Psalm 75

Job  «  Psalm 74  ‹  Psalm 75  ›  Psalm 76  »  Proverbs

ԱՍՏՈՒԱԾ՝ ԴԱՏԱՒՈՐԸ Գլխաւոր երաժիշտին. Ալ-Թաշհէթ. Ասափի սաղմոսը. երգ։

Քե՛զ կը ներբողենք, ո՛վ Աստուած. Կը ներբողենք քու անունդ՝ քանի որ մօտ է. Քու սքանչելիքներդ կը պատմուին։

Երբ սահմանուած ատենը ¹գայ, Ուղղամտութեամբ պիտի դատեմ։

Երկիրն ու անոր բոլոր բնակիչները հալեցան. Անոր սիւները ե՛ս կը հաստատեմ։ (Սելա։)

Պարծենկոտներուն ըսի. «Մի՛ պարծենաք», Եւ ամբարիշտներուն. «Եղջիւր մի՛ բարձրացնէք։

Ձեր եղջիւրները այդքան վեր մի՛ բարձրացնէք. Անպատկառ պարանոցով մի՛ խօսիք»։

Արդարեւ բարձրանալը ո՛չ արեւելքէն է, Ո՛չ արեւմուտքէն, ո՛չ ալ անապատէն,

Հապա Աստուա՛ծ է դատաւորը. Մէկը կը ցածցնէ, ու միւսը կը բարձրացնէ։

Արդարեւ Տէրոջ ձեռքը բաժակ կայ, ու գինին կարմիր է. Ան խառնուրդով լեցուն է, եւ անկէ կը լեցնէ. Երկրի բոլոր ամբարիշտները Անոր մրուրները քամելով պիտի խմեն։

Իսկ ես ասիկա յաւիտեան պիտի հռչակեմ, Յակոբի Աստուծոյն սաղմոս պիտի երգեմ։

Ամբարիշտներուն բոլոր եղջիւրները պիտի կոտրեմ, Բայց արդարին եղջիւրները պիտի բարձրանան։