Zechariah 4

Haggai  «  Zechariah 3  ‹  Zechariah 4  ›  Zechariah 5  »  Malachi

ԱՇՏԱՆԱԿԻՆ ՏԵՍԻԼՔԸ

Ինծի հետ խօսող հրեշտակը վերադարձաւ ու զիս արթնցուց՝ ինչպէս մէկը իր քունէն կ’արթնցնեն,

եւ ինծի ըսաւ. «Ի՞նչ կը տեսնես»։ Պատասխանեցի. «Ահա՛ կը տեսնեմ բոլորովին ոսկիէ աշտանակ մը, ու անոր գագաթը՝ բաժակ մը, որուն վրայ են իր եօթը ճրագները։ Անոր գագաթի եօթը ճրագներուն համար եօթը խողովակ կայ։

Անոր քով երկու ձիթենի կայ, մէկը բաժակին աջ կողմը, ու միւսը անոր ձախ կողմը»։

Պատասխանելով ինծի հետ խօսող հրեշտակին՝ ¹հարցուցի. «Ասոնք ի՞նչ են, իմ տէ՛րս»։

Ինծի հետ խօսող հրեշտակը պատասխանելով ինծի ըսաւ. «Ասոնց ինչ ըլլալը չե՞ս գիտեր»։ Ես ալ ըսի. «Ո՛չ, իմ տէ՛րս»։

ԱՍՏՈՒԾՈՅ ԽՈՍՏՈՒՄԸ ԶՕՐԱԲԱԲԷԼԻ

Ուստի պատասխանելով ինծի ըսաւ. «Ահա՛ւասիկ Տէրոջ խօսքը՝ որ Զօրաբաբէլի կ’ըսուի. “Ո՛չ կարողութեամբ է, ո՛չ ալ ոյժով, Հապա՝ իմ Հոգիովս,— կը յայտարարէ զօրքերու Տէրը։—

Դուն ո՞վ ես, ո՛վ մեծ լեռ, Զօրաբաբէլի առջեւ. լեռնադաշտ պիտի ըլլաս։ Երբ ²գլխաւոր քարը դուրս հանէ, Պիտի ³աղաղակեն. "Շնո՜րհք, շնո՜րհք անոր"”»։

Դարձեալ ⁴Տէրը խօսեցաւ՝՝ ինծի՝ ըսելով.

«Զօրաբաբէլի ձեռքերը հիմնադրեցին այս տունը, Եւ անոր ձեռքերը պիտի լրացնեն զայն, Ու պիտի գիտնաս թէ զօրքերու Տէրը զիս ձեզի ղրկած է։

Արդարեւ պզտիկ սկզբնաւորութիւններուն օրը արհամարհողները Պիտի ուրախանան՝ երբ տեսնեն անագաքարը Զօրաբաբէլի ձեռքին մէջ։ Այդ եօթը Տէրոջ աչքերն են, որ ամբողջ ⁵երկրագունդին մէջ կը շրջագային»։

Յետոյ անոր ⁶հարցուցի. «Աշտանակին աջ կողմը եւ անոր ձախ կողմը եղող այս երկու ձիթենիները ի՞նչ են»։

Երկրորդ անգամ ալ հարցուցի. «Ի՞նչ են երկու ձիթենիի ոստերը՝ ⁷երկու ոսկիէ խողովակներուն քով, որոնք՝՝ ⁸ոսկեգոյն իւղը իրենց մէջէն կը ⁹հոսեցնեն»։

Ինծի պատասխանեց. «Ասոնց ինչ ըլլալը չե՞ս գիտեր»։ Ես ալ ըսի. «Ո՛չ, իմ տէ՛րս»։

Ուստի պատասխանեց. «Ասոնք երկու ¹⁰օծեալներն են, որ ամբողջ երկրագունդին Տէրոջ առջեւ կը կայնին»։