Zechariah 5

Haggai  «  Zechariah 4  ‹  Zechariah 5  ›  Zechariah 6  »  Malachi

ԹՌՉՈՂ ՊԱՏԱՏԻՆ ՏԵՍԻԼՔԸ

Դարձեալ աչքերս վերցուցի, եւ ահա՛ թռչող պատատ մը տեսայ։

Հրեշտակը ինծի ըսաւ. «Ի՞նչ կը տեսնես»։ Պատասխանեցի. «Թռչող պատատ մը կը տեսնեմ. երկայնքը քսան կանգուն է, ու լայնքը՝ տասը կանգուն»։

Ինծի ըսաւ։ «Ահա՛ւասիկ անէծքը՝ որ ¹կը տարածուի՝՝ ամբողջ երկրի մակերեսին վրայ. արդարեւ ո՛վ որ գողնայ՝ պիտի ²բնաջնջուի այս կողմը գրուածին համեմատ, եւ ո՛վ որ երդում ընէ՝ պիտի բնաջնջուի միւս կողմը գրուածին համեմատ»։

«Զայն ե՛ս կը տարածեմ,— կը պատգամէ զօրքերու Տէրը.— ան պիտի մտնէ գողին տունը եւ իմ անունովս ³սուտ երդում ընողին տունը, իր տան մէջ պիտի ⁴մնայ, եւ զինք իր փայտերով ու քարերով պիտի սպառէ»։

ԿՈՂՈՎԻՆ ՄԷՋԻ ԿՆՈՋ ՏԵՍԻԼՔԸ

Յետոյ ինծի հետ խօսող հրեշտակը ⁵եկաւ եւ ինծի ըսաւ. «Այժմ վերցո՛ւր աչքերդ ու տե՛ս թէ ի՞նչ է ասիկա՝ որ դուրս կ’ելլէ»։

Պատասխանեցի. «Ի՞նչ է»։ Ըսաւ. «Ասիկա արդու մըն է՝ որ դուրս կ’ելլէ»։ Նաեւ ըսաւ. «Ահա՛ւասիկ անոնց ամբարշտութեան դրսերեւոյթը՝ ամբողջ երկրին մէջ»։

Եւ ահա՛ կապարէ ⁶զանգուած մը վերցուեցաւ, ու կին մը նստած էր արդուին մէջտեղը։

⁷Հրեշտակը ըսաւ. «Ահա՛ւասիկ ամբարշտութիւնը», եւ զայն արդուին մէջ նետեց. այդ կապարէ կշռաքարն ալ արդուին բերանը նետեց։

Աչքերս վերցուցի ու տեսայ թէ ահա՛ երկու կին դուրս ելաւ. հովը անոնց թեւերուն մէջ էր՝ քանի արագիլի թեւերու նման թեւեր ունէին, եւ արդուն երկրի ու երկինքի մէջտեղը վերցուցին։

Ինծի հետ խօսող հրեշտակին ըսի. Ասոնք ո՞ւր կը տանին արդուն»։

Ան ալ ինծի ըսաւ. «Կը տանին՝ որ անոր տուն կառուցանեն Սենաարի երկրին մէջ. պիտի հաստատուի, եւ հոն իր խարիսխին վրայ պիտի դրուի»։