Daniel 1

Ezekiel  «  Ezekiel 48  ‹  Daniel 1  ›  Daniel 2  »  Hosea

ԴԱՆԻԷԼԻ ԵՒ ԸՆԿԵՐԱԿԻՑՆԵՐՈՒՆ ՊԱՏՄՈՒԹԻՒՆԸ (1. 1-6. 28) ԻՍՐԱՅԵԼԱՑԻ ԵՐԻՏԱՍԱՐԴՆԵՐ ՆԱԲՈՒԳՈԴՈՆՈՍՈՐԻ ՊԱԼԱՏԻՆ ՄԷՋ

Յուդայի թագաւորին՝ Յովակիմի թագաւորութեան երրորդ տարին, Բաբելոնի Նաբուգոդոնոսոր թագաւորը Երուսաղէմ եկաւ ու զայն պաշարեց։

Տէրը անոր ձեռքը մատնեց Յուդայի Յովակիմ թագաւորը, եւ Աստուծոյ տան անօթներուն մէկ մասը։ Ան զանոնք Սենաարի երկիրը՝ իր աստուծոյն տունը տարաւ, ու անօթները իր աստուծոյն գանձատունը դրաւ։

Թագաւորը իր պալատականներու պետին՝ Ասփանէզի ըսաւ որ Իսրայէլի որդիներէն — թագաւորական զարմէն եւ մեծամեծներէն — բերէ

ո՛չ մէկ արատ ունեցող, վայելուչ տեսքով եւ ամէն իմաստութեան ¹հմուտ, գիտութեան ²տեղեակ, ³հանճարեղ, ու թագաւորին պալատին մէջ ⁴պաշտօնավարելու կարողութիւն ունեցող ⁵տղաներ, եւ անոնց՝ Քաղդէացիներու գիրն ու լեզուն սորվեցնէ։

Թագաւորը անոնց օրական ⁶բաժին սահմանեց՝ թագաւորին համեղ ճաշէն եւ իր խմած գինիէն, որպէսզի զանոնք երեք տարի ⁷սնուցանէ, յետոյ թագաւորին ⁸պաշտօնեայ ըլլան՝՝։

Անոնց մէջ էին Յուդայի որդիներէն՝ Դանիէլ, Անանիա, Միսայէլ ու Ազարիա։

Պալատականներուն պետը անոնց անուններ դրաւ. Դանիէլի՝ Բաղտասասար անունը դրաւ, Անանիայի՝ Սեդրաք, Միսայէլի՝ Միսաք եւ Ազարիայի՝ Աբեդնագով։

Դանիէլ ⁹որոշեց որ թագաւորին համեղ ճաշովն ու անոր խմած գինիով չպղծուի. ուստի պալատականներու պետին թախանձեց, որ ասոնցմով ինքզինք չպղծէ։

Աստուած պալատականներու պետին առջեւ Դանիէլի կարեկցութիւն եւ գթութիւն գտնել տուաւ։

Պալատականներուն պետը Դանիէլի ըսաւ. «Ես կը վախնամ իմ տիրոջմէս՝ թագաւորէն, որ ձեր ուտելիքն ու խմելիքը սահմանեց. արդարեւ ինչո՛ւ ան ձեր երեսները ձեզի հասակակից եղող միւս տղաներուն երեսներէն աւելի տխուր տեսնէ. թագաւորին առջեւ գլուխս պիտի վտանգէք»։

Դանիէլ ըսաւ ¹⁰վերահսկիչին, որ պալատականներուն պետը Դանիէլի, Անանիայի, Միսայէլի եւ Ազարիայի վրայ նշանակեր էր.

«Կ’աղերսե՛մ, քու ծառաներդ փորձարկէ՛ տասը օր. մեզի ընդեղէն թող տրուի՝ ուտելու համար, եւ ջուր՝ խմելու համար։

Յետոյ մեր ¹¹դէմքին ու թագաւորին համեղ ճաշը ուտող տղաներուն դէմքին թող նային քու առջեւդ, եւ ինչ որ տեսնես՝ անո՛ր համեմատ վարուէ քու ծառաներուդ հետ»։

Ան ալ իրենց այս խօսքը մտիկ ըրաւ, ու զանոնք տասը օր փորձարկեց։

Տասը օր ետք՝ անոնց դէմքը թագաւորին համեղ ճաշը ուտող բոլոր տղաներուն դէմքէն աւելի վայելչագեղ եւ ¹²գէր երեւցաւ։

Ուստի վերահսկիչը անոնց համեղ ճաշն ու խմելիք գինին կը վերցնէր, եւ իրենց ընդեղէն կու տար։

Աստուած այս չորս տղաներուն՝ ամէն գրագրութեան ու իմաստութեան մէջ գիտութիւն եւ ուշիմութիւն տուաւ։ Դանիէլ ամէն տեսիլք ու երազ կ’ըմբռնէր։

¹³Երբ լրացան այն օրերը՝ որոնցմէ ետք՝՝ թագաւորը հրամայեր էր որ զանոնք իրեն տանի, պալատականներուն պետը զիրենք Նաբուգոդոնոսորի առջեւ տարաւ։

Թագաւորը անոնց հետ խօսեցաւ, եւ անոնց բոլորին մէջ ո՛չ մէկը գտնուեցաւ Դանիէլի, Անանիայի, Միսայէլի ու Ազարիայի պէս. ուստի անոնք թագաւորին պաշտօնեայ եղան։

Երբ թագաւորը զանոնք ¹⁴հարցաքննեց իմաստութեան եւ խելացութեան վերաբերեալ բոլոր խնդիրներուն մասին, զիրենք իր ամբողջ թագաւորութեան մէջ եղող բոլոր մոգերէն ու աստղագէտներէն տասնապատիկ գերազանց գտաւ։

Եւ Դանիէլ մինչեւ Կիւրոս թագաւորին առաջին տարին ¹⁵պաշտօնավարեց։