Daniel 2

Ezekiel  «  Daniel 1  ‹  Daniel 2  ›  Daniel 3  »  Hosea

ՆԱԲՈՒԳՈԴՈՆՈՍՈՐԻ ԵՐԱԶԸ

Նաբուգոդոնոսորի թագաւորութեան երկրորդ տարին՝ Նաբուգոդոնոսոր երազներ տեսաւ, եւ անոր հոգին խռովեցաւ ու քունը փախաւ։

Ուստի թագաւորը հրամայեց որ մոգերը, աստղագէտները, կախարդներն ու ¹քաղդեաները կանչեն, որպէսզի թագաւորին բացատրեն իր երազները. անոնք ալ եկան եւ թագաւորին առջեւ կայնեցան։

Թագաւորը անոնց ըսաւ. «Երազ մը տեսայ, ու հոգիս խռովեցաւ. կ’ուզեմ այդ երազը հասկնալ»։

Քաղդեաները թագաւորին ²ասորերէն ըսին. «Ո՛վ թագաւոր, յաւիտեա՛ն ապրէ. ըսէ՛ երազը քու ծառաներուդ, եւ մենք անոր մեկնութիւնը պիտի պարզենք»։

Թագաւորը պատասխանելով քաղդեաներուն ըսաւ. «³Հրամանը ինձմէ յայտարարուեցաւ. եթէ երազն ու անոր մեկնութիւնը ինծի չգիտցնէք, դուք կտոր-կտոր պիտի ըլլաք, եւ ձեր տուները աղբակոյտ պիտի ըլլան։

Բայց եթէ երազն ու անոր մեկնութիւնը ինծի պարզէք, ինձմէ պարգեւներ, ձեռաձիրներ եւ շատ պատիւ պիտի ընդունիք։ Ուրեմն երազն ու անոր մեկնութիւնը պարզեցէ՛ք ինծի»։

Անոնք երկրորդ անգամ պատասխանելով ըսին. «Թագաւորը թող ըսէ երազը իր ծառաներուն, ու անոր մեկնութիւնը պիտի պարզենք»։

Թագաւորը պատասխանեց. «Ես ստոյգ գիտեմ թէ դուք կ’ուզէք ժամանակ ⁴շահիլ, որովհետեւ կը տեսնէք թէ հրամանը ինձմէ յայտարարուած է։

Բայց եթէ դուք երազը ինծի չգիտցնէք, ձեզի համար մէկ ⁵վճիռ կայ, քանի որ դուք ձեր մէջ որոշեր էք իմ առջեւս սուտ եւ զեղծ խօսք մը ըսել՝ մինչեւ որ ժամանակը փոխուի։ Ուստի ըսէ՛ք ինծի երազը, որպէսզի գիտնամ թէ պիտի կարենաք անոր մեկնութիւնը պարզել»։

Քաղդեաները թագաւորին առջեւ պատասխանելով ըսին. «Երկրի վրայ չկայ մարդ մը, որ կարենայ թագաւորին պահանջած բանը պարզել. հետեւաբար ո՛չ մէկ թագաւոր, ⁶նախարարապետ կամ կառավարիչ այսպիսի բան պահանջած չէ ոեւէ մոգէ, կամ աստղագէտէ, կամ քաղդեայէ։

Թագաւորին պահանջած բանը հազուագիւտ է. ո՛չ մէկը կայ՝ որ զայն թագաւորին առջեւ պարզէ, բացի աստուածներէն, որոնք մարդկային մարմինի մէջ չեն բնակիր»։

ԱՍՏՈՒԱԾ ԴԱՆԻԷԼԻ ԿԸ ՑՈՒՑՆԷ ԵՐԱԶՆ ՈՒ ՆՇԱՆԱԿՈՒԹԻՒՆԸ

Այս պատճառով թագաւորը սրդողեցաւ եւ յոյժ զայրացաւ, ու հրամայեց որ Բաբելոնի իմաստունները կորսնցնեն։

Հրովարտակը ⁷հրատարակուեցաւ, եւ իմաստունները պիտի մեռցուէին. ուստի փնտռեցին Դանիէլն ու անոր ընկերակիցները, որպէսզի մեռցնեն։

Այն ատեն Դանիէլ ⁸խոհեմութեամբ եւ ⁹ուշիմութեամբ պատասխանեց թագաւորին թիկնապահապետին՝ Արիովքի, որ դուրս ելած էր՝ Բաբելոնի իմաստունները մեռցնելու։

Թագաւորին ղեկավարին՝ Արիովքի խօսելով ըսաւ. «Ինչո՞ւ այսչափ շտապողական է թագաւորին հրովարտակը»։ Այն ատեն Արիովք բանը Դանիէլի գիտցուց։

Դանիէլ մտաւ ու թագաւորէն խնդրեց որ իրեն ժամանակ տայ, որպէսզի մեկնութիւնը թագաւորին պարզէ։

Ապա Դանիէլ իր տունը գնաց, եւ այս բանը իր ընկերակիցներուն՝ Անանիայի, Միսայէլի ու Ազարիայի գիտցուց,

որպէսզի այս գաղտնիքին մասին երկինքի Աստուծոյ գթութիւնը խնդրեն, եւ Դանիէլն ու անոր ընկերակիցները Բաբելոնի միւս իմաստուններուն հետ չկորսուին։

Գաղտնիքը գիշերը՝ տեսիլքի մէջ Դանիէլի յայտնուեցաւ. այն ատեն Դանիէլ երկինքի Աստուածը օրհնեց։

Դանիէլ խօսեցաւ՝ ըսելով. «Աստուծոյ անունը օրհնեա՜լ ըլլայ ¹⁰դարէ դար՝՝, որովհետեւ իմաստութիւնն ու զօրութիւնը անորն են։

Ի՛նք է ժամանակներն ու ¹¹եղանակները փոխողը, թագաւորներ վար առնողն ու թագաւորներ հաստատողը. ի՛նք իմաստուններուն իմաստութիւն կու տայ, եւ ¹²հանճարեղներուն՝ գիտութիւն՝՝։

Խորունկ ու ծածուկ բաները ի՛նք կը յայտնէ, խաւարին մէջ եղածը գիտէ, եւ լոյսը իր քով կը բնակի։

Ես քեզմէ շնորհակալ եմ ու քեզ կը դրուատեմ, ո՛վ հայրերուս Աստուածը, որ ինծի իմաստութիւն եւ զօրութիւն տուիր, ու հիմա ինծի գիտցուցիր ինչ որ քեզմէ խնդրեցինք, քանի որ թագաւորին պահանջած բանը մեզի գիտցուցիր»։

ԴԱՆԻԷԼ ԿԸ ՊԱՏՄԷ ԵՒ ԿԸ ՄԵԿՆԷ ԹԱԳԱՒՈՐԻՆ ԵՐԱԶԸ

Ուստի Դանիէլ Արիովքի քով մտաւ, որ թագաւորը նշանակած էր Բաբելոնի իմաստունները կորսնցնելու համար. գնաց եւ անոր սա՛ ըսաւ. «Բաբելոնի իմաստունները մի՛ կորսնցներ. զիս տա՛ր թագաւորին առջեւ, որ մեկնութիւնը թագաւորին պարզեմ»։

Այն ատեն Արիովք արտորալով Դանիէլը թագաւորին առջեւ տարաւ, ու անոր սա՛ ըսաւ. «Յուդայի ¹³տարագիրներէն ¹⁴մարդ մը գտայ, որ մեկնութիւնը պիտի գիտցնէ թագաւորին»։

Թագաւորը պատասխանելով ըսաւ Դանիէլի, որուն անունը Բաղտասասար դրուած էր. «Դուն կարո՞ղ ես իմ տեսած երազս եւ անոր մեկնութիւնը ինծի գիտցնել»։

Դանիէլ թագաւորին առջեւ պատասխանելով ըսաւ. «Թագաւորին հարցուցած գաղտնիքը՝ իմաստունները, աստղագէտները, մոգերն ու բախտ նայողները չեն կրնար թագաւորին պարզել։

Բայց երկինքի մէջ գաղտնիքները յայտնող Աստուած մը կայ, որ Նաբուգոդոնոսոր թագաւորին կը գիտցնէ ինչ որ վերջին օրերը պիտի պատահի։ Երազդ եւ անկողինիդ վրայ գլուխիդ տեսիլքը սա՛ է.—

դո՛ւն, ո՛վ թագաւոր, քու անկողինիդ վրայ կը մտածէիր թէ ասկէ ետք ի՛նչ պիտի պատահի. գաղտնիքները յայտնողը քեզի գիտցուց ինչ որ պիտի պատահի։

Ինչ կը վերաբերի ինծի, այս գաղտնիքը ինծի յայտնուեցաւ՝ ո՛չ թէ բոլոր ապրողներէն աւելի իմաստութիւն ունենալուս համար, հապա մեկնութիւնը թագաւորին գիտցնելու համար, որպէսզի դուն քու սիրտիդ մտածումները գիտնաս։

«Դո՛ւն, ո՛վ թագաւոր, կը նայէիր, եւ ահա՛ մեծ ¹⁵արձան մը տեսար։ Այս մեծ արձանը, որուն փառահեղութիւնը արտակարգ էր, քու դիմացդ կայնած էր, եւ անոր տեսքը սարսափելի էր։

Այս արձանին գլուխը զուտ ոսկիէ էր, անոր կուրծքն ու բազուկները՝ արծաթէ, ¹⁶փորը եւ ազդրերը՝ պղինձէ,

սրունքները՝ երկաթէ, իսկ ոտքերուն մէկ մասը՝ կաւէ։

Դուն կը նայէիր՝ մինչեւ որ քար մը անջատուեցաւ առանց ձեռքի, այդ արձանին երկաթէ ու կաւէ ոտքերուն զարկաւ, եւ զանոնք փշրեց։

Այն ատեն երկաթը, կաւը, պղինձը, արծաթն ու ոսկին միասին փշրուեցան, եւ ամառուան կալերուն թեփին պէս եղան. հովը զանոնք ¹⁷քշեց տարաւ՝՝, եւ ո՛չ մէկ տեղ գտնուեցաւ անոնց ¹⁸հետքը. իսկ արձանին զարնող քարը մեծ լեռ մը եղաւ, եւ ամբողջ երկիրը լեցուց։

Ա՛յս է երազը, ու թագաւորին առջեւ անոր մեկնութիւնը պիտի ըսենք։

«Դուն, ո՛վ թագաւոր, թագաւորներու թագաւոր ես, որովհետեւ երկինքի Աստուածը քեզի թագաւորութիւն, կարողութիւն, ոյժ ու պատիւ տուեր է։

Մարդոց որդիները, դաշտի գազաններն ու երկինքի թռչունները քու ձեռքդ յանձներ է՝ իրենց բնակած բոլոր տեղերուն մէջ, եւ քեզի տիրել տուեր է անոնց բոլորին վրայ. դո՛ւն ես այդ ոսկիէ գլուխը։

Քեզմէ ետք ուրիշ թագաւորութիւն մը պիտի ելլէ՝ քեզմէ ցած, եւ ուրիշ երրորդ թագաւորութիւն մը՝ պղինձէ, որ ամբողջ երկրին պիտի տիրէ։

Չորրորդ թագաւորութիւնը երկաթի պէս ամուր պիտի ըլլայ. ինչպէս երկաթը ամէն ինչ կը փշրէ ու կը մանրէ, ան ալ փշրելով պիտի կոտրէ՝ այս բոլորը կոտրող երկաթին պէս։

Քանի տեսար թէ ոտքերուն եւ մատներուն մէկ մասը բրուտի կաւէ է, ու միւս մասը՝ երկաթէ, այդ թագաւորութիւնը պիտի բաժնուի, բայց երկաթի պնդութենէն բաժին պիտի ունենայ, որովհետեւ երկաթը տղմուտ կաւի հետ խառնուած տեսար։

Ոտքերու մատներուն մէկ մասը երկաթէ եւ միւս մասը կաւէ ըլլալը կը նշանակէ թէ այդ թագաւորութեան մէկ մասը ամուր պիտի ըլլայ, իսկ միւս մասը՝ դիւրաբեկ։

Քանի տեսար թէ երկաթը տղմուտ կաւի հետ խառնուած է, անոնք մարդոց զարմին հետ պիտի խառնուին, բայց իրարու պիտի չփակչին, ինչպէս երկաթը կաւին հետ չի խառնուիր։

«Այդ թագաւորներուն օրերը՝ երկինքի Աստուածը թագաւորութիւն մը պիտի հաստատէ, որ երբեք պիտի չկործանի, եւ այս թագաւորութիւնը ուրիշ ժողովուրդի պիտի չթողուի։ Ան այս բոլոր թագաւորութիւնները պիտի փշրէ ու բնաջնջէ, եւ ինք յաւիտեան պիտի մնայ,

ինչպէս դուն տեսար թէ լեռնէն քար մը անջատուեցաւ՝ առանց ձեռքի, ու երկաթը, պղինձը, կաւը, արծաթը եւ ոսկին փշրեց։ Մեծ Աստուածը թագաւորին գիտցուց ինչ որ ասկէ ետք պիտի պատահի. երազը ստոյգ է, եւ անոր մեկնութիւնը՝ վստահելի»։

ԹԱԳԱՒՈՐԸ ԿԸ ՎԱՐՁԱՏՐԷ ԴԱՆԻԷԼԸ

Այն ատեն Նաբուգոդոնոսոր թագաւորը իր երեսին վրայ ինկաւ եւ Դանիէլի երկրպագեց, ու հրամայեց որ ընծայ եւ անոյշ հոտեր ¹⁹մատուցանեն անոր։

Թագաւորը Դանիէլի պատասխանելով ըսաւ. «Ճշմարտապէս ձե՛ր Աստուածն է աստուածներուն Աստուածը եւ թագաւորներուն Տէրը. ի՛նքն է գաղտնիքները յայտնողը, քանի որ դուն կրցար այս գաղտնիքը յայտնել»։

Ուստի թագաւորը մեծցուց Դանիէլը, եւ անոր բազմաթիւ մեծ պարգեւներ տուաւ. նաեւ զայն Բաբելոնի ամբողջ գաւառին վրայ կառավարիչ ու Բաբելոնի բոլոր իմաստուններուն վրայ նախարարապետ նշանակեց։

Դանիէլ թագաւորէն խնդրեց, եւ Բաբելոնի գաւառին ²⁰գործերուն վրայ Սեդրաքը, Միսաքն ու Աբեդնագովը նշանակեց. իսկ Դանիէլ թագաւորին ²¹պալատը կը մնար։