Romans 14

Acts  «  Romans 13  ‹  Romans 14  ›  Romans 15  »  1 Corinthians

ԵՂԲԱՅՐԸ ՉԴԱՏԵԼ

Ընդունեցէ՛ք հաւատքի մէջ տկար եղողը՝ առանց քննադատելու կարծիքները.

քանի որ մէկը կը հաւատայ թէ ամէն բան կրնայ ուտել, իսկ ուրիշ մը՝ որ տկար է՝ բանջարեղէն կ’ուտէ։

Ա՛ն որ կ’ուտէ՝ թող չանարգէ չուտողը, եւ ա՛ն որ չ’ուտեր՝ թող չդատէ ուտողը, որովհետեւ Աստուած ընդունած է զայն։

Դուն ո՞վ ես՝ որ կը դատես ուրիշին ծառան. հաստատուն կենայ կամ իյնայ՝ իր իսկական Տէրոջ համար է։ Բայց կանգուն պիտի պահուի, որովհետեւ ¹Աստուած կարող է կանգուն պահել զայն։

Մէկը կը նկատէ օր մը ուրիշէ մը ²գերադաս, միւսն ալ կը նկատէ բոլոր օրերը հաւասար. իւրաքանչիւրը լման համոզուած թող ըլլայ իր միտքին մէջ։

Ա՛ն որ համարում կ՛ընծայէ մէկ օրուան՝ Տէրո՛ջ համար համարում կ՛ընծայէ, իսկ ա՛ն որ համարում չ’ընծայեր մէկ օրուան, Տէրո՛ջ համար համարում չ’ընծայեր։ Ա՛ն որ կ’ուտէ՝ Տէրո՛ջ համար կ’ուտէ, քանի որ Աստուծմէ շնորհակալ կ’ըլլայ. իսկ ա՛ն որ չ’ուտեր, Տէրո՛ջ համար չ’ուտեր, բայց Աստուծմէ շնորհակալ կ’ըլլայ։

Արդարեւ մեզմէ ո՛չ մէկը ինքնիրեն համար կ’ապրի, կամ ինքնիրեն համար կը մեռնի.

քանի որ եթէ ապրինք՝ Տէրո՛ջ համար կ’ապրինք, ու եթէ մեռնինք՝ Տէրո՛ջ համար կը մեռնինք։ Ուրեմն թէ՛ ապրինք եւ թէ մեռնինք՝ մենք Տէրո՛ջն ենք։

Որովհետեւ Քրիստոս սա՛ նպատակով մեռաւ ³ու վերապրեցաւ, որպէսզի Տէր ըլլայ թէ՛ մեռելներուն եւ թէ ողջերուն։

Իսկ դուն ինչո՞ւ կը դատես եղբայրդ, կամ ինչո՞ւ կ’անարգես եղբայրդ, քանի բոլորս ալ պիտի ներկայանանք Քրիստոսի դատարանը։

Արդարեւ գրուած է. «Ես կ’ապրի՛մ,— կ’ըսէ Տէրը.— ամէն ծունկ պիտի կքի իմ առջեւս, եւ ամէն լեզու պիտի դաւանի զիս իբր Աստուած»։

Ուրեմն մեզմէ իւրաքանչիւրը հաշիւ պիտի տայ Աստուծոյ՝ ինքնիրեն համար։

ԵՂԲԱՅՐԸ ՉԳԱՅԹԱԿՂԵՑՆԵԼ

Ուստի ա՛լ չդատենք զիրար. այլ մանաւանդ սա՛ վճռեցէք, որ ո՛չ մէկը սայթաքում կամ գայթակղութիւն դնէ իր եղբօր առջեւ։

Գիտե՛մ, ու համոզուած եմ Տէր Յիսուսով, թէ ոչի՛նչ ինքնիրմէ պիղծ է. բայց ո՛վ որ պիղծ կը սեպէ որեւէ բան, անո՛ր համար պիղծ է ատիկա։

Սակայն եթէ եղբայրդ տրտմի կերակուրի համար, ա՛լ սիրով չես ընթանար. քու կերակուրովդ մի՛ կորսնցներ ա՛ն՝ որուն համար Քրիստոս մեռաւ։

Ուրեմն հայհոյութիւն թող չըլլայ ձեր բարիին համար,

քանի որ Աստուծոյ թագաւորութիւնը կերակուր ու խմելիք չէ, հապա արդարութիւն, խաղաղութիւն եւ ուրախութիւն՝ Սուրբ Հոգիով։

Արդարեւ ո՛վ որ այս կերպով Քրիստոսի կը ծառայէ՝ Աստուծոյ հաճելի ու մարդոցմէ գնահատուած է։

Ուրեմն հետամո՛ւտ ըլլանք այն բաներուն՝ որոնք խաղաղութիւն կը հայթայթեն, եւ այն բաներուն՝ որոնցմով շինութիւն կ’ըլլայ իրարու։

Մի՛ քանդէք Աստուծոյ գործը կերակուրի համար։ Արդարեւ բոլոր բաները մաքուր են. սակայն գէշ են այն մարդուն համար՝ որ կ’ուտէ ⁴գայթակղեցնելով։

Լաւ է ո՛չ միս ուտել, ո՛չ գինի խմել, ո՛չ ալ որեւէ բան ընել՝ որով եղբայրդ կը սայթաքի, կը գայթակղի կամ կը տկարանայ։

Դուն հաւա՞տք ունիս. քեզի՛ վերապահէ զայն՝ Աստուծոյ առջեւ. երանի՜ անոր, որ չի ⁵դատապարտեր ինքզինք անով՝ որ ինք ⁶կը գնահատէ՝՝։

Բայց ա՛ն որ կը տատամսի, եթէ ուտէ՝ կը դատապարտուի, քանի որ հաւատքով չէ որ կ’ուտէ. արդարեւ ամէն ինչ որ հաւատքով չէ՝ մեղք է։