Ezekiel 28

Lamentations  «  Ezekiel 27  ‹  Ezekiel 28  ›  Ezekiel 29  »  Daniel

ՄԱՐԳԱՐԷՈՒԹԻՒՆ ՏԻՒՐՈՍԻ ԹԱԳԱՒՈՐԻՆ ԴԷՄ

Տէրը խօսեցաւ՝՝ ինծի՝ ըսելով.

«Մարդո՛ւ որդի, ըսէ՛ Տիւրոսի ¹իշխանին. “Տէրը՝ Եհովան սա՛ կը յայտարարէ. "Քու սիրտդ խրոխտացաւ, եւ ըսիր. «Ես աստուած մըն եմ, Աստուծոյ աթոռին վրայ կը նստիմ՝ ծովուն ²մէջտեղը». սակայն դուն մարդ ես եւ ո՛չ թէ աստուած, թէպէտ քու սիրտդ Աստուծոյ սիրտին ³նմանցուցիր"։

Ահա՛ դուն Դանիէլէն իմաստուն ես. ո՛չ մէկ ⁴գաղտնիք քեզմէ ⁵ծածկուած է։

Իմաստութեամբդ ու հանճարովդ քեզի հարստութիւն վաստկեցար, եւ գանձերուդ մէջ ոսկի ու արծաթ ստացար։

Յորդառատ իմաստութեամբդ ու վաճառականութեամբդ քու հարստութիւնդ շատցուցիր, եւ հարստութեանդ պատճառով սիրտդ խրոխտացաւ”»։

Հետեւաբար Տէրը՝ Եհովան սա՛ կը յայտարարէ. «Քանի դուն սիրտդ Աստուծոյ սիրտին նմանցուցիր,

ահա՛ ես քեզի դէմ օտարներ պիտի բերեմ, ազգերուն ամենէն բռնակալները. անոնք քու իմաստութեանդ գեղեցկութեան վրայ իրենց սուրերը պիտի քաշեն, ու փառահեղութիւնդ պիտի աղարտեն։

Քեզ ⁶գերեզմանը պիտի իջեցնեն, եւ ծովուն մէջտեղը պիտի մեռնիս՝ խոցուածներուն մահով։

Միթէ քեզ մեռցնողին առջեւ պիտի կարենա՞ս ըսել. “Ես աստուած եմ”։ Քեզ խոցողին ձեռքին մէջ մա՛րդ պիտի ըլլաս, ո՛չ թէ աստուած։

Օտարներուն ձեռքով՝ անթլփատներուն մահով պիտի մեռնիս, որովհետեւ ես խօսեցայ», կը պատգամէ Տէրը՝ Եհովան։

ՏԻՒՐՈՍԻ ԹԱԳԱՒՈՐԻՆ ԱՆԿՈՒՄԸ

⁷Տէրը խօսեցաւ՝՝ ինծի՝ ըսելով.

«Մարդո՛ւ որդի, Տիւրոսի թագաւորին վրայ ո՛ղբ բարձրացուր եւ ըսէ՛ անոր. “Տէրը՝ Եհովան սա՛ կը յայտարարէ. "Դուն ⁸կատարելութեան կնիքն էիր՝՝, իմաստութեամբ լեցուած ու գեղեցկութեան մէջ կատարեալ։

Դուն Աստուծոյ ⁹դրախտին՝ Եդեմի մէջ էիր. քու ծածկոցդ բոլոր պատուական քարերէն էին՝ սարդիոն, տպազիոն եւ ադամանդ, ոսկեքար, եղնգնաքար ու յասպիս, շափիւղայ, կարկեհան եւ զմրուխտ։ Ոսկին՝ որ քու թմբուկներուդ ու սրինգներուդ համար գործածուեցաւ, քու ստեղծումիդ օրը պատրաստուեցաւ ¹⁰քեզի համար՝՝։

Դուն օծուած ու ծածկող քերովբէ մըն էիր. ե՛ս քեզ ¹¹հաստատեր էի։ Դուն Աստուծոյ սուրբ լերան վրայ էիր. կրակէ քարերուն մէջտեղը կը շրջէիր։

Դուն ¹²ընթացքիդ մէջ անթերի էիր ստեղծուած օրէդ մինչեւ այն օրը՝ երբ քու վրադ անիրաւութիւն գտնուեցաւ։

¹³Առուտուրիդ ճոխութեան համար՝ քու մէջդ բռնութեամբ լեցուցին, ու մեղանչեցիր. ես ալ քեզ Աստուծոյ լեռնէն վար նետեցի՝ իբր պիղծ. քեզ կրակէ քարերուն մէջէն բնաջնջեցի, ո՛վ ծածկող քերովբէ։

Քու գեղեցկութեանդ համար սիրտդ խրոխտացաւ, քու փառահեղութեանդ պատճառով իմաստութիւնդ ապականեցիր. ես ալ քեզ գետինը նետեցի, թագաւորներուն առջեւ դրի՝ որ քեզ տեսնեն։

Քու անօրէնութիւններուդ շատութեամբ, վաճառականութեանդ անիրաւութեամբ՝ քու սրբարաններդ պղծեցիր։ Ես ալ մէջէդ կրակ հանեցի. ան քեզ սպառեց, ու բոլոր քեզ տեսնողներուն աչքերուն առջեւ քեզ գետինի վրայ մոխիրի ¹⁴վերածեցի։

Ազգերուն մէջ բոլոր քեզ ճանչցողները քու վրադ ապշեցան. դուն արհաւիրքի պատճառ եղար, ու յաւիտենապէս չքացար"”»։

ՄԱՐԳԱՐԷՈՒԹԻՒՆ ՍԻԴՈՆԻ ԴԷՄ

¹⁵Տէրը խօսեցաւ՝՝ ինծի՝ ըսելով.

«Մարդո՛ւ որդի, ¹⁶ուղղէ՛ երեսդ դէպի Սիդոն, մարգարէացի՛ր անոր դէմ

եւ ըսէ՛. “Տէրը՝ Եհովան սա՛ կը յայտարարէ. "Ահա՛ ես քեզի դէմ եմ, ո՛վ Սիդոն, ու մէջդ պիտի փառաւորուիմ". պիտի գիտնան թէ ե՛ս եմ Տէրը՝ երբ անոր մէջ դատավճիռներ կիրարկեմ, եւ անոր մէջ սուրբ ըլլամ։

Արդարեւ անոր մէջ ժանտախտ պիտի ղրկեմ, ու անոր փողոցներուն մէջ՝ արիւն. անոր մէջ վիրաւորներ պիտի իյնան՝ ամէն կողմէ անոր վրայ հասնող սուրով, եւ պիտի գիտնան թէ ե՛ս եմ Տէրը։

Իսրայէլի տան համար անգա՛մ մըն ալ ¹⁷խայթող տատասկ պիտի չըլլայ, ո՛չ ալ կոտտանք պատճառող փուշ՝ բոլոր զիրենք շրջապատողներէն, որոնք զիրենք կ’արհամարհեն. ու պիտի գիտնան թէ ե՛ս եմ Տէրը՝ Եհովան”»։

ԻՍՐԱՅԷԼ ՊԻՏԻ ՕՐՀՆՈՒԻ

Տէրը՝ Եհովան սա՛ կը յայտարարէ. “Երբ Իսրայէլի տունը հաւաքեմ այն ժողովուրդներէն՝ որոնց մէջ ցրուած են, այն ատեն ¹⁸ազգերուն աչքերուն ¹⁹պիտի փառաւորուիմ՝՝ անոնց մէջ, եւ անոնք պիտի բնակին իրենց ²⁰երկրին մէջ՝՝ որ ես տուի իմ Յակոբ ծառայիս։

Անոր մէջ ապահովութեամբ պիտի բնակին, ու տուներ պիտի կառուցանեն եւ այգիներ տնկեն։ Երբ դատավճիռներ կիրարկեմ բոլոր զանոնք շրջապատողներուն դէմ՝ որոնք զիրենք կ’արհամարհեն, իրենք ապահովութեամբ պիտի բնակին. ու պիտի գիտնան թէ ե՛ս եմ Տէրը՝ իրենց Աստուածը”»։