Zechariah 9

Haggai  «  Zechariah 8  ‹  Zechariah 9  ›  Zechariah 10  »  Malachi

ԴՐԱՑԻ ԱԶԳԵՐՈՒՆ ԴԱՏԱՍՏԱՆԸ

Հադրաքի երկրին դէմ Տէրոջ խօսքին պատգամը.— Դամասկոս ¹անոր հանգստավայրը պիտի ըլլայ. (Քանի որ Տէրոջ աչքը մարդոց Եւ Իսրայէլի բոլոր տոհմերուն ²կը նայի՝՝.)

Եմաթ ալ անոր սահմանակից է, Նաեւ Տիւրոս ու Սիդոն, թէեւ շատ իմաստուն են։

Տիւրոս իրեն ³ամրոց կառուցանեց. Արծաթը հողի պէս դիզեց, Եւ ընտիր ոսկին՝ փողոցներու ցեխին պէս։

Ահա՛ Տէրը ⁴անոր պիտի տիրանայ՝՝, Անոր ոյժը ծովուն մէջ պիտի ⁵նետէ, Եւ ան կրակով պիտի սպառի։

Ասկաղոն պիտի տեսնէ ու վախնայ. Գազա ալ, ու մեծապէս ⁶պիտի տանջուի՝՝. Ակկարոն ալ, քանի իր յոյսը ⁷պարապ պիտի ելլէ՝՝։ Գազայէն թագաւորը պիտի կորսուի, Եւ Ասկաղոն ⁸բնակիչ պիտի չունենայ՝՝։

Ազովտոսի մէջ ⁹օտարազգի պիտի բնակի, Ու Փղշտացիներուն ամբարտաւանութիւնը պիտի ջնջեմ.

Անոնց արիւնը իրենց բերանէն պիտի վերցնեմ, Եւ անոնց պղծութիւնները՝ իրենց ակռաներուն մէջէն. Իսկ ո՛վ որ մնայ՝ ինք ալ մեր Աստուծոյն պիտի ըլլայ, Յուդայի մէջ պետի պէս պիտի ըլլայ, Եւ Ակկարոն՝ Յեբուսացիի պէս։

Իմ տանս շուրջը պիտի բանակիմ՝ ¹⁰Գացող ու եկող՝՝ զօրքին պատճառով. Անգա՛մ մըն ալ անոնց մէջէն ճնշող պիտի չանցնի, Որովհետեւ հիմա իմ աչքերովս կը ¹¹հսկեմ։

ԱՊԱԳԱՅ ԹԱԳԱՒՈՐԸ

Մե՛ծապէս խայտա, ո՛վ Սիոնի աղջիկ, Ցնծութեա՛մբ գոչէ, ո՛վ Երուսաղէմի աղջիկ. Ահա՛ Թագաւորդ քեզի կու գայ. Ան արդար է, ու փրկիչ. Հեզ է, եւ իշու վրայ հեծած, Իշու ձագի՝ աւանակի վրայ։

Եփրեմէն կառքը պիտի ջնջեմ, Ու Երուսաղէմէն՝ ձին. Պատերազմին աղեղը պիտի կոտրտուի, Եւ ան խաղաղութիւն պիտի յայտարարէ ¹²ազգերուն. Անոր տէրութիւնը ծովէ ծով պիտի ըլլայ, Գետէն մինչեւ երկրին ծայրերը։

ԱՍՏՈՒԾՈՅ ԺՈՂՈՎՈՒՐԴԻՆ ՎԵՐԱՀԱՍՏԱՏՈՒՄԸ

Քեզի ալ սա՛ ըրի. քեզի հետ արիւնով կնքուած ուխտին պատճառով՝ Քու բանտարկեալներդ ջուր չունեցող գուբէն արձակեցի։

Ամրո՛ցը վերադարձէք, ո՛վ յոյսի բանտարկեալներ. Ես այսօր իսկ կը յայտարարեմ Թէ քեզի կրկնապատիկ պիտի հատուցանեմ,

Որովհետեւ Յուդան ինծի համար աղեղի պէս պիտի լարեմ, Ու Եփրեմով աղեղս պիտի լեցնեմ. Քու որդիներդ, ո՛վ Սիոն, Պիտի գրգռեմ քու որդիներուդ դէմ ո՛վ Յունաստան, Եւ քեզ զօրաւորին սուրին պէս պիտի ընեմ։

Տէրը անոնց վրայ պիտի երեւնայ, Անոր նետը փայլակի պէս պիտի ¹³ժայթքէ. Տէրը՝ Եհովան շեփոր պիտի հնչեցնէ, Ու հարաւի մրրիկներով պիտի շրջի։

Զօրքերու Տէրը զանոնք պիտի պաշտպանէ, Եւ անոնք պիտի սպառեն, Պարսաքարերով պիտի նուաճեն. Պիտի խմեն ու ¹⁴գինովի պէս՝՝ պիտի գոռան. Անոնք կոնքի պէս պիտի լեցուին, Զոհասեղանին անկիւններուն պէս։

Այդ օրը Տէրը՝ անոնց Աստուածը Զանոնք իր ժողովուրդին հօտին պէս պիտի փրկէ, Քանի որ անոր ¹⁵երկրին վրայ պիտի ¹⁶փայլին՝ ¹⁷թագի քարերու պէս։

Արդարեւ ի՜նչ մեծ է անոր բարութիւնը, ի՜նչ մեծ է անոր գեղեցկութիւնը. Ցորենը երիտասարդները պիտի մեծցնէ, ու քաղցուն՝ կոյսերը։