Psalm 31

Job  «  Psalm 30  ‹  Psalm 31  ›  Psalm 32  »  Proverbs

ՎՍՏԱՀՈՒԹԵԱՆ ԱՂՕԹՔ՝ ԱՍՏՈՒԾՈՅ ՎՐԱՅ Գլխաւոր երաժիշտին. Դաւիթի սաղմոսը։

Ո՛վ Տէր, քեզի ապաւինեցայ, Երբե՛ք պիտի չամչնամ. Ազատէ՛ զիս քու արդարութեամբդ։

Դարձո՛ւր ականջդ ինծի, Շուտո՛վ ազատէ զիս։ Ամրո՛ց եւ վէ՛մ եղիր ինծի, Բերդ ու տուն՝ զիս ապրեցնելու համար,

Որովհետեւ դո՛ւն ես իմ ժայռս եւ բերդս. Առաջնորդէ՛ ու կառավարէ՛ զիս՝ քու անունիդ համար։

Հանէ՛ զիս ցանցէն՝ որ ինծի համար թաղած են, Քանի դո՛ւն ես իմ ¹զօրութիւնս։

Քու ձեռքդ կը յանձնեմ իմ հոգիս. Դո՛ւն փրկեցիր զիս, ո՛վ Եհովա, ճշմարտութեա՛ն Աստուած։

Սնոտի ²ունայնութիւններ դիտողները ատեցի, Իսկ ես Տէրոջ վստահեցայ։

Քու կարեկցութեամբդ պիտի խայտամ եւ ուրախանամ, Որովհետեւ իմ տառապանքս տեսար, Եւ անձիս տագնապները գիտցար։

Զիս թշնամիին ձեռքը չմատնեցիր, Հապա ոտքերս ընդարձակ տեղ մը կայնեցուցիր։

Ո՛վ Տէր, ողորմէ՛ ինծի, որովհետեւ տագնապի մէջ եմ. Աչքս, անձս ու փորս վիշտէն ծիւրեցան։

Արդարեւ կեանքս տրտմութենէն սպառեցաւ, Եւ տարիներս՝ հառաչանքէն. Ոյժս անօրէնութենէս ³պակսեցաւ, Ոսկորներս ալ ծիւրեցան։

Բոլոր հակառակորդներուս, մանաւանդ դրացիներուս առջեւ նախատուեցայ, Ու ճանչուորներուս երկիւղ եղայ. Զիս դուրսը տեսնողները ինձմէ կը փախչէին։

Մեռեալի պէս սիրտէ մոռցուեցայ, ⁴Փճացած անօթի նմանեցայ։

Արդարեւ շատերու չարախօսութիւնը լսեցի. Ամէն կողմ երկիւղ կար։ Երբ անոնք միասին խորհրդակցեցան ինծի դէմ, Կը խորհէին ⁵հոգիս առնել։

Բայց ես քեզի՛ վստահեցայ, ո՛վ Տէր։ Ես ըսի. «Դո՛ւն ես իմ Աստուածս».

Իմ ժամանակներս քու ձեռքդ են. Ազատէ՛ զիս թշնամիներուս ձեռքէն ու զիս հալածողներէն։

Երե՛սդ ⁶պայծառացուր քու ծառայիդ վրայ, Փրկէ՛ զիս քու կարեկցութեամբդ։

Ո՛վ Տէր, թող չամչնամ, Որովհետեւ քեզի՛ գոչեցի. Ամբարիշտնե՛րը թող ամչնան, Թող լուռ կենան ⁷դժոխքին մէջ։

Թող պապանձին ստախօս շրթունքները, Որոնք յոխորտանքով եւ արհամարհանքով Անպատկառութիւն կը խօսին արդարին դէմ։

Ո՜րչափ մեծ է քու բարութիւնդ՝ Որ քեզմէ վախցողներուն վերապահեցիր, Ու քեզի ապաւինողներուն համար իրագործեցիր՝ Մարդոց որդիներուն առջեւ։

Զանոնք քու երեսիդ ծածկոյթով պիտի ծածկես Մարդոց սադրանքներէն. Տաղաւարի մէջ պիտի ծածկես զանոնք Լեզուներու վէճերէն։

Օրհնեա՜լ ըլլայ Տէրը, Որովհետեւ իր սքանչելի կարեկցութիւնը ցոյց տուաւ ինծի ⁸Ամրացած քաղաքի մէջ։

Իրարանցումիս մէջ ըսի. «Ես քու աչքերուդ առջեւէն ⁹վտարուեցայ»։ Սակայն դուն աղաչանքիս ձայնը լսեցիր՝ Երբ քեզի աղաղակեցի։

Տէ՛րը սիրեցէք, ո՛վ անոր բոլոր բարեպաշտները. Արդարեւ Տէրը հաւատարիմները կը պաշտպանէ, Իսկ յոխորտանքով վարուողներուն գերազանցօրէն կը հատուցանէ։

Ուժովցէ՛ք ու քաջասի՛րտ եղէք, Դուք բոլորդ՝ որ Տէրոջ կը յուսաք։