Psalm 147

Job  «  Psalm 146  ‹  Psalm 147  ›  Psalm 148  »  Proverbs

ԱՄԵՆԱԿԱՐՈՂ ԱՍՏՈՒԾՈՅ ՓԱՌՔԸ

Գովաբանեցէ՛ք Տէրը, որովհետեւ վայելուչ է մեր Աստուծոյն սաղմոս ըսել, Որովհետեւ հաճելի ու պատշաճ է գովաբանել։

Տէ՛րը կը կառուցանէ Երուսաղէմը, Ի՛նք կը հաւաքէ Իսրայէլի աքսորականները.

Կոտրած սիրտ ունեցողները կը բուժէ, Եւ անոնց խոցերը կը փաթթէ.

¹Աստղերը կը թուարկէ, Անոնք բոլորն ալ իրենց անուններով կը կոչէ։

Մեծ է մեր Տէրը, եւ իր կարողութիւնը շատ է. Անոր հանճարը անհուն է։

Տէրը ²նեցուկ կ’ըլլայ հեզերուն՝՝, Իսկ մինչեւ գետին կը նուաստացնէ ամբարիշտները։

³Խմբերգեցէ՛ք Տէրոջ շնորհակալութեամբ, Սաղմո՛ս ըսէք մեր Աստուծոյն՝ քնարով։

Ի՛նք կը ծածկէ երկինքը թանձր ամպերով, Անձրեւ կը պատրաստէ երկրի համար, Ու խոտ կը բուսցնէ լեռներուն վրայ.

Ի՛նք անասուններուն կու տայ իրենց ⁴կերը, Եւ ագռաւին ձագերուն՝ որոնք կը գոչեն։

Ան ձիուն զօրութենէն չ’ախորժիր, Մարդուն սրունքներուն չի հաճիր։

Տէրը կը հաճի իրմէ վախցողներուն, Իր կարեկցութեան յուսացողներուն։

Դրուատէ՛ Տէրը, ո՛վ Երուսաղէմ, Օրհնէ՛ քու Աստուածդ, ո՛վ Սիոն.

Որովհետեւ ի՛նք ամրացուց քու դռներուդ նիգերը, Եւ օրհնեց որդիներդ քու մէջդ։

Ի՛նք խաղաղութիւն կու տայ հողամասիդ, Ու քեզ կը կշտացնէ ⁵ընտիր ցորենով։

Իր հրամանը երկրին կը ղրկէ, Եւ իր խօսքը արագութեամբ կը վազէ։

Ձիւն կու տայ՝ բուրդի պէս, Եղեամը կը ցանէ մոխիրի պէս,

Իր սառը կը նետէ պատառներու պէս. Անոր ցուրտին ո՞վ կրնայ դիմանալ։

Իր խօսքը կը ղրկէ, ու կը հալեցնէ զանոնք. Իր հովը կը փչէ, եւ ջուրեր կը հոսին։

Իր խօսքը կը հաղորդէ Յակոբի, Իր կանոններն ու դատավճիռները՝ Իսրայէլի։

Ո՛չ մէկ ազգի հետ այսպէս վարուեցաւ, Բայց անոնք իր դատավճիռները չճանչցան։ Ալէլուիա՜։