Zechariah 6

Haggai  «  Zechariah 5  ‹  Zechariah 6  ›  Zechariah 7  »  Malachi

ՉՈՐՍ ԿԱՌՔԵՐՈՒՆ ՏԵՍԻԼՔԸ

Դարձեալ աչքերս վերցուցի ու տեսայ թէ ահա՛ երկու լեռներու մէջէն չորս կառք կ’ելլէր. լեռները պղինձէ լեռներ էին։

Առաջին կառքին շէկ ձիեր լծուած էին, երկրորդ կառքին՝ սեւ ձիեր,

երրորդ կառքին՝ ճերմակ ձիեր, եւ չորրորդ կառքին՝ գորշախայտ ու շառագոյն ձիեր։

¹Ինծի հետ խօսող հրեշտակին ըսի. «Ասոնք ի՞նչ են, իմ տէ՛րս»։

Հրեշտակը ինծի պատասխանեց. «Ասոնք ամբողջ ²երկրագունդի Տէրոջ ներկայութենէն դուրս կ’ելլեն դէպի երկինքի չորս հովերը։

Սեւ ձիերը՝ որ այդ կառքին լծուած են, դուրս կ’ելլեն դէպի հիւսիսի երկիրը. ճերմակները անոնց ետեւէն դուրս կ’ելլեն դէպի արեւմուտք, իսկ գորշախայտները դուրս կ’ելլեն դէպի հարաւի երկիրը»։

Երբ շառագոյնները դուրս ելան, ³կ’ուզէին երթալ ու երկրագունդին վրայ շրջիլ։ Ան ալ ըսաւ. «Գացէ՛ք, շրջեցէ՛ք երկրագունդին վրայ»։ Ուստի անոնք երկրագունդին վրայ շրջեցան։

Յետոյ ան ինծի աղաղակեց եւ ինծի ըսաւ. «Նայէ՛, դէպի հիւսիսի երկիրը դուրս ելլողները իմ հոգիս հանգստացուցին հիւսիսի երկրին մէջ»։

ՀՐԱՄԱՆ ՅԵՍՈՒՆ ՊՍԱԿԵԼՈՒ

Դարձեալ ⁴Տէրը խօսեցաւ՝՝ ինծի՝ ըսելով.

«Ընծանե՛ր առ տարագրութենէն վերադարձողներէն՝ Հեղդայէ, Տուբիայէ ու Յեդայիայէ, եւ նոյն օրը գնա՛ ու մտի՛ր Սոփոնիայի որդիին Յովսիայի տունը՝ ուր անոնք Բաբելոնէն հասած են։

Արծաթ ու ոսկի առնելով պսակնե՛ր շինէ, դի՛ր քահանայապետին՝ Յովսեդեկեան Յեսուի գլուխը,

եւ ըսէ՛ անոր. “Զօրքերու Տէրը կը խօսի ու սա՛ կը յայտարարէ. "Ահա՛ այն մարդը՝ որուն անունը Շառաւիղ է. Ան իր տեղին մէջ պիտի բուսնի, Եւ Տէրոջ տաճարը պիտի կառուցանէ։

Ի՛նք պիտի կառուցանէ Տէրոջ տաճարը, Փառաւորութիւն պիտի ⁵հագնի, Եւ իր գահին վրայ բազմելով պիտի տիրէ։ Իր գահին վրայ քահանայ ալ պիտի ըլլայ, Ու երկուքին միջեւ խաղաղութեան ⁶խորհուրդ պիտի ըլլայ"”»։

«Պսակները Հելէմի, Տուբիայի եւ Յեդայիայի, ու Սոփոնիայի որդիին՝ Հէնի պիտի ըլլան, Տէրոջ տաճարին մէջ յիշատակ ըլլալու համար։

Հեռու եղողները պիտի գան եւ Տէրոջ ⁷տաճարը պիտի կառուցանեն, ու պիտի գիտնաք թէ զօրքերու Տէրը զիս ձեզի ղրկած է։ Ասիկա պիտի ըլլայ, եթէ ուշադրութեամբ մտիկ ընէք Տէրոջ՝ ձեր Աստուծոյն ձայնը»։