Psalm 35

Job  «  Psalm 34  ‹  Psalm 35  ›  Psalm 36  »  Proverbs

ԱՂՕԹՔ՝ ՕԳՆՈՒԹԵԱՆ ՀԱՄԱՐ Դաւիթի սաղմոսը։

Ո՛վ Տէր, ¹կռուէ՛ ինծի դէմ կռուողներուն հետ՝՝. Պայքարէ՛ ինծի դէմ պայքարողներուն հետ։

Բռնէ՛ վահանն ու ասպարը, Եւ կանգնէ՛ ինծի օգնելու։

Նաեւ քաշէ՛ նիզակը, ու գոցէ՛ ճամբան՝ զիս հետապնդողներուն դէմ. Ըսէ՛ անձիս. «Ե՛ս եմ քու փրկութիւնդ»։

Իմ անձս փնտռողները թող ամչնան եւ խայտառակուին. Ինծի դէմ չարիք հնարողները Թող ընկրկին ու շիկնին.

Հովին առջեւ եղած մղեղին պէս թող ըլլան, Եւ Տէրոջ հրեշտակը թող վանէ զանոնք.

Անոնց ճամբան խաւար ու սահուն թող ըլլայ, Եւ Տէրոջ հրեշտակը թող հետապնդէ զանոնք։

Արդարեւ առանց ²պատճառի իրենց ցանցը փոսի մէջ թաղեցին ինծի համար, Առանց պատճառի փոս փորեցին անձիս համար.

³Անոնց վրայ յանկարծ աւերում թող գայ, Եւ իրենց թաղած ցանցը զիրենք բռնէ, Նոյն աւերումին մէջ իյնան։

Սակայն իմ անձս Տէրոջմով պիտի խայտայ, Անոր փրկութեամբ պիտի բերկրի։

Իմ բոլոր ոսկորներս պիտի ըսեն. «Տէ՛ր, ո՞վ քեզի նման է. Դուն կ’ազատես դժբախտը իրմէ աւելի ուժեղէն, Դժբախտն ու աղքատը՝ զիրենք թալլողէն»։

⁴Սուտ վկաներ կանգնեցան. Չգիտցածներս կը հարցնէին ինծի։

Բարիքի փոխարէն չարիք հատուցանեցին ինծի՝ Անձս ⁵կողոպտելով։

Բայց ես անոնց հիւանդութեան ատեն քուրձ կը հագնէի. Անձս ծոմապահութեամբ կը խոնարհեցնէի, Եւ աղօթքս իմ ծոցս ⁶կը վերադառնար՝՝։

Ինչպէս իմ բարեկամիս կամ եղբօրս հետ՝ այնպէս ալ անոնց հետ կը ⁷վարուէի, Իր մօր համար սուգ պահողի մը պէս՝ մռայլ ու նկուն էի։

Բայց երբ կաղացի՝ ուրախացան եւ հաւաքուեցան. Զարնողները ինծի դէմ հաւաքուեցան, բայց ես ⁸չէի գիտեր՝՝. Պատռեցին զիս՝ առանց դադրելու.

Հացկատակ, կեղծաւոր ծաղրածուներու հետ՝ Իրենց ակռաները ինծի դէմ կը կրճտէին։

Ո՛վ Տէր, մինչեւ ե՞րբ պիտի նայիս. ⁹Ազատէ՛ իմ անձս անոնց աւերումներէն, Իմ ¹⁰կեանքս՝ առիւծի կորիւններէն։

Այն ատեն մեծ համախմբումին մէջ քեզմէ շնորհակալ պիտի ըլլամ, Շատ ժողովուրդի մէջ քեզ պիտի գովաբանեմ։

Ընդունայն ինծի թշնամի եղողները ինձմով թող չուրախանան, Առանց պատճառի զիս ատողները աչքով նշան թող չընեն։

Արդարեւ խաղաղութեան մասին չեն խօսիր, Հապա երկրին մէջ եղող հանդարտներուն դէմ խաբէութիւն կը հնարեն։

Իրենց բերանը ինծի դէմ ¹¹լայն կը բանան՝՝ ու կ’ըսեն. «Վա՜շ, վա՜շ, մեր աչքերը տեսան»։

Ո՛վ Տէր, դուն տեսար, լուռ մի՛ կենար. Ո՛վ Տէր, ինձմէ մի՛ հեռանար։

Սթափէ՛, ո՛վ իմ Աստուածս եւ Տէրս, Արթնցի՛ր՝ իրաւունքիս ու դատիս համար։

Դա՛տս պաշտպանէ՝ քու արդարութեանդ համեմատ, ո՛վ Տէր, իմ Աստուա՛ծս, Որպէսզի վրաս չուրախանան.

Իրենց սիրտին մէջ թող չըսեն. «Վա՜շ, մեր ¹²փափաքը եղաւ»։ Թող չըսեն. «Կլլեցի՛նք զինք»։

Իմ ձախորդութեամբս ուրախացողները՝ Թող միասին ամչնան եւ շիկնին. Ինծի դէմ ¹³հպարտացողները՝ Թող ամօթ ու խայտառակութիւն հագնին։

Ինծի համար արդարութիւն փափաքողները՝ Թող ցնծան եւ ուրախանան, Ու շարունակ ըսեն. «Աստուած թող մեծնայ, Որ իր ծառային խաղաղութիւն կը բաղձայ»։

Իմ լեզուս քու արդարութիւնդ պիտի ¹⁴հռչակէ՝ Ամէն օր քեզ գովաբանելով։