Ezekiel 1

Lamentations  «  Lamentations 5  ‹  Ezekiel 1  ›  Ezekiel 2  »  Daniel

ԵԶԵԿԻԷԼԻ ԱՌԱՋԻՆ ՏԵՍԻԼՔԸ (1. 1-7. 27) ԱՍՏՈՒԾՈՅ ԳԱՀԸ

Երեսուներորդ տարուան չորրորդ ամսուան հինգին, երբ ես տարագիրներուն մէջ էի՝ Քոբար գետին քով, երկինքը բացուեցաւ եւ Աստուծոյ տեսիլքները տեսայ։

Ամսուան հինգերորդ օրը, (Յովաքին թագաւորին տարագրութեան հինգերորդ տարին,)

¹Տէրոջ խօսքը յատկապէս ²ուղղուեցաւ Բուզիի որդիին՝ Եզեկիէլ քահանային, Քաղդէացիներու երկրին մէջ, Քոբար գետին քով. ու հոն՝ Տէրոջ ձեռքը իր վրայ եղաւ։

Տեսայ թէ ահա՛ հիւսիսային կողմէն մրրկալից հով մը կու գար, մեծ ամպով ու ³փայլակնացայտ կրակով. անոր շուրջը պայծառութիւն կար, եւ անոր մէջտեղը — կրակին մէջտեղը — ոսկեպղինձի դրսերեւոյթ մը։

Նաեւ անոր մէջտեղը չորս էակի նմանութիւն կար, եւ սա՛ էր անոնց տեսքը.— անոնք մարդու նմանութիւն ունէին։

Իւրաքանչիւրը չորս երես ունէր, եւ անոնցմէ իւրաքանչիւրը՝ չորս թեւ։

Անոնց ոտքերը ուղիղ ոտքեր էին. անոնց ոտքերուն ներբանը զուարակի ոտքի ⁴թաթին պէս էր, ու փայլուն պղինձի դրսերեւոյթին պէս կը պսպղային։

Անոնց չորս կողմերը մարդու ձեռքեր կային՝ իրենց թեւերուն տակ։ Չորսն ալ իրենց երեսներն ու թեւերը ունէին։

Անոնց թեւերը իրարու կցուած էին։ Անոնք երթալու ատեն չէին դառնար. իւրաքանչիւրը շիտակ յառաջ կ’երթար։

Անոնց երեսներուն նմանութիւնը սա՛ էր.— չորսն ալ մարդու երես ունէին, եւ աջ կողմէն՝ առիւծի երես. չորսն ալ ձախ կողմէն եզի երես ունէին, նաեւ չորսն ալ արծիւի երես ունէին։

Ա՛յսպէս էին անոնց երեսները, իսկ անոնց թեւերը վերէն կը տարածուէին. երկուքը իրարու կցուած էին, ու երկուքը իրենց մարմինը կը ծածկէին։

Իւրաքանչիւրը շիտակ յառաջ կ’երթար. Հոգին ո՛ւր որ ⁵ուզէր՝ հոն կ’երթային. գացած ատեն աջ կամ ձախ կողմը չէին դառնար։

Ինչ կը վերաբերի էակներուն նմանութեան, անոնց տեսքը վառող կրակի կայծերու պէս էր, ջահերու երեւոյթին պէս. կրակը էակներուն միջեւ կը շրջէր։ Այդ կրակը լուսաճաճանչ էր, եւ փայլակներ կ’ելլէին կրակէն։

Էակները կը սուրային ու կը վերադառնային՝ շանթի երեւոյթին պէս։

Մինչ էակներուն կը նայէի, ահա՛ գետինին վրայ՝ էակներէն իւրաքանչիւրին քով՝ չորս երեսով անիւ մը կար։

Անիւներուն երեւոյթը եւ անոնց շինուածքը ոսկեքարի դրսերեւոյթին պէս էին։ Չորսին նմանութիւնը նոյնն էր։ Անոնց երեւոյթն ու շինուածքը այնպէս էր՝ որպէս թէ անիւ անիւի մէջտեղը եղած ըլլար։

Գացած ատեն՝ իրենց չորս կողմերուն վրայ կ’երթային, աջ կամ ձախ կողմը չէին դառնար։

Ինչ կը վերաբերի անոնց շրջանակներուն, անոնք բարձր եւ ահարկու էին. անոնց շրջանակները ամէն կողմէ աչքերով լեցուն էին, իրենց չորսին ալ։

Երբ էակները երթային, անիւներն ալ անոնց քովէն կ’երթային։ Երբ էակները երկրի մակերեսէն բարձրանային, անիւներն ալ կը բարձրանային։

Հոգին ուր որ ⁶ուզէր՝ անոնք հոն կ’երթային, Հոգիին գացած տեղը. անիւներն ալ անոնց հետ կը բարձրանային, քանի որ անիւներուն մէջ էակներուն ոգին կար։

Երբ անոնք երթային, ասոնք ալ կ’երթային. երբ անոնք կենային, ասոնք ալ կը կենային. իսկ երբ անոնք երկրի մակերեսէն բարձրանային, անիւները անոնց հետ կը բարձրանային. որովհետեւ անիւներուն մէջ էակներուն ոգին կար։

Էակներուն գլուխին վրայ՝ երկինքի հաստատութեան նմանութիւնը կար, ⁷լուսափայլ ակնվանիի դրսերեւոյթին պէս, վերէն ⁸տարածուած անոնց գլուխին վրայ։

Այդ հաստատութեան տակ՝ անոնց թեւերը իրարու ուղղուած էին։ Իւրաքանչիւրը մէկ կողմէն իր մարմինը ծածկող երկու թեւ ունէր, եւ իւրաքանչիւրը միւս կողմէն իր մարմինը ծածկող երկու թեւ ունէր։

Երբ կ’երթային, անոնց թեւերուն աղմուկը լսեցի՝ յորդառատ ջուրերու աղմուկին պէս, Ամենակարողին ձայնին պէս, ժխորի ձայնի՝ բանակի ձայնի պէս. երբ կը կենային, իրենց թեւերը կ’իջեցնէին։

Երբ անոնք կենային եւ իրենց թեւերը իջեցնէին, իրենց գլուխին վրայ եղող հաստատութենէն ձայն մը ⁹կու գար՝՝։

Անոնց գլուխին վրայ եղող հաստատութեան վերեւը՝ շափիւղայ քարի երեւոյթով գահի նմանութիւն մը կար. իսկ այդ գահի նմանութեան վրայ մարդու տեսքի նմանութիւն մը կար՝ վերեւը։

Անոր մէջքին տեսքէն վեր՝ ոսկեպղինձի դրսերեւոյթին պէս, կրակի երեւոյթին պէս տեսայ, շուրջը եւ ներսը. իսկ մէջքին տեսքէն վար կրակի երեւոյթին պէս տեսայ, ու պայծառութեամբ շրջապատուած էր։

Ինչպէս է տեղատարափի օրը ամպի մէջ եղող ծիածանին երեւոյթը, այնպէս էր շրջապատող պայծառութեան երեւոյթը։ Ասիկա Տէրոջ փառքին նմանութեան երեւոյթն էր. երբ տեսայ, երեսիս վրայ ինկայ, ու խօսողի մը ձայնը լսեցի։