Zechariah 10

Haggai  «  Zechariah 9  ‹  Zechariah 10  ›  Zechariah 11  »  Malachi

ԱՍՏՈՒԱԾ ԱԶԱՏՈՒԹԻՒՆ ԿԸ ԽՈՍՏԱՆԱՅ

Տէրոջմէ՛ն անձրեւ խնդրեցէք Վերջին անձրեւին ատենը. Տէ՛րը փայլակներ պիտի պատրաստէ Եւ ¹առատ անձրեւ՝՝ տայ ²ձեզի, Ու բոյս՝ իւրաքանչիւրին արտին մէջ։

Արդարեւ ³ընտանեկան կուռքերը՝՝ ունայնութիւն խօսեցան, Դիւթերը ստութիւն տեսան Եւ սնոտի երազներ պատմեցին. Զուր տեղը կը մխիթարեն։ Հետեւաբար ժողովուրդը ⁴հօտերու պէս մեկնեցաւ՝՝, Հովիւ չըլլալուն համար տառապեցաւ։

«Հովիւներուն դէմ իմ բարկութիւնս բորբոքեցաւ, Ու նոխազները պիտի ⁵պատժեմ. Արդարեւ զօրքերու Տէրը պիտի այցելէ իր հօտին՝ Յուդայի տան, Եւ զանոնք պատերազմի մէջ իր հեծած փառաւոր ձիուն պէս պիտի ընէ։

Անկէ պիտի ելլէ ⁶անկիւնը, անկէ՝ ⁷բեւեռը, Անկէ՝ պատերազմի աղեղը, Բոլոր ճնշողները միասին։

Անոնք պատերազմի մէջ զօրաւոր մարդոց պէս պիտի ըլլան, Որոնք թշնամին կը կոխկռտեն փողոցներու ցեխին մէջ. Անոնք պիտի պայքարին, Քանի որ Տէրը իրենց հետ պիտի ըլլայ. Ձիերու վրայ հեծնողները ամօթահար պիտի ըլլան։

Յուդայի տունը պիտի զօրացնեմ, Յովսէփի տունը պիտի փրկեմ, Ու զանոնք ⁸պիտի վերահաստատեմ՝՝, Քանի որ անոնց գթացի. Անոնք այնպէս պիտի ըլլան՝ Որպէս թէ զանոնք մերժած չէի. Արդարեւ ե՛ս եմ Տէրը՝ անոնց Աստուածը, Եւ անոնց պիտի պատասխանեմ։

Եփրեմ զօրաւոր մարդու պէս պիտի ըլլայ. Անոնց սիրտը պիտի ուրախանայ՝ որպէս թէ գինիով. Անոնց որդիներն ալ պիտի տեսնեն եւ ուրախանան։. Անոնց սիրտը Տէրոջմով պիտի խայտայ։

Անոնց պիտի սուլեմ ու զանոնք պիտի հաւաքեմ, Որովհետեւ զանոնք փրկեցի. Անոնք պիտի բազմանան՝ ինչպէս բազմացած էին։

Զանոնք ժողովուրդներու մէջ պիտի ⁹ցրուեմ, Սակայն հեռաւոր տեղերու մէջ զիս պիտի յիշեն. Իրենց որդիներուն հետ պիտի ապրին, եւ պիտի վերադառնան։

Եգիպտոսի երկրէն պիտի վերադարձնեմ զանոնք, Ասորեստանէն պիտի հաւաքեմ զանոնք, Ու Գաղաադի երկիրը Եւ Լիբանան պիտի բերեմ զանոնք, Ու բաւական տեղ պիտի չգտնուի անոնց համար։

Ծովէն տագնապով պիտի անցնի, Ծովուն ալիքները պիտի զարնէ. ¹⁰Գետին բոլոր խորխորատները պիտի ցամքին, Ասորեստանի ամբարտաւանութիւնը պիտի իջնէ, Ու Եգիպտոսի մականը պիտի ¹¹վերցուի։

Զանոնք Տէրոջմով պիտի զօրացնեմ, Եւ անոր անունով պիտի ընթանան», կը պատգամէ Տէրը։