Daniel 12

Ezekiel  «  Daniel 11  ‹  Daniel 12  ›  Hosea 1  »  Hosea

ՎԱԽՃԱՆԻՆ ԱՏԵՆԸ

«Այն ատեն ոտքի պիտի ելլէ Միքայէլ մեծ իշխանաւորը, որ քու ժողովուրդիդ որդիներուն քով կը կենայ, եւ տագնապի ժամանակ մը պիտի ըլլայ, որուն նմանը ազգ ըլլալէն մինչեւ այդ ատեն եղած չէ. այդ ատեն քու ժողովուրդդ պիտի ազատի, այսինքն՝ ո՛վ որ գիրքին մէջ արձանագրուած գտնուի։

Երկրագունդի հողին մէջ քնացողներէն շատեր պիտի արթննան, ոմանք յաւիտենական կեանքի համար, ոմանք ալ նախատինքի ու յաւիտենական պժգանքի համար։

Ուշիմները երկինքի հաստատութեան ցոլքին պէս պիտի ¹փայլին, եւ անոնք որ ²արդարութեան կ’առաջնորդեն՝՝ շատերը՝ աստղերուն պէս, ³դարէ դար՝՝։

«Իսկ դո՛ւն, ո՛վ Դանիէլ, գոցէ՛ այս խօսքերը ու կնքէ՛ գիրքը՝ մինչեւ վախճանին ատենը։ Շատերը ⁴պիտի շրջագային՝՝, եւ գիտութիւնը պիտի շատնայ»։

Ես՝ Դանիէլ կը նայէի, եւ ահա՛ ուրիշ երկու մարդիկ կայնած էին, մէկը՝ գետին մէկ եզերքը, ու միւսը՝ գետին միւս եզերքը։

Մէկը ըսաւ այն կտաւ հագած մարդուն, որ գետին ջուրերուն վրայ կը գտնուէր. «Այս սքանչելիքներուն վախճանը ⁵ե՞րբ պիտի հասնի՝՝»։

Լսեցի թէ այդ կտաւ հագած մարդը, որ գետին ջուրերուն վրայ կը գտնուէր, իր աջ ձեռքն ու ձախ ձեռքը երկինք բարձրացնելով՝ յաւիտեան ապրողին վրայ երդում ըրաւ թէ ⁶ժամանակ մը, ժամանակներ եւ կէս ժամանակ պիտի տեւէ, ու երբ սուրբ ժողովուրդին ⁷զօրութիւնը ամբողջովին ⁸ջախջախուի, այս բոլորը պիտի աւարտին։

Ես լսեցի, բայց չհասկցայ, եւ ըսի. «Ո՛վ իմ տէրս, ասոնց վերջաւորութիւնը ի՞նչ պիտի ըլլայ»։

Ան պատասխանեց. «Գնա՛, ո՛վ Դանիէլ, քանի որ այս խօսքերը ⁹գոցուած ու կնքուած են մինչեւ վախճանին ատենը։

Շատերը պիտի մաքրուին, ճերմկնան եւ փորձարկուին. բայց ամբարիշտները ամբարշտութիւն պիտի գործեն, ու բնա՛ւ ամբարիշտ մը պիտի չհասկնայ, հապա ուշիմնե՛րը պիտի հասկնան։

Մշտատեւ զոհին ¹⁰դադրած ատենէն մինչեւ աւերող պղծութեան դրուիլը՝՝ հազար երկու հարիւր իննսուն օր պիտի ըլլայ։

Երանի՜ անոր, որ պիտի սպասէ ու հազար երեք հարիւր երեսունհինգ օրուան պիտի հասնի։

Բայց դուն գնա՛ մինչեւ վախճանը. արդարեւ պիտի հանգչիս, եւ օրերու վախճանին պիտի կայնիս քու վիճակիդ մէջ»։