Song of Solomon 8

Ecclesiastes  «  Song of Solomon 7  ‹  Song of Solomon 8  ›  Isaiah 1  »  Isaiah

Երանի՜ թէ մօրս ¹ստինքը ծծած եղբօրս պէս ըլլայիր. Երբ քեզ դուրսը գտնէի՝ պիտի համբուրէի, Ու զիս պիտի չարհամարհէին։

Քեզ առաջնորդելով մօրս տունը պիտի տանէի, Որպէսզի ինծի ²սորվեցնես. Քեզի պիտի խմցնէի ³հոտաւէտ գինիէն, նուռերուս օշարակէն։

Ձախ ձեռքը գլուխիս տակ պիտի ըլլար, Եւ աջ ձեռքը զիս պիտի գրկէր։

ՍԻՐԱԿԱՆԸ

Ո՛վ Երուսաղէմի աղջիկներ, ձեզ կ’երդմնեցնեմ, Որ ⁴սիրուհիս չսթափեցնէք եւ չարթնցնէք, Մինչեւ որ ինք փափաքի։

ՎԵՑԵՐՈՐԴ ԵՐԳ ԵՐՈՒՍԱՂԷՄԻ ԱՂՋԻԿՆԵՐԸ

Ո՞վ է ասիկա՝ որ անապատէն կը բարձրանայ, Իր սիրականին կռթնած։ Քեզ խնձորենիին տակ արթնցուցի. Հո՛ն քու մայրդ երկունքի ցաւ քաշեց քեզի համար, Հո՛ն քեզ ծնանողը երկունքի ցաւ քաշեց քեզի համար։

ՍԻՐՈՒՀԻՆ

Դի՛ր զիս քու սիրտիդ վրայ կնիքի պէս, Քու բազուկիդ վրայ՝ կնիքի պէս. Արդարեւ սէրը մահուան պէս զօրեղ է, Ու նախանձախնդրութիւնը՝ ⁵դժոխքին պէս անգութ. Անոր կայծերը սաստիկ բոցավառ կրակի կայծեր են։

Յորդառատ ջուրերը չեն կրնար սէրը մարել, Ու գետերը զայն չեն ընկղմեր. Եթէ մարդ մը սիրոյ փոխարէն տայ իր տան ամբողջ ստացուածքը, Զինք բոլորովին կ’արհամարհեն։

ՍԻՐՈՒՀԻԻՆ ԵՂԲԱՅՐՆԵՐԸ

Պզտիկ քոյր մը ունինք՝ Որ ⁶ստինք չունի. Մեր քրոջ ի՞նչ ընենք Իր մասին խօսուած օրը։

Եթէ ան պարիսպ է, Վրան արծաթէ ⁷աշտարակ մը կառուցանենք. Իսկ եթէ դուռ է, Զայն մայրիի փայտի տախտակներով ⁸փակենք։

ՍԻՐՈՒՀԻՆ

Ես պարիսպ եմ, Եւ ⁹ստինքներս աշտարակներ են. Ուստի անոր ¹⁰առջեւ Խաղաղութիւն ¹¹գտնողի պէս եղայ։

ՍԻՐԱԿԱՆԸ

Սողոմոն Բահաղ-Ամոնի մէջ այգի ունէր. Այգին պահապաններու յանձնեց, Իւրաքանչիւրը անոր պտուղին համար հազար կտոր արծաթ ¹²վճարելու էր։

Իմ այգիս՝ որ իմս է՝ ¹³ե՛ս կը պահպանեմ՝՝. Հազարը քուկդ ըլլայ, ո՛վ Սողոմոն, Ու երկու հարիւրը՝ անոր պտուղը պահպանողներուն։

Ո՛վ պարտէզներու մէջ նստող, Ընկերակիցները քու ձայնիդ ուշադիր են. Ինծի՛ ալ զայն լսել տուր։

ՍԻՐՈՒՀԻՆ

Փախի՛ր, ո՛վ իմ սիրականս. Նմանէ՛ այծեամին կամ եղնիկներու ձագին՝ Բուրաւէտ համեմներու լեռներուն վրայ։