխարհի՛ մարդոցմէն՝ որոնց բաժինը այս կեանքին մէջ է. Անոնց փորը պահեստներէդ կը լեցնես, Անոնց ⁹որդիներն ալ՝՝ կը կշտանան, Եւ իրենցմէ աւելցածը իրենց երախաներուն կը թողուն։

Իսկ ես քու երեսդ պիտի տեսնեմ արդարութեամբ. Երբ արթննամ՝ քու ¹⁰դէմքէդ պիտի կշտանամ։