Psalm 145
Job « Psalm 144 ‹ Psalm 145 › Psalm 146 » Proverbs
ՓԱՌԱԲԱՆՈՒԹԵԱՆ ԵՐԳ Դաւիթի գովաբանութիւնը։
1Քեզ պիտի բարձրացնեմ, ո՛վ Թագաւոր, իմ Աստուա՛ծս, Ու քու անունդ 1դարէ դար՝՝ պիտի օրհնաբանեմ։
2Ամէն օր քեզ պիտի օրհնաբանեմ, Եւ քու անունդ դարէ դար պիտի գովաբանեմ։
3Մեծ ու յոյժ գովելի է Տէրը. Անոր մեծութիւնը անհետազօտելի է։
4Մէկ սերունդը միւսին պիտի դրուատէ քու գործերդ, Եւ քու քաջագործութիւններդ պիտի հռչակէ։
5Քու փառքիդ պատուական վայելչութիւնը, Ու քու սքանչելի գործերդ պիտի 2հաղորդեմ։
6Քու ահաւոր արարքներուդ զօրութեան մասին պիտի խօսին, Իսկ ես քու մեծագործութիւններդ պիտի պատմեմ։
7Քու մեծ բարութեանդ յիշատակը պիտի արտայայտեն, Եւ քու արդարութեամբդ պիտի ցնծան։
8Տէրը ողորմած ու գթած, Համբերատար եւ մեծապէս կարեկից է։
9Տէրը բոլորին հանդէպ բարի է. Անոր գթութիւնները իր բոլոր գործերուն 3կը վերաբերին՝՝։
10Ո՛վ Տէր, քու բոլոր գործերդ քեզ պիտի ներբողեն, Եւ բարեպաշտներդ քեզ պիտի օրհնաբանեն։
11Քու թագաւորութեանդ փառքին մասին պիտի խօսին, Ու քու զօրութիւնդ պիտի պատմեն.
12Որպէսզի մարդոց որդիներուն գիտցնեն Անոր քաջագործութիւններն ու թագաւորութեան փառաւոր վայելչութիւնը։
13Քու թագաւորութիւնդ յաւիտենական թագաւորութիւն է Եւ քու տէրութիւնդ՝ սերունդէ սերունդ։
14Տէրը նեցուկ կ’ըլլայ բոլոր ինկածներուն, Ու բոլոր կքածները կը կանգնեցնէ։
15Բոլորին աչքերը քեզի կը սպասեն, Եւ դուն ատենին անոնց կու տաս իրենց կերակուրը։
16Քու ձեռքդ կը բանաս, Ու ամէն կենդանի մարմին կը կշտացնես՝ իր փափաքին համաձայն։
17Տէրը արդար է իր բոլոր ճամբաներուն մէջ, Ու կարեկից՝ իր բոլոր գործերուն մէջ։
18Տէրը մօտ է բոլոր անոնց՝ որ իրեն կը գոչեն, Բոլոր անոնց՝ որ ճշմարտութեամբ իրեն կը գոչեն։
19Ան իրմէ վախցողներուն փափաքը կը գործադրէ. Անոնց աղաղակը կը լսէ եւ զանոնք կը փրկէ։
20Տէրը բոլոր զինք սիրողները կը պահպանէ, Սակայն բոլոր ամբարիշտները կը բնաջնջէ։
21Իմ բերանս Տէրոջ գովաբանութիւնը պիտի արտայայտէ, Եւ ամէն մարմին անոր սուրբ անունը պիտի օրհնաբանէ դարէ դար։