Psalm 32

Job  «  Psalm 31  ‹  Psalm 32  ›  Psalm 33  »  Proverbs

ԽՈՍՏՈՎԱՆՈՒԹԻՒՆ ԵՒ ՆԵՐՈՒՄ Դաւիթի երգը։

Երանի՜ անոր՝ որուն յանցանքը ներուեցաւ, Եւ անոր մեղքը ծածկուեցաւ։

Երանի՜ այն մարդուն՝ որուն ¹անօրէնութիւն չի սեպեր՝՝ Տէրը, Եւ անոր հոգիին մէջ խաբէութիւն չկայ։

Երբ ²լուռ կեցայ, ոսկորներս մաշեցան Ամբողջ օրը ³աղաղակելէս,

Որովհետեւ ցերեկ ու գիշեր քու ձեռքդ իմ վրաս ծանրացաւ. Իմ ⁴թարմութիւնս ամառուան չորութեան վերածուեցաւ։ (Սելա։)

Ուստի մեղքս քեզի գիտցուցի, Եւ անօրէնութիւնս չծածկեցի։ Ես ըսի. «Տէրո՛ջ պիտի խոստովանիմ յանցանքներս»։ Դուն ալ ներեցիր իմ մեղքիս անօրէնութիւնը։ (Սելա։)

Ասոր համար ամէն բարեպաշտ պիտի աղօթէ քեզի՝ Քեզ գտնելու ժամանակը։ Իսկապէս շատ ջուրերու յորդած ատենը՝ Անոնք պիտի չմօտենան անոր։

Դո՛ւն ես իմ ⁵պատսպարանս. Պիտի պաշտպանես զիս տագնապէն, Պիտի շրջապատես զիս ազատութեան երգերով։ (Սելա։)

⁶Քեզի պիտի սորվեցնեմ՝՝, ու քեզի պիտի ցուցնեմ երթալիք ճամբադ. Քեզ պիտի խրատեմ, իմ աչքս քու վրադ պիտի ըլլայ։

Ձիու պէս ու ջորիի պէս մի՛ ըլլաք, որոնք խելք չունին. Իրենց բերանը սանձով ու պախուրցով կապուելու է, որպէսզի քեզի չմօտենան։

Ամբարիշտին կոտտանքը շատ պիտի ըլլայ, Սակայն կարեկցութիւնը պիտի շրջապատէ Տէրոջ վստահողը։

Ո՛վ արդարներ, ուրախացէ՛ք Տէրոջմով, ու խայտացէ՛ք, Ցնծացէ՛ք դուք բոլորդ՝ որ սիրտով ուղիղ էք։