Zechariah 7

Haggai  «  Zechariah 6  ‹  Zechariah 7  ›  Zechariah 8  »  Malachi

ԱՍՏՈՒԱԾ ԿԸ ՅԱՆԴԻՄԱՆԷ ԿԵՂԾ ԾՈՄԱՊԱՀՈՒԹԻՒՆԸ

Դարեհ թագաւորին չորրորդ տարին, իններորդ ամսուան՝ այսինքն Քասղեւի չորրորդ օրը, Տէրոջ խօսքը Զաքարիայի ¹ուղղուեցաւ,

երբ Սարասար, Ռեկէմ-Մելէք եւ անոնց մարդիկը Աստուծոյ տունը ղրկուեցան, որպէսզի Տէրոջ առջեւ պաղատին,

ու զօրքերու Տէրոջ տան մէջ եղող քահանաներուն եւ մարգարէներուն ըսեն. «Արդեօք հինգերորդ ամսուան մէջ լա՞մ՝ ²իմ անձս զրկելով՝՝, ինչպէս այսչափ տարիներ ըրի»։

Այն ատեն զօրքերու ³Տէրը խօսեցաւ՝՝ ինծի՝ ըսելով.

«Այս երկրին ամբողջ ժողովուրդին եւ քահանաներուն ըսէ՛. “Այս եօթանասուն տարիները, երբ հինգերորդ ու եօթներորդ ամիսներուն մէջ ծոմ կը պահէիք եւ կը հեծեծէիք, միթէ ինծի՞ համար ծոմ կը պահէիք։

Ու երբ կ’ուտէիք եւ կը խմէիք, ձեզի համար չէի՞ք ուտեր ու ձեզի համար չէի՞ք խմեր։

Ասոնք չե՞ն այն խօսքերը՝ որ Տէրը նախկին մարգարէներուն ⁴միջոցով յայտարարեց, երբ Երուսաղէմ եւ անոր շրջակայ քաղաքները բնակուած ու անդորր էին, եւ հարաւն ու դաշտագետինը բնակուած էին”»։

ԱՆՀՆԱԶԱՆԴՈՒԹԻՒՆԸ՝ ԱՔՍՈՐԻ ՊԱՏՃԱՌ

⁵Տէրը խօսեցաւ՝՝ Զաքարիայի՝ ըսելով. «Զօրքերու Տէրը սա՛ կը յայտարարէ.

“ ⁶Արդա՛ր դատ վարեցէք՝՝, եւ կարեկցութեա՛մբ ու գթութեա՛մբ վարուեցէք իրարու հետ։

Այրին եւ որբը, գաղթականն ու դժբախտը մի՛ հարստահարէք։ Ձեր սիրտին մէջ իրարու դէմ չարութիւն մի՛ մտածէք”»։

Բայց անոնք մերժեցին ուշադիր ըլլալ, հապա իրենց ուսը ըմբոստացուցին եւ ականջը ծանրացուցին՝ որպէսզի չլսեն։

Իրենց սիրտը ադամանդի պէս ⁷կարծրացուցին, որպէսզի չլսեն այն օրէնքն ու խօսքերը՝ որ զօրքերու Տէրը իր Հոգիով անոնց ղրկեց՝ նախկին մարգարէներուն միջոցով։ Հետեւաբար զօրքերու ⁸Տէրը մեծապէս զայրացաւ՝՝։

«Ինչպէս ինք ⁹գոչեց եւ անոնք մտիկ չըրին, այնպէս ալ անոնք գոչեցին ու ես մտիկ չըրի,— կը յայտարարէ զօրքերու Տէրը.—

հապա զանոնք իրենց անծանօթ բոլոր ազգերուն մէջ մրրիկով ցրուեցի, եւ անոնց ետեւէն երկիրը ամայացաւ, այնպէս որ ո՛չ ¹⁰գացող կար, ո՛չ ալ ¹¹եկող. այդ ցանկալի երկիրը ամայացուցին»։