Daniel 11

Ezekiel  «  Daniel 10  ‹  Daniel 11  ›  Daniel 12  »  Hosea

«Իսկ ես, ¹Մարերու Դարեհ թագաւորին՝՝ առաջին տարին, կայնեցայ՝ որպէսզի զայն ²հաստատեմ ու զօրացնեմ։

Հիմա քեզի ճշմարտութիւնը պիտի յայտնեմ. “Ահա՛ Պարսկաստանի մէջ երեք թագաւոր ալ պիտի ելլէ, իսկ չորրորդը միւս բոլորէն աւելի մեծ հարստութիւն պիտի վաստկի։ Երբ իր հարստութեամբ ուժովնայ, ³բոլորը պիտի գրգռէ Յոյներու թագաւորութեան դէմ”»։

ԵԳԻՊՏԱԿԱՆ ՈՒ ՍՈՒՐԻԱԿԱՆ ԹԱԳԱՒՈՐՈՒԹԻՒՆՆԵՐԸ

«Յետոյ զօրաւոր թագաւոր մը պիտի ելլէ, ու մեծ ⁴իշխանութեամբ պիտի ղեկավարէ՝ իր կամքին համաձայն վարուելով։

Բայց երբ ելլէ, անոր թագաւորութիւնը պիտի փշրուի ու երկինքի չորս հովերուն բաժնուի. բայց ո՛չ իր յետնորդներուն պիտի փոխանցուի, ո՛չ ալ իր ղեկավարած ⁵իշխանութեան պէս պիտի ըլլայ. արդարեւ անոր թագաւորութիւնը պիտի խլուի, եւ ատոնցմէ ուրիշներուն պիտի փոխանցուի։

«Հարաւի թագաւորը պիտի ուժովնայ։ Բայց անոր իշխանաւորներէն մէկը իրմէ աւելի պիտի ուժովնայ, ու պիտի տիրէ. անոր տէրութիւնը աւելի մեծ տէրութիւն պիտի ըլլայ։

Տարիներ ետք՝ անոնք իրարու հետ պիտի դաշնակցին, որովհետեւ հարաւի թագաւորին աղջիկը հիւսիսի թագաւորին պիտի երթայ՝ ⁶հաշտութիւն կնքելու՝՝ համար, բայց բազուկի ոյժ պիտի ⁷չունենայ. այդ թագաւորը եւ անոր բազուկը պիտի չգոյատեւեն, հապա այդ աղջիկը պիտի մատնուի, նաեւ զինք բերողները, զինք ծնանողն ու զինք այդ ատենները ուժովցնողը։

«Բայց անոր արմատներուն ընձիւղներէն մէկը պիտի ելլէ իր տեղը. ան զօրագունդով պիտի գայ, եւ հիւսիսի թագաւորին ամրոցները պիտի մտնէ, անոնց դէմ պիտի ⁸պայքարի ու յաղթէ։

Նոյնիսկ անոնց աստուածները, ձուլածոյ կուռքերը, ոսկիէ եւ արծաթէ ⁹թանկագին անօթները իբր գերի Եգիպտոս պիտի տանի։ Ան ¹⁰աւելի տարիներ պիտի գոյատեւէ քան հիւսիսի թագաւորը՝՝,

որ հարաւի թագաւորին թագաւորութեան մէջ պիտի մտնէ, ապա իր ¹¹երկիրը պիտի վերադառնայ։

«Սակայն իր որդիները պիտի մաքառին, եւ շատ զօրքերու բազմութիւն պիտի հաւաքեն. անոնցմէ մէկը պիտի գայ, ¹²հեղեղի պէս՝՝ պիտի անցնի, յետոյ պիտի վերադառնայ ու մինչեւ անոր ամրոցը պիտի շարունակէ մաքառիլ։

Իսկ հարաւի թագաւորը պիտի ¹³մոլեգնի, դուրս պիտի ելլէ եւ անոր դէմ — հիւսիսի թագաւորին դէմ — պիտի պատերազմի։ Ան ալ մեծ բազմութիւն մը ոտքի պիտի հանէ, բայց բազմութիւնը ¹⁴հարաւի թագաւորին՝՝ ձեռքը պիտի մատնուի։

Երբ այդ բազմութիւնը փոխադրէ, իր սիրտը պիտի գոռոզանայ ու բիւրաւորներ պիտի տապալէ, բայց ¹⁵յաղթական պիտի չըլլայ՝՝։

Արդարեւ հիւսիսի թագաւորը պիտի վերադառնայ եւ նախորդէն աւելի մեծ բազմութիւն մը ոտքի պիտի հանէ, ու քանի մը տարիէն անշուշտ պիտի գայ մեծ զօրագունդով եւ շատ ինչքով։

«Այդ ատենները շատերը հարաւի թագաւորին ¹⁶պիտի ընդդիմանան՝՝. քու ժողովուրդիդ ¹⁷բռնաւորներն ալ պիտի ¹⁸ըմբոստանան՝ տեսիլքը ¹⁹գործադրելու համար, բայց պիտի գայթին։

Հիւսիսի թագաւորը պիտի գայ, հողաբլուրներ պիտի բարձրացնէ եւ պարսպապատ քաղաքները պիտի գրաւէ, ու հարաւի թագաւորին ²⁰զօրքերը եւ անոր ընտրեալները ²¹պիտի չընդդիմանան՝՝, ո՛չ ալ ընդդիմանալու ոյժ պիտի ունենան։

Անոր դէմ եկողը իր կամքին համաձայն պիտի վարուի. անոր ²²դիմադրող պիտի չըլլայ։ Փառաւոր երկրին մէջ պիտի կենայ, որ իր ձեռքով պիտի ²³կործանի։

Երեսը դէպի հարաւ ²⁴ուղղելով՝ իր թագաւորութեան ամբողջ ոյժով պիտի գայ, որպէսզի ²⁵հաշտութիւն կնքէ հարաւի թագաւորին հետ՝՝. այդպէս ալ պիտի ընէ՝ իր աղջիկը տալով անոր իբր կին, որպէսզի կործանէ անոր թագաւորութիւնը. բայց ատիկա կայուն պիտի չըլլայ, ու ²⁶պիտի չյաջողի՝՝։

Ապա իր երեսը դէպի կղզիները պիտի դարձնէ, եւ անոնցմէ շատերը պիտի գրաւէ։ Բայց մեծաւոր մը անոր նախատինքը պիտի դադրեցնէ, եւ առանց ինք նախատինք կրելու՝ զայն անոր պիտի վերադարձնէ։

Յետոյ ան երեսը դէպի իր երկրին ամրոցները պիտի դարձնէ, բայց պիտի գայթի, պիտի իյնայ, ու պիտի չգտնուի։

«Անոր տեղ մէկը պիտի ելլէ, որ հարկապահանջը պիտի ղրկէ իր թագաւորութեան ²⁷փառաւոր մասը՝՝։ Բայց ան պիտի ջախջախուի քանի մը օրուան մէջ, ո՛չ բարկութեամբ, ո՛չ ալ պատերազմով»։

ՍՈՒՐԻԱՅԻ ՉԱՐ ԹԱԳԱՒՈՐԸ

«Անոր տեղ արհամարհելի մէկը պիտի ելլէ, որուն թագաւորական պատիւ պիտի չտան. բայց ան ²⁸խաղաղութեամբ պիտի գայ, եւ շողոքորթութիւններով թագաւորութիւնը պիտի բռնագրաւէ։

Անոր առջեւ ²⁹ներխուժող զօրքերը՝՝ պիտի ընկղմին ու ջախջախուին, նոյնպէս ուխտին ³⁰իշխանը.

արդարեւ անոր հետ դաշնակցելէ ետք, խաբէութեամբ պիտի վարուի եւ ³¹փոքրաթիւ մարդոցմով պիտի յաղթէ՝՝։

³²Խաղաղութեան մէջ՝՝ գաւառին ամենէն բերրի վայրերը պիտի գայ, ու պիտի ընէ ինչ որ իր հայրերը չեն ըրած, ո՛չ ալ իր հայրերուն հայրերը։ Կողոպուտը, աւարն ու ինչքը պիտի բաշխէ ³³անոնց մէջ, եւ ատեն մը ամրոցներուն դէմ իր ³⁴ծրագիրները պիտի պատրաստէ՝՝։

Մեծ զօրագունդով իր ոյժն ու սիրտը պիտի գրգռէ հարաւի թագաւորին դէմ։ Հարաւի թագաւորն ալ պատերազմի պիտի հրահրուի՝ յոյժ մեծ եւ հզօր զօրագունդով, բայց պիտի չդիմանայ, որովհետեւ անոր դէմ ծրագիրներ պիտի պատրաստուին.

անոր համեղ ճաշերը ուտողներն անգամ զայն պիտի ջախջախեն. անոր զօրագունդը պիտի ³⁵ցրուի, ու շատերը խոցուած պիտի իյնան։

Այս երկու թագաւորներուն սիրտը չարութեան հակամէտ ըլլալով՝ նոյն սեղանին վրայ սուտ պիտի խօսին. բայց պիտի ³⁶չյաջողին, քանի որ վախճանը սահմանուած ատենին պիտի հասնի։

Ան շատ ինչքով իր երկիրը պիտի վերադառնայ. բայց իր սիրտին մէջ սուրբ ուխտին դէմ չար դիտաւորութիւններ ունենալով՝ զանոնք պիտի գործադրէ, յետոյ իր երկիրը պիտի վերադառնայ։

«Սահմանուած ատենին պիտի վերադառնայ ու դէպի հարաւ երթայ. բայց վերջին անգամը առաջինին պէս պիտի չըլլայ։

Արդարեւ Կիտացիներու նաւերը անոր դէմ պիտի երթան. ան ալ պիտի յուսալքուի, եւ դարձեալ սուրբ ուխտին դէմ սրտմտութեամբ պիտի լեցուի ու գործէ. պիտի վերադառնայ եւ սուրբ ուխտը լքողներուն ³⁷ուշադրութիւն դարձնէ՝՝։

Իր կողմէն ³⁸զօրքեր պիտի ³⁹տեղաւորուին, սրբարանն ու ամրոցը պիտի պղծեն, մշտատեւ զոհը պիտի վերցնեն, եւ աւերող պղծութիւնը պիտի դնեն։

Շողոքորթութիւններով պիտի ⁴⁰ապականէ ուխտին հանդէպ ամբարշտութեամբ վարուողները. բայց ժողովուրդէն իրենց Աստուածը ճանչցողները ուժգնօրէն պիտի ⁴¹հակազդեն։

Ժողովուրդին ուշիմները շատերուն պիտի սորվեցնեն, եւ ժամանակ մը պիտի ⁴²իյնան սուրով, բոցով, գերութեամբ ու կողոպուտով։

Երբ իյնան՝ քիչ մը օգնութիւն պիտի ստանան, եւ շատերը շողոքորթութիւններով անոնց պիտի յարին։

Ուշիմներէն ոմանք պիտի իյնան, որպէսզի անոնք փորձարկուին, մաքրուին ու ճերմկնան մինչեւ վախճանին ատենը. արդարեւ ան տակաւին պիտի տեւէ՝ մինչեւ սահմանուած ատենը։

«Այդ թագաւորը իր կամքին համաձայն պիտի վարուի. ինքզինք պիտի բարձրացնէ եւ բոլոր աստուածներէն վեր մեծցնէ. աստուածներու Աստուծոյն դէմ ⁴³զարմանալի բաներ պիտի խօսի, ու պիտի յաջողի՝ մինչեւ որ սրտմտութիւնը ⁴⁴իրագործուի. որովհետեւ վճռուածը պիտի կիրարկուի։

Ան իր հայրերուն աստուածներուն ⁴⁵ուշադրութիւն պիտի չդարձնէ՝՝, ո՛չ ալ ⁴⁶կիներու Ցանկալիին՝՝. ո՛չ մէկ աստուծոյ ուշադրութիւն պիտի դարձնէ, որովհետեւ ինքզինք ամենէն վեր պիտի մեծցնէ։

Հապա ամրոցներու աստուածը պիտի պատուէ իր եղած տեղը. իր հայրերուն չճանչցած աստուածը պիտի պատուէ ոսկիով, արծաթով, պատուական քարերով եւ ցանկալի բաներով։

Այդ օտար աստուծոյն հետ պիտի ⁴⁷պայքարի ⁴⁸անառիկ ամրոցներուն դէմ. զայն ⁴⁹ընդունողներուն պատիւները պիտի բազմապատկէ, ու շատերուն վրայ տիրել պիտի տայ անոնց, նաեւ ⁵⁰երկիրը պիտի բաժնէ անոնց իբր ⁵¹հատուցում։

«Վախճանին ատենը հարաւի թագաւորը իրեն պիտի բախի. բայց հիւսիսի թագաւորը մրրիկի պէս անոր վրայ պիտի խոյանայ կառքերով, ձիաւորներով ու բազմաթիւ նաւերով. երկիրներ պիտի մտնէ եւ ⁵²հեղեղի պէս՝՝ անցնի։

Փառաւոր երկիրն ալ պիտի գայ, ու շատ երկիրներ պիտի ⁵³կործանին. բայց անոր ձեռքէն հետեւեալները պիտի ազատին.— Եդովմ, Մովաբ եւ Ամմոնի որդիներուն գլխաւոր քաղաքները։

Իր ձեռքը երկիրներու վրայ պիտի երկարէ, ու Եգիպտոսի երկիրը պիտի չազատի։

Ոսկիի եւ արծաթի գանձերուն ու Եգիպտոսի բոլոր ցանկալի իրերուն պիտի տիրէ. ⁵⁴Փութացիներ եւ Եթովպիացիներ անոր քայլերուն ⁵⁵պիտի հետեւին՝՝։

Բայց արեւելքէն ու հիւսիսէն եկած չարագուշակ լուրերը զինք պիտի շփոթեցնեն. ուստի մեծ բարկութեամբ ⁵⁶պիտի երթայ՝՝, որպէսզի շատերը բնաջնջէ եւ անճիտէ։

Իր պալատին վրանները ⁵⁷ծովուն ու փառաւոր սուրբ լերան մէջտեղը պիտի կանգնեցնէ. սակայն իր վախճանին պիտի հասնի, եւ ո՛չ մէկը անոր պիտի օգնէ»։