Zechariah 8

Haggai  «  Zechariah 7  ‹  Zechariah 8  ›  Zechariah 9  »  Malachi

ԱՍՏՈՒԱԾ ԿԸ ԽՈՍՏԱՆԱՅ ԵՐՈՒՍԱՂԷՄԸ ՎԵՐԱԿԱՆԳՆԵԼ

Դարձեալ զօրքերու ¹Տէրը խօսեցաւ՝՝ ինծի՝ ըսելով.

«Զօրքերու Տէրը սա՛ կը յայտարարէ. “Սիոնի համար ²չափազանց նախանձախնդիր եղայ՝՝. անոր համար մեծ ցասումով նախանձախնդիր եղայ”»։

«Տէրը սա՛ կը յայտարարէ. “Սիոնի վերադարձած եմ, ու Երուսաղէմի մէջ պիտի բնակիմ. Երուսաղէմ "Ճշմարտութեան քաղաք" պիտի կոչուի, եւ զօրքերու Տէրոջ լեռը՝ "Սուրբ լեռ"”»։

«Զօրքերու Տէրը սա՛ կը յայտարարէ. “Երուսաղէմի հրապարակներուն մէջ դարձեալ ծեր մարդիկ ու պառաւ կիներ պիտի նստին, իւրաքանչիւրը ձեռքը ունենալով իր ցուպը՝ ³յառաջացած տարիքի՝՝ պատճառով։

Քաղաքին հրապարակները տղեկներով եւ աղջնակներով պիտի լեցուին, որոնք անոր հրապարակներուն մէջ պիտի խաղան”»։

«Զօրքերու Տէրը սա՛ կը յայտարարէ. “Եթէ այդ օրերը ասիկա ⁴դժուար թուի՝՝ այս ժողովուրդին մնացորդին, միթէ ինծի՞ ալ դժուար պիտի թուի”, կը պատգամէ զօրքերու Տէրը»։

«Զօրքերու Տէրը սա՛ կը յայտարարէ. “Ահա՛ իմ ժողովուրդս պիտի փրկեմ արեւելեան երկրէն եւ արեւմտեան երկրէն.

զանոնք պիտի բերեմ, ու Երուսաղէմի մէջ պիտի բնակին։ Անոնք իմ ժողովուրդս պիտի ըլլան, ես ալ ճշմարտութեամբ եւ արդարութեամբ անոնց Աստուածը պիտի ըլլամ”։»

«Զօրքերու Տէրը սա՛ կը յայտարարէ. “Ձեր ձեռքերը թող ուժովնան, ո՛վ դուք՝ որ այս օրերս կը լսէք այս խօսքերը այն մարգարէներուն բերանէն, որոնք խօսեցան զօրքերու Տէրոջ տան հիմնադրութեան օրը, որպէսզի տաճարը կառուցանուի։

Արդարեւ այդ օրերէն առաջ մարդու համար վարձք չկար եւ անասունի համար վարձք չկար, ու տագնապին պատճառով՝ ելլողին եւ մտնողին խաղաղութիւն չկար, քանի ես բոլոր մարդիկը իրարու դէմ արձակեր էի։

Բայց հիմա այս ժողովուրդին մնացորդին՝ նախկին օրերուն պէս պիտի չըլլամ, կը պատգամէ զօրքերու Տէրը։

Արդարեւ ⁵սերմանումը արդիւնաւոր՝՝ պիտի ըլլայ. որթատունկը իր պտուղը պիտի տայ, գետինը իր արգասիքը պիտի տայ, երկինքը իր ցօղը պիտի տայ, եւ այս բոլորը այս ժողովուրդին մնացորդին ժառանգել պիտի տամ։

Ինչպէս դուք ⁶ազգերուն մէջ անէծք եղաք, ո՛վ Յուդայի տունը եւ Իսրայէլի տունը, այնպէս ձեզ պիտի փրկեմ, եւ օրհնութիւն պիտի ըլլաք։ Մի՛ վախնաք, ձեր ձեռքերը թող ուժովնան”»։

«Արդարեւ զօրքերու Տէրը սա՛ կը յայտարարէ. “Ինչպէս խորհեցայ ձեզի չարիք ընել, երբ ձեր հայրերը զիս զայրացուցին,— կը յայտարարէ զօրքերու Տէրը,— ու չհրաժարեցայ,

այնպէս եւ այս օրերը որոշեցի դարձեալ բարիք ընել Երուսաղէմի ու Յուդայի տան. մի՛ վախնաք։

Ահա՛ւասիկ ձեր ընելիքները.— ճշմարտութի՛ւնը խօսեցէք իրարու հետ, ⁷արդարութեա՛մբ եւ խաղաղութեա՛մբ ⁸դատ վարեցէք՝՝ ձեր դռներուն մէջ.

ձեր սիրտին մէջ իրարու դէմ չարութիւն մի՛ մտածէք, ու ⁹սուտ երդումը մի՛ սիրէք. արդարեւ ես այս բոլորը կ’ատեմ”», կը պատգամէ Տէրը։

Դարձեալ զօրքերու ¹⁰Տէրը խօսեցաւ՝՝ ինծի՝ ըսելով.

«Զօրքերու Տէրը սա՛ կը յայտարարէ. “Չորրորդ ամսուան ծոմը, հինգերորդին ծոմը, եօթներորդին ծոմն ու տասներորդին ծոմը Յուդայի տան բերկրանք, ուրախութիւն եւ զուարթալից հանդիսաւոր տօներ պիտի ըլլան. ուստի ճշմարտութի՛ւնն ու խաղաղութի՛ւնը սիրեցէք”»։

«Զօրքերու Տէրը սա՛ կը յայտարարէ. “Դարձեալ ժողովուրդներ եւ շատ քաղաքներու բնակիչներ պիտի գան։

Մէկուն բնակիչները միւսին պիտի երթան ու ըսեն. "Եկէ՛ք, երթանք Տէրոջ առջեւ պաղատելու եւ զօրքերու Տէրը փնտռելու. ես ալ պիտի երթամ"։

Ուստի շատ ժողովուրդներ ու հզօր ազգեր պիտի գան՝ Երուսաղէմի մէջ զօրքերու Տէրը փնտռելու եւ Տէրոջ առջեւ պաղատելու”»։

«Զօրքերու Տէրը սա՛ կը յայտարարէ. “Այդ օրերը՝ ազգերուն բոլոր լեզուներէն տասը մարդ մէկուն քղանցքը պիտի բռնէ, այսինքն Հրեայ եղող մէկու մը քղանցքը պիտի բռնեն եւ ըսեն. "Ձեզի հետ երթանք, քանի որ լսեցինք թէ Աստուած ձեզի հետ է"”»։