Psalm 27

Job  «  Psalm 26  ‹  Psalm 27  ›  Psalm 28  »  Proverbs

ՓԱՌԱԲԱՆՈՒԹԵԱՆ ԱՂՕԹՔ Դաւիթի սաղմոսը։

Տէրը իմ լոյսս ու փրկութիւնս է, Ես որմէ՞ պիտի վախնամ. Տէրը իմ կեանքիս ¹զօրութիւնն է, Ես որմէ՞ պիտի դողամ։

Երբ չարագործներ իմ մարմինս ուտելու համար ինծի մօտեցան, Իմ հակառակորդներս ու թշնամիներս գայթեցան եւ ինկան։

Եթէ ինծի դէմ բանակ մը ²հաւաքուի, Սիրտս պիտի չվախնայ. Եթէ ինծի դէմ պատերազմ ³մղուի, ⁴Դա՛րձեալ վստահութիւն պիտի ունենամ։

Մէ՛կ բան կը խնդրեմ Տէրոջմէն Ու սա՛ կը ⁵փափաքիմ, Որ կեանքիս բոլոր օրերը Տէրոջ տան մէջ բնակիմ՝ Տէրոջ ⁶գեղեցկութիւնը տեսնելու, Եւ անոր տաճարին մէջ իրեն ⁷հարցնելու համար։

Արդարեւ ձախորդութեան ժամանակ՝ Իր ⁸բնակարանին մէջ զիս պիտի պահէ, Իր վրանին ծածկոյթով զիս պիտի ծածկէ, Վէմի վրայ պիտի բարձրացնէ զիս։

Եւ հիմա իմ գլուխս պիտի բարձրանայ՝ Իմ շուրջս եղող թշնամիներէս վեր։ Անոր վրանին մէջ ուրախութեան գոչիւնով զոհեր պիտի մատուցանեմ, Պիտի երգեմ ու սաղմոս ըսեմ Տէրոջ։

Ո՛վ Տէր, լսէ՛ ձայնս՝ երբ գոչեմ, Ողորմէ՛ եւ պատասխանէ՛ ինծի։

Երբ ըսիր. «Երե՛սս փնտռեցէք», Իմ սիրտս քեզի ըսաւ. «Քու երեսդ պիտի փնտռեմ, ո՛վ Տէր»։

Երեսդ ինձմէ մի՛ ծածկեր, Բարկութեամբ ծառադ մի՛ ⁹հեռացներ. Ինծի օգնական եղար, զիս երեսէ մի՛ ձգեր. Զիս մի՛ լքեր, ո՛վ իմ փրկութեանս Աստուածը։

Թէեւ հայրս ու մայրս զիս լքեն, Տէրը զիս պիտի ¹⁰ընդունի։

Ո՛վ Տէր, սորվեցո՛ւր ինծի քու ճամբադ Եւ առաջնորդէ՛ զիս լեռնադաշտի ուղիին մէջ՝ ¹¹ոսոխներուս պատճառով։

Զիս մի՛ մատներ հակառակորդներուս ¹²կամքին, Որովհետեւ ինծի դէմ ¹³սուտ վկաներ Եւ բռնութիւն փչողներ կանգնեցան։

Վստահ եմ թէ Տէրոջ բարութիւնը պիտի տեսնեմ Ապրողներու երկրին մէջ։

Տէրո՛ջ սպասէ. Ուժովցի՛ր ու քաջասի՛րտ եղիր. Դա՛րձեալ Տէրոջ սպասէ։