Song of Solomon 7

Ecclesiastes  «  Song of Solomon 6  ‹  Song of Solomon 7  ›  Song of Solomon 8  »  Isaiah

ՍԻՐԱԿԱՆԸ

Ի՜նչ գեղեցիկ են ոտքերդ քու կօշիկներուդ մէջ, Ո՛վ ազնուականի աղջիկ. Ազդրերուդ շրջագիծը մանեակներու պէս է՝ Բանուած արուեստագէտի մը ձեռքով։

Պորտդ բոլորաձեւ բաժակ մըն է՝ ¹խմիչքով լեցուն՝՝, Փորդ՝ շուշանով շրջպատուած ցորենի դէզ։

Երկու ²ստինքներդ նման են երկու ձագերու, Այծեամի մը երկուորեակներուն։

Վիզդ փղոսկրէ աշտարակի պէս է. Աչքերդ կը նմանին Եսեբոնի լճակներուն՝ Բաթրաբբիմի դրան քով. Քիթդ Լիբանանի աշտարակին պէս է, Որ դէպի Դամասկոս կը նայի։

Գլուխդ քու վրադ Կարմեղոսի պէս է, Եւ գլուխիդ մազափունջը՝ ³ծիրանիի պէս. Թագաւորը քու խոպոպներէդ ⁴գերուած է։

Ո՜րչափ գեղեցիկ ու ո՜րչափ հաճելի ես, Իմ քնքուշ ⁵սիրուհիս։

Քու հասակդ արմաւենիի կը նմանի, Եւ ստինքներդ՝ ողկոյզներու։

Ըսի. «Արմաւենիին վրայ ելլեմ, Անոր ոստերը բռնեմ»։ ⁶Ստինքներդ որթատունկի ողկոյզներուն պէս թող ըլլան, Ռունգերուդ բուրմունքը՝ խնձորներու հոտին պէս,

Եւ քիմքդ՝ լաւագոյն գինիին պէս, Որ ուղիղ ⁷կը հոսի՝՝ իմ սիրականիս համար, Ու քնացողներուն շրթունքներուն ⁸վրայ կը կաթի՝՝։

ՍԻՐՈՒՀԻՆ

Ես իմ սիրականիսն եմ Եւ ան ինծի կը բաղձայ։

Եկո՛ւր, իմ սիրականս, դո՛ւրս ելլենք՝ դէպի դաշտը, Գիւղերո՛ւ մէջ գիշերենք.

Առտուն կանո՛ւխ ելլենք, այգինե՛րը երթանք, Ու տեսնե՛նք թէ արդեօք որթատունկը կը բողբոջի՛, ծաղիկը կը բացուի՛, Եւ նռնենիները կ’ընձիւղի՛ն. Հո՛ն իմ տարփանքս քեզի պիտի տամ։

Մանրագորները իրենց բուրմունքը ⁹կ’արձակեն՝՝, Ու մեր դռներուն մէջ կան Բոլոր քաղցրահամ պտուղները, թէ՛ նոր եւ թէ հին. Քեզի՛ վերապահած եմ զանոնք, ո՛վ իմ սիրականս։