Daniel 7

Ezekiel  «  Daniel 6  ‹  Daniel 7  ›  Daniel 8  »  Hosea

ԴԱՆԻԷԼ ԿԸ ՆԿԱՐԱԳՐԷ ԻՐ ՏԵՍԻԼՔԸ (7. 1-12. 13) ՉՈՐՍ ԳԱԶԱՆՆԵՐՈՒՆ ՏԵՍԻԼՔԸ

Բաբելոնի Բաղտասար թագաւորին առաջին տարին՝ Դանիէլ երազ մը տեսաւ, եւ իր անկողինին վրայ՝ գլուխին տեսիլքները. յետոյ երազը գրեց ու գլխաւոր բաները պատմեց։

Դանիէլ խօսեցաւ՝ ըսելով. «Գիշերը տեսիլքիս մէջ տեսայ թէ ահա՛ երկինքի չորս հովերը մեծ ծովուն վրայ կը յարձակէին.

ու ծովէն չորս մեծ գազաններ ելան, որոնք իրարմէ տարբեր էին։

«Առաջինը առիւծի պէս էր, եւ արծիւի թեւեր ունէր։ Մինչ կը նայէի՝ անոր թեւերը փրցուեցան, երկրէն վերցուեցաւ, ու ոտքերուն վրայ կայնեցաւ՝ մարդու պէս, եւ անոր մարդու սիրտ տրուեցաւ։

«Յետոյ ահա՛ ուրիշ՝ երկրորդ գազան մը ելաւ, արջի նման, ու մէկ կողմին վրայ կայնեցաւ։ Երախը երեք կողոսկր ունէր՝ ակռաներուն մէջ, եւ սա՛ ըսին իրեն. “Ելի՛ր, շա՛տ միս լափէ”։

«Ասկէ ետք՝ կը նայէի, եւ ահա՛ ինձի նման ուրիշ մը ելաւ, որուն կռնակին վրայ չորս թռչունի թեւ կար։ Այս գազանը չորս գլուխ ունէր, ու անոր տէրութիւն յանձնուեցաւ։

«Ասկէ ետք՝ գիշերուան տեսիլքներու մէջ կը նայէի, եւ ահա՛ չորրորդ գազան մը ելաւ, որ սարսափելի, սոսկալի ու չափազանց հզօր էր։ Ան մեծ երկաթէ ակռաներ ունէր. կը լափէր, կը փշրէր, եւ մնացածը ոտքերով կը կոխկռտէր։ Իրմէ առաջ եղող բոլոր գազաններէն տարբեր էր, ու տասը եղջիւր ունէր։

Երբ եղջիւրները կը դիտէի, ահա՛ անոնց մէջ ուրիշ պզտիկ եղջիւր մը ելաւ, որուն առջեւ առաջին եղջիւրներէն երեքը արմատախիլ եղան. եւ ահա՛ այս եղջիւրին վրայ մարդու աչքերու պէս աչքեր կային, ու ¹անհեթեթութիւններ արտաբերող բերան մը»։

ՅԱՒԻՏԵԱՆ ԱՊՐՈՂԻՆ ՏԵՍԻԼՔԸ

«Մինչ կը դիտէի, գահեր դրուեցան եւ ²Վաղեմին բազմեցաւ։ Անոր հանդերձը ձիւնի պէս ճերմակ էր, ու գլուխին մազը՝ մաքուր բուրդի պէս. անոր գահը կրակի բոցի պէս էր, եւ ³անիւները՝ բոցավառ կրակի պէս։

Կրակի գետ մը կը հոսէր ու դուրս կ’ելլէր անոր առջեւէն. հազար հազարաւորներ անոր կը սպասարկէին, եւ բիւր բիւրաւորներ անոր առջեւ կը կայնէին։ ⁴Դատաւորները բազմեցան, ու գիրքերը բացուեցան։

Այն ատեն նայեցայ՝ այդ եղջիւրին արտաբերած ⁵անհեթեթութիւններուն ձայնին պատճառով. մինչ կը նայէի, գազանը սպաննուեցաւ, անոր մարմինը փճացաւ եւ բորբոքած կրակին մատնուեցաւ։

Ինչ կը վերաբերի միւս գազաններուն՝ տէրութիւնը իրենցմէ ետ առնուեցաւ, բայց եղանակ մը ու ժամանակ մը անոնց կեանքի երկարաձգում տրուեցաւ։

Մինչ կը նայէի գիշերուան տեսիլքներուն մէջ, ահա՛ մէկը ամպերով եկաւ՝ մարդու Որդիի նման, մինչեւ Վաղեմիին հասաւ, ու զինք անոր առջեւ մօտեցուցին։

Իրեն տէրութիւն, պատիւ եւ թագաւորութիւն յանձնուեցաւ, որպէսզի բոլոր ժողովուրդները, ազգերն ու լեզուները զինք պաշտեն։ Անոր տէրութիւնը յաւիտենական տէրութիւն է՝ որ պիտի չանցնի, եւ թագաւորութիւնը պիտի չկործանի»։

ՏԵՍԻԼՔՆԵՐԸ ԿԸ ԲԱՑԱՏՐՈՒԻՆ

«Ես՝ Դանիէլ, ⁶իմ ներսս վշտացայ հոգիով՝՝, ու տեսիլքներս զիս շփոթեցուցին։

Հոն կայնողներէն մէկուն մօտեցայ եւ այս բոլորին մասին ստոյգը հարցուցի անոր. ան ալ ինծի խօսեցաւ ու այս բաներուն մեկնութիւնը ինծի գիտցուց.

“Այս չորս մեծ գազանները չորս թագաւորներ են, որ երկրէ պիտի ելլեն։

Բայց Ամենաբարձրին սուրբե՛րը պիտի ստանան թագաւորութիւնը. անո՛նք պիտի տիրանան թագաւորութեան՝ յաւիտեան, ⁷դարէ դար՝՝”։

«Յետոյ ուզեցի ստոյգը գիտնալ չորրորդ գազանին մասին, որ միւս բոլորէն տարբեր էր, եւ արտակարգօրէն սարսափելի. անոր ակռաները երկաթէ էին, ու եղունգները՝ պղինձէ. ան կը լափէր, կը փշրէր, եւ մնացածը ոտքերով կը կոխկռտէր։

Նաեւ հարցուցի անոր գլուխին վրայ եղող տասը եղջիւրներուն մասին, ու միւսին մասին՝ որ ելաւ, եւ իր առջեւէն երեքը ինկան, այսինքն այն եղջիւրին մասին՝ որ աչքեր եւ անհեթեթութիւններ արտաբերող բերան ունէր, ու տեսքը ⁸միւսներէն աւելի մեծ էր։

Երբ կը դիտէի՝ այդ եղջիւրը սուրբերուն հետ պատերազմ ⁹մղեց եւ անոնց յաղթեց,

մինչեւ որ Վաղեմին եկաւ, ¹⁰դատավարութիւնը Ամենաբարձրին սուրբերուն յանձնուեցաւ, ու ժամանակը հասաւ՝ որ սուրբերը թագաւորութեան տիրանան։

Ան սա՛ ըսաւ. “Չորրորդ գազանը՝ երկրի վրայ չորրորդ թագաւորութիւն մը պիտի ըլլայ. ան բոլոր թագաւորութիւններէն տարբեր պիտի ըլլայ, եւ ամբողջ երկիրը պիտի լափէ, զայն պիտի կոխկռտէ ու փշրէ։

Այդ տասը եղջիւրները՝ տասը թագաւորներ են, որ այդ թագաւորութենէն պիտի ելլեն։ Անոնցմէ ետք ուրիշ մը պիտի ելլէ, որ առաջիններէն տարբեր պիտի ըլլայ, ու երեք թագաւոր պիտի տապալէ։

Ամենաբարձրին դէմ ¹¹անհեթեթութիւններ պիտի արտաբերէ, Ամենաբարձրին սուրբերը պիտի հիւծէ, ու պիտի ¹²մտադրէ ժամանակներ եւ օրէնքներ՝՝ փոխել։ ¹³Անոնք մինչեւ ժամանակ մը, ժամանակներ ու կէս ժամանակ անոր ձեռքը պիտի մատնուին։

Յետոյ դատաւորները պիտի բազմին, տէրութիւնը իրմէ ետ պիտի առնեն, զինք պիտի բնաջնջեն եւ վերջնականապէս կորսնցնեն։

Թագաւորութիւնն ու տէրութիւնը, եւ ամբողջ երկինքին տակ եղող թագաւորութիւններուն մեծութիւնը պիտի յանձնուին Ամենաբարձրին սուրբերու ժողովուրդին։ Անոր թագաւորութիւնը յաւիտենական թագաւորութիւն է, ու բոլոր տէրութիւնները զինք պիտի պաշտեն եւ իրեն հնազանդին”։

«Խօսքին վախճանը մինչեւ հոս է։ Իմ խորհուրդներս զիս՝ Դանիէլը յոյժ շփոթեցուցին. երեսիս գոյնը այլափոխուեցաւ, եւ այս խօսքը սիրտիս մէջ պահեցի»։